Text view

FM13_35_1

Recording date2013-10-20
Speaker age67
Speaker sexf
Text genrepersonal narrative
Extended corpusno
Javascript seems to be turned off, or there was a communication error. Turn on Javascript for more display options.
nyila-ma kankulupal-a ngarlaka-ma, kuya karrinyana. nyawa-ma kurlarnimpal-a-ma kuya-ny igin. Ngima-ma nyawa na ngulu tal panana Neave Gorge-ma. kankarra nyila Warlakula Kurrpkarrala. nyila-ma kankapa. warlaku-lu nyamu-lu kayikayi-pani nyampayirla. kurlarra yala-nginyi, karlaniyin ngu-lu kayikayi pani warlaku-lu-ma. kanyjal ngu-lu payarni. warlwarl-arra majul-ma ngu-lu payarni purrp. ngirilirrng ngu karrinya kuya kanyjurra, nyila-ma wirnangpurru-ma. jangkarni-wan nyamu-lu kayikayi pani warlaku-lu. murla-ngkurra-rni kankarra warlaku-la kurrpkarra-la nyawa na, Ngiima. kartiya kal-im Neave Gorge. yala-ngka na, majul-ma-lu warlwarl-larra payarni. nyilarra parnkarrang warlakuwalija ma kulalu yani yikili kuyanyja na jimpirila ngulu kayinimpala nginyi na karrinyana nyila-rra-ma warlaku parnkarrang nyamu-lu payarni nyila-ma kankarra. lupu-ma nyamu-lu warlwarl-larra jeya manana yalu-wu. kuya-ny na papapart karrinyana-ma, makin janyja-ka nganta wumarawumara-la. marntaj, kuya na nyila-ma karrinyana. larrpa-nginyi nyawa-ma, nyamu-yinangulu panani yu nou, kartipa-lu. panani ngu-yinangkulu. wal kankulupal-a murla-rniny na rarraj-ma-lu yani. ngaji-ma ngayiny ngaji an najan marluka-yayi Kilkil-ngarna ngu-wula rarraj yani. kankulupal-a ngu-wula kuya na kurlanimpal-la yani, ngu-yinangulu pani, turlwak. +"wartayi! "pani-warla ngu-ngkulu marntaj. +"lawara nyawa-ma-rna marntaj. +"yanku-rli rarraj. yani na ngu-wula rarraj na kujarrap-pa-rni na. ngaji-ma ngayiny-ma kamparra-la na rarraj. marluka-kari-ma nyila-ma-rla ngumayila-la yanani. ngu-wula yani na karlangkarla nyawa na kankulupal-la ngu-wula yani. karlarra jawurruk, kankarra nyawa nganayirla-mayin ngu yani. Ngima nyawa-ma ngarlaka-la nganayirla-mayin. karlangkarla nyawa na ngu-wula yani, nganayirla-yirri, kankapa nyawa, Langkarrij. Langkarrij-nginyi-ma-wula yani, nganayirla-yirri, kankarra kuya nyila yawu-waji na manu-waji ngurra-witi nyila-ma. nganayirla nganayirla yala-ngka-wu na ngu-wula yani. rarraj ngu-wula murla-nginyi-mayin. ngu-wula yani jarrwa-ngkurra. jarrwa na ngu-lu yani yala-rniny-ma. Langkarrij yard karlangkarla partaj ngu-lu yani kankarra Ngawurrakala na karlangkarla. Ngawurrakala na ngu-lu yani. Wankulu all around nganyirla Jewel Drop Wankulu. Jimirij all around na. kankulupala nyawa na ngulu yani nyarrulunyja nung nungkinykula na kanyjurra kurlarra Nangkurra-yirri pina ngu-lu yani. jarrwa-ngkurra na ngu-wula yani, ngayiny-ma ngaji-ma ankaj kujarra. wanyji-wu ngu-wula yani. marntaj yala-ngkurra na ngu-wula yani, kanyjurra jawurruk. kuya. yirrap-pari ngu-lu yani kayirra murla-nginyi-ma, murla-rra karlarra ngu-lu yani. yani ngu-lu nganayirla-yirri na, nyila na nyarruluny-ja kantri-la kanyjupal-la. nganayirla-mayin na Kurlungurru. nyanuny kantri nyamu-yina nyanuny yala-rniny na ngu-lu yani. kanyjurra jawurrujawurruk kurlarra nyawa ngu-lu yani, nganayirla yala-ngkurra na ngu-lu yanani. kamparrijang-ma ngu fire-ma nganta kayirniyin-tu na nyanya ngu-wula kanyjurra. jurlujurlup-karra faya-ma, jiyarnani. kuya-ngku-ma-lu yani na kankuliyit-tu-ma-yinangulu nyanya kanyjal-ngurlu. ngaliwanguny ngamayi. jawurruk. karlarra-said-pa-rni jawurruk-ma-lu kuya-rniny crossing-said. jawurruk ngu-lu yani, kanimparra ngawa-ngkurra. kukij-karra ngawa water-im-bat ngarlaka nyampa ngu-lu_nyunu mani marntaj. yala-nginyi-ma-lu yani warrij. jarrwa-ngkurra na, kurlanimpal-la-side that's all nyamu-lu karrinyani. ngayiny-ju-ma ngapuju-lu-ma nyanya na. +"warta Jangari nyawa-rni kayiliyin yanana. +"yuu. +"lawara ngu-ja yani wanyjirrik ngayirra-ma rarraj, kujarrap. +"ngayiny papa-purrupurru, kuya, +"yani ngu-ja +"wayi, kuya, "aah nyila-ma ngayiny igin ngu-rna kanya, papa-ma. +"yeah marntaj ngu-npula yani, kuya. +"ngunpula yani marntaj. jarrwa-ngkurra na ngu-lu yani. jarrwa-ngka na ngu-lu. ngayiny nungkiying-kula na nyanuny-ja nungkiying-kula na. ngamayi-la nyampa-ka jaju-ngka na, nyanuny-ja ngaji-ngka. nyanuny-ja jaju-ngka, karrinya nungkiying-kula na. nyila na Jaru-said na karlarra-said olabat bin jidan. yuwayi, purrp na ngu-lu karrinya xxx ngajik-pa-rni nyamu-wa karrinya ngurra na. Jinparrak Murnturluk-kula kankarra ngu-wula karrinya. hawuj hawuj na kuya-ngka na ngu-lu wartwart-ma marntaj dats al na Nangari. yuu yinangulu yalanginyi mani na puntanup na nyamu-lu yani wart, ngu-yinangulu mani. kanya ngu-yinangulu. kanya na ngu-yinangulu yala-ngkurra na, ngurra-ngkurra na. ngu-lu karrinyani na. punyu-ma marntaj ngu-lu karrinyani. &kula-nyjurra kurrupartu karrinya lawara na, kuya. langa Murnturluk na ngu-lu mani waruk. kuya na. wal kula-rna-yina pinarri yalu-wu-ma kartipa-wu-ma larrpa ngu tampang karrinya ngayiny onli nyawa-ma-yi ngaji-ngku ngayiny-ju yurrk yuwani nyamu-yinangulu langa-ngkurra. karrinya nyamu-lu marntaj, dats al na.
• Interlinear Glossed Text • Utterance view