Text view

warEhko_mEE

Recording date2005-08-12
Speaker age60
Speaker sexm
Text genretraditional narrative
Extended corpusno
Javascript seems to be turned off, or there was a communication error. Turn on Javascript for more display options.
mélleebúcunu bo ámuha wákimyéi múnaa íllu múúne teene íñe wañéhjɨ́né, wañéhjɨ́né iibíí mé- mewárɨ- méwárɨhcóhi ááné warɨ́hcó llévanéjcú mɨɨvájɨ ílluú: ménijcyójɨ́ niimúhevápeecu íchihyi mekéne ipíívyétsócooca aa- aabe iiyéi wárɨ́hcohíjcyá íiibíí, wárɨ́hcoobe caatúnuube cáámeu aanéváa waajácuube májchotáhé mɨɨúho mu ímíhye ménijcyójɨ́ niimúhé muhdɨ́ɨ́vané deícyuhíjcyáhi, neebe] cána o déíjcyuté dííbye élletu, iñééne tsaabe májchotáhé mɨɨúho tsáábe neébe llíhij, neébe, a oke ú aahɨ́vé éée éée táhdi neébe, uke ó aahɨ́vé juúju llíhi, neébe tehdújuco, neébe uke o déíjcyútsoki, neebe uúhu tsaabei tsúúca oke májchotátu eenéne lli tsane mé, táiibííwu cóeváné warɨ́hco, neébe, déíjcyúnema ɨ́ɨ́cúiyéne ihdyu íñe áyánéwu ó meenúcúhi uúhu táhdi neébe, tehdújuco neébe, téénéllii o tsáá mu ímíhyéhaca nééne íñe ú déícyuhíjcyáhi neébe éée, neébe tsúúca wárɨhcójúcoobe, wárɨ́hcohíjcyaabe, wárɨ́hcohíjcyaabe, wárɨ́hcohíjcyaabe aanéváhacáa ihdyu eene jm elle ihdyu teene ííbii áívyénáa eene teene eene í- ɨ́hjɨ́neecúré ihdyu eene tsóe, tsóe, tsóe, tsóe, néénáa teene tsú ííbii áiivyé éhlle cáráájɨ́ aane ih itsócótsóne caanújúcoobe eene áíívyei cáánuube, wábúrújcoobe, pánéévétsoobe táhdi neébe uke o déíjcyútso uúhu déíjcyuube diibye ménijcyójɨ́ niimúhé eene áiivyéné ííbii jm ɨ́ɨ́búwá pañe, tsáhaá, neébe, áiúcuubéhacáneécu tsá dibye píívyetétúne neebe ɨ́ɨ́búwá pañe áánélli neébe: táhdi díyaa, tahdu díwajyáhbába, díwajyáhbábau tahdi oke daacu llíhij neébe, íñené o méénúnéwúumáyéi ó coévá neébe nu tsúúca idyé u déijcyújúcoobe u wárɨ́hcoobe, u cáánune, díwajyáhbábáwu méénúné pañéú tsájtyene lli deíjcyu, neébe, eene tene áíívyénélli neébe áábekévá múúne mépáátanúhi íñe wañéhjɨ́né iibíí mewárɨ́hcócooca diibye májchotáhé míñéécu tééne méme májchotáhee ííbíihye éhdune mémeménu teéne tsáijyu menéé májchotáhe tsáijyu menéé ííbíihye áábekévá múúne mépáátanúhí teene májchotáhé mɨɨúhoke, mɨɨúhoke mépáátanúhí mewárɨ́hcoki, wañéhjɨ́, íñe ícyooca meíjcyadu tsúúca tsaapíjyuco tsá píívyetétú, ááné hallúú tsaabe, ááne hallúú tsaabe mémájchotá viihyéjɨ, téijyúvápe mɨ́a múnáajpi táhdí neébe, múhdɨ́ɨ́vanéj muhdú ihdyu ímíhye ne téénélli tahdi o tsááhi neébe tsahdújuco dibye néhíjcyá eene llí méiibíiwu mééma warɨ́hco mehde uúhu aabéváa ihdyu ímí báábatsó áróroobée báábátsoobe ímíhyee báábátsoobe cáánuube, wábúrújcoobe íílleúreváhacáa ihdyu eene íhyallúvúré ihdyu eene dibye wábúrujcóne illaj aj téénélliihyévá múu diibye májchotáhé viihyéjɨ́ eene ajtyúváábeúvu tsúúca, eenéne peíyé menééne tsúúca óómichójúcoóbe, áyánéwu éée áánélli neebe ménijcyójɨ́ niimúhe mu kémúíchóhrené nééne mu áánu táiááchí muhdú áyánéwu muhdú pánéévetsóhi ne déíjcyumútsí ihdyu ímíhye íñe medéijcyúdú nééneé aane muhdú teéne, wajacu ááá, neébe, mu muurá ihdyu í- íhyallúvúréhaca idyu íjpííuréhaca ihdyu muurá déíjcyuúbe, neébe áánélli eene áyá pánéévétsoóbe neebe ehdújucóhaca néhikye béhné tsɨɨménémú, májchotáhé wajyáhbábá wábúrújcóroobe néhikye mítyane íjcyaróné iibíihye néhikye áyánéwu dóbeúcuhíjcyáné ípívyéjtsoóbe neébe, jm ménijcyójɨ́ niimuhe áábekévá múúne mépáátanú diibye májchotáhé viihyéjɨke idyé téhdure teene mewábúrújcoóbe ááné hallúú tsaabe, majchotáhé paawáyúu llíhij neébe, diibye cáánuhí ménijcyójɨ́ niimúhé cáánuhíjcyánáa aahɨ́vévaábe llíhij, neébe a oke éée, ɨɨná ɨ́datsó tahdi úúhañéhjɨ́ré ú cáánuhíjcyáhi, neebe tsíva o cáánuki, tsíva o wábúrújcoki úúmaá neébe uúhu llíhij cáánuube májchotáhé paawáyu, cáánuube wábúrújcoobe, téhdure eene kémúhrené nééne eene áyánéwuúré eene pánéévétsoobe íílleúváhacáa teene eene íhyójtsɨwááñé pañéúré ihdyu eene dibye teene dibye ménijcyójɨ́ niimúhé májchotáhé tsúúca naníjyúcoóbe, aaj nániibye inániñe to- ee íílleúré ihyójtsɨwááñé páñéúré wábúrujcoobe aane nániibye téhullévú íhyójtsɨwááñé pañéu aabe idyé ijchívyetsó eene áyánéwu ááne, ba aca muhdú teéne, áyu téhdunére, tsúúca uúhú, llíhi neébe, tehdújuco aane mu kémúhrené nééne táiibíí áyáhreé éhne aanéváhacáa ihdyu eene ehdu íhyójtsɨ́wá pañé en ni ibábáñúne ihdyu eene ihjyávú ipyééne ihdyú eene diby állóójanúné állóójanúube állóójánuube tsúúca íiibíimájuco diíbye, jm tsúúca áábekévá múúne idyé mépáátanú diibye májchotáhé paawáyuke nei mewábúrújcoob aa ehdu néébe ehdu néébéké mépáátanú wañéhjɨ́ iibíihye me me mewákímyeí áá áábé hallúú tsaabe májchotáhé kikííjye, téhdure idyé táhdi, néévaabe, a oke ú aahɨ́vé éée llíhij neébe ɨ́dátsó tahdi úúhañéhjɨ́ré ú wábúrúcohíjcyá neébe, tsíva o wábúrújco úúmaá uúu, llíhij neébe wábúrúcohíjcyaabe dííbyema cáánuube, wábúrújcoobe, cáánuube téhdure idyé oonúcuube eene áyánéwu teene dííbyé iibíí idyúváhacáa ihdyu eene dibye wábúrujcóné eene teene íhñúwa eene teene wáburújcójɨ́ déjúcotu áachívúré boj- patai bojtsóne, bojtsóné, bojtsóné, bóbéúcuube téhdure áyánéwu áábekévá múúne mépáátanúhí teene mewá búrújcoóbe, mépáátanú éh- éhdumévápe ehdu cápájyanú íñe teene májchotáhé ménijcyójɨ́ niimúhé májchotáhé óó- óó- óóvetéme, cápájyanúhi áámekévá múúne mépáátanú á- á- ámehjɨ́vá múúne mé- méjpɨɨne íjcyame eene ehdu eene caa ííbii áiúcúhí, mítyane íñe wañéhjɨ́né iibímú íjcyaróné eene áyá ááíyónélliihyévá múúne ehdu mémɨɨváménúmei íñe ííbíí wákimyéi múnaa mee éée neébe ehdújúcóhaca néhikye táhboonévú májchotáhé óóvéróné wákimyéi múnaa néhikye ehdu tsaapi mítyaróné ijy ííbii íjcyaróné néi áyánéwuúré dóbeúcuhíjcyaíñé uipivej ú ípívyejtsóhi neébe ehdu ɨ́ɨ́búwá pañéré neébe, tsá dibye dííbyeke néétune éhdúmekévá múúne mépáátanú ááné hallúvú tsaabe máhallú ohchámu núhbá hajchi, tsaabe táhdi néévaábe au a lli oke ú aahɨ́véhi éée a íñe tahdi díiibíi neébe tsai éée llíhij neébe, tsáhái o wárɨ́hcotú úúma tahdi ó wárɨhcóhi neébe uúu llíhij neébe, wárɨhco medéíjcyuki tsúúca cábuhcújúcoobe diibye máhallú ohchámu núhbá hajchi, cábúhcuube carútújcaáyoobe teene cújuwa icárútújcaáyónema teene méhlliiñé naavémujé májchotá cujúwá páátánuúbe áánema teene ihñé, ihñé iimú cuwáárá májchotá cujúwá cárútújcaáyoóbe ílluva múúne nééné mɨɨvájɨri méwárɨhcó mɨɨvájɨ́ wáájácuube wárɨhcóné eene ííbii iimúhí, ííbii iimú tsúúca wárɨhcójúcoobe íílle ícapíhyejúcú lliiñétú teene cújuwa nɨwá nɨ́wa nɨ íílletu íllityéébé ménijcyójɨ́ mubejeba aadi áiúcuú táiibíi aadi áiúcuúhi mu múijyúubá ííbii wárɨ́hcohíjcyátuube wárɨhcóvá máhallú máhallú ohchámu núhbá hajchi jm dibyéi ɨ́jtsótunáa tsúúca mu áyá nejɨ́ɨ́va cújúwa, tu jm tsúúca piñáójúcoobe cáánuube, táhdi neébe deíjcyuju ɨjtsúcunúúbé tei áiivyéne mu ɨ́htsutúné cújuwa péétene, déij- déíjcyuube eene ɨ́ɨ́né imíjyaú eene diibye ménijcyójɨ́ ídyeíjcyú méénuhíjcyáné ehnííñéwuúvú imí juuu, neébe, áánúha ihdyu táiááchí piivyétéhi neébe, jm téhdújuco aane idyé íllújúcooíhyaca néhikye táiááchí ɨ́jtsaméí wáájácúné tsɨɨménémú néhikye ímájchótáhé néhikye íllu báábátsohíjcyaáhi, íllu óóvehíjcyaáhi neebe ehdu ehdu aawa eewává múúne mépéétetsó teene méhlliiñé naavé <<wip>> mujé m májchotá cujúw teewává múúne méhójtsɨ́ pañévú áiúcúhí íñe teene ííbii mewárɨhcó aawa páátánuub ááne icáánútsihvu ɨ́jtsámeííby májchotáhé naavéné nííwau dɨ́wajcárólléiíbye dɨ́májcótsólléiíbye ɨɨ́jtsámeíñe cáánuú míijyúcúré cahnúcuúbe ɨ́ɨ́né imíjyaú ico teene múu wábúrújcó llijyúdu májchotáhé naavéné nííwau dɨ́wajcárótsólléiíbye dɨ́majcótsólléiíbye ɨ́ɨ́cuí páátánuube mm diibye májchotáhé naavéné n nííwau úmuhjácoobe iwábúrújcóítsi teeúváa dibye páátánútúhajchííjyú íllu teu ɨ́waúcunúné pañéúré wábúrújcóiibye wábúrújcóiiby áyánéwuúré ííbii íjchívyéíyónélli teeu páátá m úmuhjácoóbe páátánuúb májchotáhe míñéécu tééne ɨ́jtsaméi ee caanú caanú iwábúrújcótsiu úmúhjácoobe teéne icyáánútsihyu ɨ́wajcároóbe eh imájchótsótsihyu, au iwábúrujcótsihdyu úmuhjácoóbe páátánuube ílluva múúne nétsihdyu idyé íñe teene llíyaaróné íñe ííbii eene mewábúrújcoróné eene nevá múúne teu ɨ́waúcunúné pañévúré méwábúrujcó llíyaaróné ííbii ííbíi tsúúca, ééné mɨɨvájɨrívápeecu ɨ́ɨ́cúiye tsóhcótsoóbe, ɨ́ɨ́cúiye cahnúcuúbe, ɨ́ɨ́cúiye wábúruácoóbe áyárónéwu ménijcyójɨ́ niimúhé iibííhaamɨ́cunécu éée, dííbyé wajyáhbábanécú wáhpétsoóbe wahpe táhdi neébe tsíva díwajyáhbába uúju ne ímí, ímí tádɨ́rɨ́hcoobe tsá tahdi tsiiñe díwajyáhbábá íjcyatúne tsáhaá neébe mui mu íñéi íjcyá nééneé téhbabyá pañéúréi duúcu neébe eenéne mewábúrújcóhbábyá pañévu uúhu téwaahye iwáágóóne téhdure idyé tádɨ́rɨ́hcoóbe ímí táhdi neébe tsá tsá tsiiñe íjcyatú mu páneeréi íílleé, neébe úú neébe tehdújuco llíhi, tehdújuco llíhi neébe ímí, ímí, ímí tsúúca bo- botsíi cáhcújtsoobe dibye mu kémuutúné dibye éhdune dibye tsúúca tádɨ́rɨ́hcónélli botsíi cáhcújtsoóbe éhdúvápe ijy éhdúváp áá áábé mɨɨvájɨrívá múúne ehdu m méwárɨhcó ííbii éhdune mépáátanúh warɨ́hco múnaa ámúhakye ó úúballé aabévá múu, diibyéváa piivyété teéne aabe tsaapííyéjucóne dííbyema teene jm dibye áábekéváa diibye ménijcyójɨ́ niimúhé awáá pɨ́ááboobe ílluréjuco dííbyeke ɨɨ́jtsaméityu ájcuube, ɨ́ɨ́cúiye llíyaaténé ííbii ee tsóhcótsoobe ɨ́ɨ́cúiye cahnúcuube wábúruácoobe mítyane íwátsoobe jmtaatu áábé mɨɨvájɨri méwárɨhcó teene ííbii aa éh éh éhdúneva wamúúne eene méhdiu n íñe llíyaaróné ííbii mewábúrújcoróné kiávurá eenée dibye páátanú áyárónéwu dibye mítyane pánéévetsó pánéévetsóne áánéllii eene oh- máhallú ohchámu núhbá hajchi némeííbyé íñe ohcháiyéjuco téénélli muurá íñe n íñe jáá mɨjcóhówari diíby éée dibye ihdyu meke ɨ́ɨ́tehíjcyane ohcháíwu diíbye áánélliihye apújco májtsityu idyé íjcyaabe ohchái, ehdúu dibye ímí néénéllií ohchá- ohcháí áánu íñahbé táábama múúmuco añúváhi, ohchái chái ímíhyeri úméheri dollíyí dollíyi uvánú uvánu ohcháí áánu íñáhbé táábama múúmuco añúváhi cóójɨ́ pañééne májtsí raahórí diibye ohchái ohchái éhdune teene íñe ííbii wañéhjɨ́ iibííñé mewákímyeíñé mɨɨvájɨ aane tsúúca ámuha méwaajácújucóó, ámúhakye o ó úúballéjucóó, caadí oói néébe múu waajá teéne íñe wañéhjɨ́né ícyahíjcyáné tsá múijyú ó úúvéityúne, tsá múijyú ó úúvéityúne ehdu teene íñe wañéhjɨ́né iibíí mɨɨvájɨ éhdúnevápe eene íjcyane áyá néhijcyánépeecu mépáátanú, iikye eene ɨ́jtsámeííbyéré méwárɨ́hcóhíi, eene ɨ́jtsámeííbyéré cújuwa mécárútújcaáyó, mécárútújcaáyó áhduré tsijpi ej téjɨjtóríyé tsijpi téjɨjtóri íllu néénélliihyéne méécáánimú <<wip>> vápeecu méétáállemu meke úúballé teéne mellévanéjcuki úúballé teéne áánélliihye íñe méɨhdé múnaáne ténehjɨ íítyáhdimúne úúballémé eene íñe menécatsíhijcyádú tsahdúré n nééme ímí meékéévéjcatsí mewákímyeíki íñe ícyooca ámuuha meíjcyadu eéne étsihvu nɨjkéváné teene éée wañéhjɨ́ iibíí mɨɨvájɨ éhdunére
• Waveform view • Interlinear Glossed Text • Utterance view