Waveform view

6

Recording date	2005
Speaker age	70
Speaker sex	m
Text genre	traditional narrative
Extended corpus	no

Visualization: Text view Waveform view Interlinear Glossed Text Utterance view

Loading wave form: 0%

Speed: ⊖ 100% ⊕

Zoom: ⊖ 200 pps ⊕

Ceeseʔ hoo3itoo hi <<wip>> nonoʔeinoʔ hiʔin nihʔiisooʔ nih'ii3e'inou'u niine'eeno' hinono'eino' hi'iihi' nuhu' nii'eihiiho', nii'eihiiho' hinee; hii3e'inou'u. hiiyoo3tii3i', hiiyoo3tii3i'. toonhii3e'inou'u ~~niine'eeP~~ hi'iihi' niine'eeno' nuhu' nii'eihiiho', nih'ee3oobeeneetou'u, hookoh nih'ii3ooxuwuutee', hooxuwuutee'. teebe beebei'on 3eboosei3iihi' nih'ii3ooxuwuutee', niineʔeenoʔ nuhuʔ niiʔeihiihoʔ nihʔii <<wip>> coʔouu3iʔi nenee3iʔ woow niiseiht... kokoohowoo3i', niixookuunee3i' hi'iihi'. 'oh heeneisou'u, hi'in nonoo'oesei'oo'. 'oh heeneisiini nuhu' co'ouu3i'i nii'ehiiho'; wohei nih'ii3ooxuwuutee'. ~~ne'cebP~~ 3eboosei3iihi' neeyou nih'iisiine'etii3i' hinono'eino'. neeyou hinee hii3e', hiitiine'etii3i', 3ebniihiihi' hinee hoh'eni'. hi'in nenee'. ne'nih'iisoo'. he'ne'nih'iisiini. hoonoyoohootou'u. hinenitee heebehni'itowoo, toonheetniistoot hi'iihi' nuhu' nii'ehiiho'. wohei hehniiseiht, hehniiseiht hecoxonoh'oe, hehniiseihit hecoxonoh'oe, 'oh ne'nih'iini he3ebiinouuh hinee hoh'eni'. heʔihnoohobee hiit nihʔiit <<wip>> nohuuxoneeni3i hoxtoonou, nuhu' hoxtoono'uuni', nenee' siiyoniini'iini'; hinit ceniihi', nehe'nih'iitnohuuxo[nee]ni3i nuhu' nii'eihiiho. he'ihnoononoo'oonino. wohei hee3owouuhut. he'ihniiwoh'on ~~ne'eitP~~ niiyou nuhu' neeceenou, hitou. heʔihʔeʔ in heet <<wip>> niistoot heetcenenoot nuhu' nii'ehiiho, hecesii'ehiiho. wohei hee3[eb]no'usP, no'oxuuhetit, he3ebno'oxuuhetit heetoh'uni houu3ineni3i. 'oh niine'eeno' nuhu' nii'eihiiho' ne'noononoo'oo3i'. heʔihcihʔooxouʔoonino heʔih <<wip>> ʔoonoo3ii3ieʔneʔ he'ne'nih'oowkuu3eit hiisiiteneihok. wohei ~~hee3ebP~~.... niiyou nuhu' seenookuu nih'ii3i', niinii3ooteenit. he'ihtouku3ee hiit; ʔoh neʔ <<wip>> neiʔooceinoot 3ebhoowuuhuʔ ~~Heetneʔ~~ ʔoh hinee hee3ebhiʔtoʔowoot nuhʔuuʔ hitou ʔoh neʔnihʔiiʔcihʔi3kuutiini3i ʔoh neʔnihʔiiʔ <<wip>> 3eiʔeikuu3oot niisiyoo3ooneʔ huʔun niiʔeihiiho wohei ne'nih'iiscenenoot nii'ehiiho: ce'eiiyoo. wohei ce'eeckoohut. heniisiitenoot. co'oowuuhu', he3eboowuuhu', hinee ~~heetoh'uni~~ heetoh'ootee'. hee3nehnoʔeeckoohut ʔoh neʔniiʔ <<wip>> touku3oot wohei henei'towuunoot ~~nuh'uuno~~ beh'eihehiinen, nuhu' beh'eihoho, “heniisiiteno' ceese'. heniisiiteno' ceese'.” ne'niiseiht. “wohei ceesey heetne'ini...” wohei neʔ <<wip>> nestoobeit “yein: yeneintoowoohu3i' niine'eeno' nii'eihiiho'. woow ceesey niis nee'eestoon: ciibeh'oohnee'eestoo. ceebeh'oohnee'eestoo. neniiheneihi3i' niine'eeno' nii'eihiiho' nuhu' hitooxuwuutooninoo. nih'eesniihenP.... nee'ee3e'inowuno'. nono'oteihi3i'. heniiyooteihi3i'. Nenee3i' hoonoyoohootowuuneiitoonin, tohco'ouu3i'i. wohei hi3oowo'[o]!” nehe' hecexonoh'oe wonoone'ino'; hoowuuni ceh'e3tii: noh hee3[ n]ee..., noh noh siiʔinit wohei ne'ce'iseet. wohei ne'ce'iseet. wohei ne'ce'eini ce'noho'ouuhut; 3ebiihi'; ceniixootee'. ~~neʔoo3eb~~ ne'oo3ebP he3eb[h]oo3iisiini'. tesnohkuseiciseet. 3ebiihi'. woow ~~hee3no'P~~ hee3ebno'oxuuhetit heetoh'uni3i, nih'iitoh'uni. wohei ceese'. niisi'owoo' woow. woow neniisi'owoo' nee'eestoot. kooxheniisiini heniisiini ceʔ nihʔi3kuutiini3i ~~toh~~ tohuu toxuʔkoseini3i Nihʔiisiini neeʔeh3eiʔikuu3oot niisiyoo3oo touku3oot. wohei ne'ce'eini co'ookoote'einiihi', cihco'oowuuni. wohei ne'nih'iisce'no'eeckoohut. ne'hei'towuunoot nuhu' beh'eihehi', “ceese' nih'iisiiteno'.” “wohei nih'iinestoobeen, nih'iinestoobeen. woow niis nee'eestoon. hi3oowo'o! yein: yeneintoowoohu' nuhu' nih'eeneisoo'. niine'eeno nii'eihiiho ~~niihenP~~ niihenehei3itou'u. niihenehei3itou'u coowoh'oohnee'eestoo. heebeh'esiiniihet. heebeh'esiiniihet. hi3niisP nihciiceh'e3tiin.” niine'eeno' wonooni'i'oo3i'. oo3iʔ wohei hee3eb[h]oo3nooke', he3eb[h]oo3[n]ooke', kooxhe'ne'ce'noho'ou'ouhut 3ebiihi'. ce'3ooxowoonetit, 3ebiihi' hinee heetou' ceexoon ci' hiisiitenoot. wohei hi'in nenee'. neneesi'owoo'. ce'oowuuhu' ce'eeckoohut. woow neih'ini3i. woow ~~neih'iP~~ neeso, niisnee'eestoot. wohei hinit he'ne'[o]nouuhnestoobeit nuhu' beh'eihoho'. “coowoh'oohP... nehinee. nehinee. nehnee'eetox ceesey he'iistoonehk, wohei heebeh'esiiniihet. neene'eeno' nii'eihiiho' niiniihenehei3itou'u neneenit, toh'ooxuwuutee'. hoowuni'iini.” 'oh hookohuusiihi'. woow hookohuusiihi'. he'ne'P... heeneisiini heesi3ecoohok. heeneisiini: “nuhu' kookon nii'ehiiho'.” 'oh he'ne'ce'iseet. ce'noho'ouuhut. hiibeebeet nih'iistoot. he'ne'ce'nee'eestoot. 'oh he'ihce'noo3iitou'u nuhu' nii'eihiiho. wohei neih'iisiini hih'iisiiteneihok; wohoe'neih'iicih'oowkuu3eit. co'ouute'. beebei'on hii3e'. hoxtoonou'u'. ho'nookei'i, siiyoni'iiniini'. woow heniise'ino', woow yeneiniini, yeneiniini. woow heniisiini. nih'iicih'ohuwooni3i nuhu' nii'eihiiho. wohei he3ebnohoʔouuhut ceʔei ʔoh neʔceʔeihiʔ niisiiteneit. ceeniikuu3eihit wo'ei'i3ow teesi' ko'os niiyou nuhu' nohuuxone'. teesi' ko'os. 'oh nuhu' seenook, 'oh heenohoot. kooxkuutiit. noh huut co'ouute'. ~~Ne'P~~ ~~he3ebP~~ ce'no[ho]'uuhu' hiit hoowuuhu', 'oh ceniixootee'. 'oh niine'eeno' nii'eihiiho' nonoononoo'oo3i'. hiniisooninoo ne'eenentooni3i. wohei yein. woow nih'iisnee'eestoot. 'oh woow ceenenoot. wohei nuhu' toh'entoot hinit nohuuxone'. seniiyoniʔiiniʔ hinitini ~~3ee~~ 3enii3iʔiiniʔ wootii hiit nihʔiitoh niiʔeihiihoʔ neeʔeecxkoʔosiʔ wohei nih'iisinihiinoo, niine'eeno' nii'eihiiho', wo'ei3 nuhu' cese'ehiiho', heenei'isiihi' tihneseihiinoo'. he'ih'eeneti3ee. “hetcih'owouunoni'. neneeninee nii'eihiiho' cih'owouunoni'. noontoonoo nuhu' heestoonoo. woow hee'inowoo tohnontoonoo, tohuucihwoniini couʔutiinoo honoh <<wip>> nohuuxooninoo cou'ut[ii]noo. noontoonoo nih'ee3ooxuwuutee', noh neneeninee: 3owoukuutiinoo. wootii ~~toowo'otP~~, toowo'one3enee. wohei neneeninee nii'eihiiho', heetihcih'owouunoninee. heesinihii3einoo heetihceʔeʔ inoʔ heetniini coʔeeckoohunoo “wohei,” hee3eihok, “howoh'oe!” heetce'cesih'ohuni3i. hee'neh'eit 3iwoo. wohei ne'kokoh'u3ecoot. neʔhee3neeniini wootii nihʔeʔ inoʔ tohʔuni kookon kookon tohuuciineeʔeeneestootiiniʔ kookon tohciinee'eestootiini' hiisoho'. nee'eesce'no'uh'ohuni3i, hei'iiseeteinisi'. nookeʔehk tesnohkuseic neʔceʔnoʔuhʔohuni3i ʔoh neʔ neʔceʔeeneti3oot niiʔcihkoʔosineni3i niiʔeihiiho nooko3onini3i, wo'teenii'eihii. hee3oo'. woow neʔeeneti3oot heʔeitow ʔoh biʔcihʔowouunoni heetih'owouunoninee. heetniini ceʔnoʔeeckoohunoohok heet <<wip>> cihciinenouʔu heniisooninoo heniiʔehiibinoo heetihcih'owouunoninee.” “wohei,” hee3eihok nuhu' nii'ehiiho. “neneenin heetnowouunoneen. beebeet, beebeet hiisoho'uusiihi', beebeet hiisoho'uusiihi' heebeh'ini... ceebeh'iibii3i. hehniiseti', ceebeh'iibii3i hi'in; ~~neenihP~~. ceebeh'iibii3i. hooteyoo, hi'in nenee', ceebeh'iibii3i. heetnee'eesnestoobeen. bii3inehk 'oh heetcihce'no'useeno'. heetcihnoo3een. heetnee'inow, nee'eestoonehk. heetce'he'inoneen. wohei heetniiteheibeen.” heʔihcihʔiiton <<wip>> 3iʔokunino hiitoniihiʔ he'ihcih'iiton3i'okunino hiitoniihi'. nuhu' nii'ehiiho heetniiteheibeit. “wohei,” hee3eit, hee3eit nuhu' nii'eihiiho. “heetno'uusi'oon. heetnei'no'uusi'oon. heetcih'eeneiteihteenei'een. hetnei'iitiibi. heetnei'towuuneen ~~hetP~~ hetkohei'i. hetcih'iteihteenei'ee. hetcihkohei'i. heetnei'towuunP heetnii'ceno'oon, noowuceno'oon.” wohei heetnee'ee3eeneiteihteenoot. ??Andy??? “wohei woow,” hee3eihok. “ceno'oo!” he'ne'ceno'oot. 'oh ne'cesih'ohuni3i. nohkcesih'ohuni3i nuhu' 3eboowuuhu', ceniixootee', hoowuuhu' hoh'eni'. 3eboowuuhu'. “heetnei'towuuneen heetnii'koonookuhcehin. heetnei'towuuneen. honooyoo nehe' ~~neesP~~ heesinihii3een, heetcihnee'eestoon. ciini ʔoh heetniini ~~heet~~ heetneeʔinoneen nooxuwuheen.” wohei nenee'. wohei nee'eeneesoo' nuhu'. ceesih'ohuni3i, nih'iitiibit. hoo3owoowuuhu'. hee'ino' toh'e3eboowuuhu', hoowuh'ohuni3i. hoowuni'koonook toh'uni nestoobeit. wohei he3ebiihi' he'iicisiihi'. he'ihnoxowuuni neeheyeiniini hi3o'owuu' hinit. “Bi'koonookuhcehi!” hee3eihok. 'oh ~~ne'P~~ “heetne'ciiniitiibihcehin,” hee3eihok. “Koonookuhcehi, ciiniitiibi!” hee3eihok. Niinihi'koohuunoo'oot heeti3o'obee'. ne'cihxouuwuhcih'ohuni3i. too'useet. noohowoot. 3ebnoononoo'oo3i' 3ebiihi' ce'eihi'. beebei'on hinee heetiinoonoe'ti', hii3e' cebe'einiihi'. XXX wohei nenee'; noh hunee nih'iisnestoobeit: “hetciibii3i hini'iit,” nih'ii3i'. wohei nii'iini. nii'iine'etiit. nii'iine'etiit. niibiibii3ihit, 'oh beebeet ne'niisetini' hi'in hih'iinestoobeihiit. ~~nesP~~ ~~nei'P~~ nei'oonoyoohooto' nei'oonoyoohooto' nuhu' niiyou. noh hootohuuniihi', hi'in hootohuuniihi', hi'in nenee': kookon ~~noo'oeeP~~ heetoh'uni.... hetciibii3i'. hoowuusiini. 3iiyo'. he'ihcee3ibii3. 'oh woo3eenei'i hibiibii3[hiit], 'oh ne'nih'iiscee3iini bii3i'i, hini' hihbii3wooneiitono. neitoʔeinoʔ heiʔtowuunoot ceebehʔii <<wip>> cihʔoxowu neenin hiit heʔiisnontoonoo3i nuhuʔ benii3bee3iʔ wohei niiheyoo ~~hoow~~ ~~kookon~~ hoowP wohei ~~ne'no'xonP~~ hi'in hinit, tohcee3ibii3i' niiyou nuhu' ~~nihP~~ hihnestoobeihiit, hitooteyoo, 'oh ne'iini hee'ino' xonou nuhu' tohbii3i'. wootii ne'koonookunoo'oot. wootii ne'koonookunoo'oot. hitiini3ecoo wootii ne'iini hee'ino'. 'eiyo' wohei nih'iinestoobeet. woow heʔih <<wip>> bii3 “hotoobenoo.” wohei ~~heetP~~ heetnee'ino' heetniisoo'. heetnee'ino' heetniisoo' niiyou nuhu'. wohei ni'inon nihceestii3i'. heeneiseineewoot nuhuʔ niiʔehiiho heesinihii3eit nii'ehiiho' heesinihii3i'. heetniini ceestiit ni'inon. heet <<wip>> 3owoteekuutiinee niʔinon heetneenouun. heetneenouun heetniiʔceecesisooʔ 'oh huu3e' hihcebe' heetcih'iise'enou'uni',” hee3eihok nuhu' nii'ehiiho. wohei hinit tihneeʔeestoot Woow huu3eʔ cenihʔeʔ inowuni3i wohei ne'ei'towuunoot niine'eeno' hibii3wooneiitono: cihceesihe' noooxuneihii. niiyou hi'in ~~neneenei3eiP~~ neeyei3oonootee'. howohuuhu'. 'oh nuhu' niiyou ni'inon, 3oowohouhu' hinit. wohei hi'in neehei3ei'. wohei hiʔin neehei3eiʔ neeʔee3owoteneihiinooʔ nuhuʔ niʔinon heetniit <<wip>> 3iʔokut bebiisiihi'. he'ne'3i'okut niiyou. neeneise'enou'uheit. 'oh ne'ciiteit. wohei ne'noooxuneihii ne'ceesiheihit. 3ebnoo'oeenoonoooxuneet. nooh'ouwoot nenitee heetcihwonesooku'oo3i'. heetcihwone'inowuni3i, niiyou heetniisoo', heetniisoo' niiyou nii'eihiiho' hitooxuwuutooninoo. Hookoh ~~hee3ooxuwuuP~~ hee3ooxuwuutee'. wohei niine'eeno' ho3io'no': benii3bee3i' nuhu'; kookon niibii3bee3i'. 'oh woow, woow heniisooxo'oe3i', heetwoniini... heeneihoowuusii hooxoʔoe3iʔ hiʔin hih <<wip>> nestoobeihiit wohei ne'ceesiheit noooxuneihii. Ne'3ebnoonoooxuneet noo'oeeniihi' nuhu' neeyei3oo'. 3oowohouhu' nee'eetou' hi'in, ne'nih'eet3owoteneihit. ne'ciiteit ne'ciiteit, ne'3i'okut. he'ne'bisoo'eixootiini', beisiihi'. wonoo3ee': beexniiniicibxootiini'. ~~hoowuP~~ ~~hoowucei'P~~; hii'oxoneihiinoo'. beneexnestoohuutooni'. “wohei hoonoyoohobe' nii'ehiiho' he3ebiihi'!” niine'eehek nehe' noooxuneihii, he'ihnoonoooxunee. wohei hini' ~~wooxonP~~... ne'cesisneeheyei'oo'. hei'cesisneeheyei'oo' hinee, hohkonee ne'iini hiit honoh'oho' hiitoniihi' noo'oeeniihi': "cihwoneeneihkoxnowu' niiyou hi'in niiinon, heeneihkoxnowu'.” “heetnoohowoonee niine'eehek nehe' hinen. heetnoohowoonee, heetniisoo', nih'iiscee3toot. ~~nih'iiscee3P~~ cee3iixoneet hihnestoobeihiit. hi'in heeneisoo' ciinestouhu3i'.” wohei niine'eeno' neniteeno'. Nee'eeP hesoohootou'u ciisiniihiihi'. Hoowu3i'P hoowu'un cihtoo3xootiin. hini' heeneiseihkoxuni': wohei heeneiP heeneisoo' hini'iit ~~tohse3is~~ neʔ3iʔokut ho3es3i'okut. nonoohobeihit. nonoohobeihit. XXX ne'niitoneihi3i' nuhu' nii'eihiiho' hihcebe', cenihnoononoo'oo3i'. nihnoononoo'oo3i' nii'eihiiho' hehniisi3i'. cenih'oowuh'ohu3i'. Koxoʔuuhuʔ tihʔii noononooʔoo3iʔ koxoʔuuhuʔ teeceenebeit niine'eehek nehe' hinen. teeceenebeit. hee'inowuni3i heecxooyei'oot, heecxooyei'oot, heecxooyeisi'. wohei niine'eeno' nuhu' nii'eihiiho' XXX koxo'uuhu' 'oh nehe' hinen 3ii'okut. “Wohei woow,” hee3ebii3oot. nihcihneeheyeiniini, neeheyeinih'ohuni3i, neeheyeinih'ohuni3i hini' nii'eihiiho. 'oh niiyou hinee heet3i'okut. niiyou heet3i'okut nuhu'. he'ne'wootii xouu'oot. neniixohousi'. neniixohousi'. wootii tihxouu'oo'. neniixohousi'. ciitoowuu' hinit nee'eetoot. wohei hunit niiyou ceeeteese' nenee'. neniixohousi'. hoowunoohobeihiinoo. heetnookoo3iini, heetnookooteiht. hi'in nenee'. coo'ouute' hinee hihcebe' niiheneihi3i' nii'ehiiho'. beh'eihoho' hitooxuwuutooninoo, hi'iitooxuwuheihi3i' hi'iihi' nii'ehiiho'. yein: yeneintoowoohu'u, hi'in heeneisoo'. cebe'einiihi' 'oh ne'nestoonoo'. niine'eehek nehe' hinen tihnee'eestoot. cebe'ei'oo'. wohei neneenini' hi'3i'okuut. cenihnoo3eit nuhu' nii'ehiiho. wohei nuhu' tohniixohousi', niiyou wootii cihceeeteese'. wohei hei'woti'iini', koxo'woti'iini', niiyou tohwoti'P hini' wootii nih[i']woti'ini, 'oh nii'eihii nii'eihii 3ii'okut. heentoot. Hooxohoeneenit, neneenit nehe' honoh'oe, nii'ehiinit, nii'ehiinit hi'iihi'. wohei neene'eeno' nii'ehiiho' hihcebe' cenihniiniitouuhu3i'. hee'inoneit. 'oh woow niisnoo'oeekoyooxneihiinoo'. Niiyou nuhu' ne'kooniitee' hiisoho', bisiihi'. he'ne'niixoo ne'niitouuhut nii'eihiiniihi'. woow nii'ehiinit. heʔneʔ <<wip>> koxoʔuseet heʔneʔ <<wip>> koxoʔnouucenoʔoot hini' hee3ebiiskoxo'useet, woti'iseet nuhu' niiinone'. he'ne'nihi'koohuuheit. cesisih'ohut. he'ihcesisih'o hohkonee 3ebiisiihi'. ne'noononoo'oo3i' noo'oeeniihi'. bohooku'ootiini'. 3ebnoononooP hinee hii3e' hoo3oo'o' co'ouu3i'i. ne'cihwonnouxoneit. Cihwonnouxoneit ~~nuhu~~' hehniisini3i. co'ouu3i'i. woow. hini' heihii hee3ebeetowoot. kookon ne'eini hehneh'i3i' woow. ne'noononoo'oo3i' 3ebceniiP ceniiP, beebei'on 3ebiihi' hihcebe', honoot hoowoohnoohobeihino', 3ebcebiihi' heetiinoonoe'ti'; XXX wohei nenee'. nehe' hinen nii'ehiinit cih'ii3iihi' niiyou nuhu' hih'iinestoobeihiit. yein: nee'ei'toowooheihit, tihceneneihi3i' nii'eihiiho': yein. wohei tih neʔcebeʔei neʔ <<wip>> ciineeʔeestoot ʔoh ~~neeʔ~~ neeʔee3 neʔooxuwuuteeʔ 'oh ne'nih'iisiini nii'ehiinit, hi'iihi' tihnontoot, cebe'eitoot. hi'in nenee' neniteeno'. nehe' hecoxonoh'oe, 'oh ne'nii'ehiinit. niiyeintoowoohu'. cei3iihiʔ cenihʔeʔ inowoo niiyou hoo3itoono yein heenoo heenoo yeintoowoohu' nuhu' nii'eihiiho' tihceneneihi3i'. yein: cebe'einiihi' 'oh ne'nestoonoo3oo'. 'oh niine'eehek nehe' hinen tih'e3ebnii'ehiinit. he'iisce'niitouuhut. 'oh hi'in nenee'. Neeʔee3ooxuwuuteeʔ Neʔnihʔiiseʔinonouʔu Neʔnihʔiiseʔinonouʔu nuhuʔ hinonoʔeinoʔ Arapaho Way hi'in nenee'. Hinonoʔeinoʔ niistoowoohuut niiʔehiiho nenee3iʔ hiixoohoo3ihei3iʔ Hee3neeniihiʔ nuhuʔ niiʔehiihoʔ tohneeʔeesiitiʔ 3ebiiteneit nuhuʔ niiʔehiiho tihceecebeʔeitoot Hoowu'unceecebe'eitootiin heeyouhuu. Howoo heeneesbeteentoo3i': Hoowu'un cebe'eitootiin. Yein. Nee'eesoo' hee3ooxuwuheihit. Woow hi'in nenee'. Ne'nih'ii3ooxuwuheihi3i' niine'eeno' hinono'eino' hi'iihi' nii'ehiiho', Nii'ehiiho' toh'ookonoonP hookonooneenowoo3i', tihco'ouu3i'i. Nenee3i' wootii nihnoohootou'u XXX Beebei'on tihnoohootou'u heeyouhuu. he'ne'nih'iisiini. Nee'eesiixoneihi3i'. Heeneixoneihi3i' nuhu' nono'eino'. Nihbiinei3i' nuhu' heeneisooni', toh'ooxuwuutee'. Yeintoowooheihiinoo' niine'eeno' nii'ehiiho': yein, tohuubi'P... Nee'ei'toowoohut, hi'in tihceneneihi3i'. 'oh niine'eehek nehe' honoh'oe, hecexonoh'oe, cebe'ei'oo', ne'cebe'eiP... toh'uni, hoowuni'no'o3ikowuutoneihiinoo, hoowu'un. Nono'oteihi3i' nii'ehiiho', wo'ei3 niiyou heenee3ooxuwuuP hitooxuwuutooninoo. howoo nosouniihi', nosouniihi'. Hi'in nenee' hoo3itoo XXX nii'ehiiho', 'ou'uu, nenee3i', toh'uni, toh'entootou'u niithoh'oeni'iini', Nee'eetco'ouu3ei'i, Ne'niitoh'uune'etii3i', hoh'oeniini nii'ehiiho'. 'oh nee'eesoo' niiyou nuhu' hoo3itoo. hinenitee heetnii3oowoto'. hi'in(??) heetnei'towuuneihit nehe' nono'ei, heetniisii3oowoto'; nenitee heesinihii3eihi3i' nuhu', heesiini nestoobeihi3i', heetniiten. Hi3oobeeneeto' nenee' heeyouhuu Noh nenee' heetneeneisinihii3eihi3i'. ~~heetniiP~~ 'oh Hi3oobeeneeto'ohk, heetnii3oowoto'. Hinenitee neeʔeestoohok heinoosit tebenoheikonihetit neeyou neeyou hiineʔetiit Beeheentou' nee'eesii3oobee'. Tohuuciinentooyei3i' nenitee, ~~3owo3P~~ nihii, 3owo3neniteeno', nuhu' beh'eihoho' tihxo'owuu3i', tihceceeco'oheihiinoo'. nee'eeneesinihiinoo3i, tihceceeco'oheihi3i', toh'etnii3oobei3i'. Kookon tohuuciinihiitooni', wo'ei3 kookon tih'iiciinee'eestootiini'. hi'in nenee'. niine'eehek nehe' honoh'oe, ciineyei neʔe3ebhoo <<wip>> konoonneeʔeeneestoot Hi'in nenee': nestoonoo' kookon..., tih'iihookonoonee'eeneestootiini'. “Konoo'heetnee'eestoonoo, konoo' heeneisiini heeneistiinoo.” Ne'nestoonoo'. “konoo'heetnee'eestoonoo.” Heebehnoono'o3ikobee, 'oh hoowuuni. Neestoonoo'. “Nonoonoko'.” 3iwoo! ne'nii'nee'eesoo'. niito' nehyihoo nebesiibehe', neiteh'eiho', nebeh'eihowo'. 3iwoo, nehnottonoono'. Heetnei'towuune3en heetniitbebiisnee'eestoon, wo'ei3 heetniisbebiisitoono'. Heentou' heetniitbebiisiini, nuhu' heeneestoon.” 'oh niine'eehek nehe' honoh'oe, hoowuneyeinee'eestoo. Kookon siixonouu ceeceeseihiinee'eeneestoot. Hoowuuni, hoowuno'o3ikowuutoneihiinoo heeneisiini. Coo'ouutei'i: ne'nih'eeneitohP heeneisiine'etiitooni'. Hinee nii'ehiiho', beh'eihoho', niiyou woxu'uuwuno, hii3e'inou'u, toonhii3eʔinouʔu cenihʔii3iihiʔ neeʔee3eʔinouʔu beebeiʔon 3ebcenoosei3iihiʔ neʔnihʔiiteeʔ nuhuʔ Niinee'eesnestooP, nestoobeihi3i' nenitee, “cooboh'oohnee'eeP.” Yein: yeneintoowooheihiinoo' niiyou hu'un nii'ehiiho', tihceneneihi3i'. wohei niine'eehek nehe' honoh'oe, hecexonoh'oe, nihcebe'eitoot, hinee, hi'in nee'eentou'u. Hiʔin neneeʔ neʔnihʔiis <<wip>> niiʔehiinit Nihcih'e'inoneit hinee nii'ehiiho, Hini' hihcih'ookoo3eiitono. Hini' nih'iisooneet, neneeni3i, cihce'noo3eit. Hini' hihnestoobeihiit. Cihce'noo3eit. Woow hee3[e']eiht. Hi'in nenee' koee. Woow hi'in nenee': heeneisoo' nenitee. Toonheesinihii3eit, heetnii3oowu3ecoot. ~~Heetnii3oowP~~ heetniiP hi3oowuuhu', heetniiP hi3oobeeneeto': heeneesinihiitoʔ nuhuʔ nonoʔeiteen hiineʔetiit tohʔuni tohʔoonookonoontoo3iʔ Heetoh'oonookonoontootiini', XXX nenee' Hookonooniini ~~nenee~~'.... Nenitee tihnee'eeneesiini, bebiisiihi'. Hoowu'uncebihcehiitooni Hoowu'untowo'oneihiinoo heeyouhuu hiisoho', niisceecebihcehi3i' hiiwoonhehe'. Neestoonoo'. Nenee' niiyou nuhu' hoo3itoo. nenitee heetnii3oowoto'. Heetniiteno'. Hiisoho' nenitee 3owo3nenitee, hiteno'ohk heeyouhuu, nohʔoonounowoot Wohei ko'P, hi'in nenee'. hii3oobee'. Xonouuwootee'. Ne'nih'iisinihii3i', “xonouuwootee' nuhu' hee3ebno'ootee'.” Hini' heetoh'uni 3i'ookuu', ceese' niiinon, tihciitootiini', Nee'eesno'oxuuhetiitooni'. Ne'ii3iixohowootiini' hinee heeyouhuu. ??Andy? Nee'eesoo' hi'in hoo3itoo. Nono'eino', nenee3i' nihbiineihi3i', nono'eino'. Beebei'on neeyou nih'iitiine'etii3i' hinee hii3e'. hii3e' ~~beexnoowo'eiP~~ noowuuhu', noobe'einiihi', hinee ceese', hinee biito'owu'. Hee'inowoo heetou'u. Noonoohootowoo. Noonoohootowoo hi'in heeneisoo'. Co'ouutei'i hi'in hoh'enii. “3eniixobee',” hi'in nenee'. He'ne'ni'iitou'u. Ne'nih'iisiine'etiit nehe' hinen, nii'ehiinit, tihcee3ibii3i' hi'in hihnestoobeihiit. Nenee'. 'oh ne'hiisoo'. Hoowoohno'o3ikowuutoneihiinoo, hinee hee3ooxuwuheihiinoo' heeyouhuu. Beh'eihehi' heeneestoot, heeneesnii3nowoo3i' 3owo3nono'ei. beyoowu' heeneisiini, wo'ei3 hoowuuhiinikotiitoon. Hoowentou'. Honoo HonooXXX Nihniihenooxuwuutei'i. Hinenitee hoowoonooxuwutii. Howoo neihoowuni'ooxuwutii. Nihniihenooxuwuutei'i. Heentou'u. Ceese' nenitee ~~hoowP~~ ~~hoownoowooP~~, hoownooxuwutii. Heentou'u hooxuwuut. Noh hi'in nenei'i. Hiitenee Bebiisinihiit, bebiistootiini'. kookon noonokoontootiini', hoowuuhu'. Hoowuneen. ʔoh niineʔeehek neheʔ hinen noonokoontoot Woow ~~neʔ~~ neʔcihnoo3eit niiʔehiiho Ne'niixoohootP nenee'. Hi3oowu3ecoo'. Hi3oowu3ecoo', hi'in nenee' Nih'iisciinestouhut Hookoh nenee'. Nihʔiiscii <<wip>> ii3oowotoʔ Nihbii3woonit, noh nihcee3ibii3i'. ~~Nenee~~' cih'e'inowuni3i. Wohei ~~ne'P~~ ne'nii'ehiinit. Hi'in nenee'. wohei niiyou nenee', nono'einoo3itoo, nono'einoo3itoo. Niine'eehek hi'in. Hii3oobee'. Neeyou beebei'on hii3e' nih'iitiine'etii3i' teecxo' nono'eino'. 3ebiihi' heetoh'eenentou'u hinee hii3e'. Hee'inowoo. Noonoohootowoo, heetiine'etii3i' nono'eino' hee3neeniihi' hiyeih'inoo. hiyeih'inoo hee3neeniihi'. 'oh nih'iisnoxooteihi3i' nih'oo3oo, huut nihceiteso'oneihit. 'oh nono'eino' hiyeih'inoo neeyou hii3e', noosounee'eesih'iinou'u hii3e'. Arapaho. Wohei nohuusoho'. Heetihceh'e3tiinee, heetih'ei'nowunee, hoonoo3itoonetinee, hetei'yooniibinoo, heisiehehinoo, nih'oonoo3iteeP. hii3eti' nuhu' hoo3itoo. Xonouubei'i. Xonouubei'i. Xonouubei'i. Hoowunentoo[yei]. Behʔeihohoʔ tihciinentoo tohuuxoʔowuu3iʔ woxuʔuuwo Hoowunentooyeinoʔ Kookon hiihoowucesisinihiino'. Kookon hiihoowunee'eesoo niiyou nih'iit. ʔoh beexoʔhooxuwuheihiinooʔ niistoowoo hiisohoʔ Tohʔuuceceecoʔoheihiinooʔ heeyouhuu bebiisiihiʔ ~~Heʔneʔnihʔii~~ neʔnihʔii3ee3iʔoku3iʔ behʔeihohoʔ hiit nihʔiinottoneihi3iʔ neneeʔ Hiineʔetiit tohuuceece3eiʔoonooʔ woʔei3 niitcihbiseet ʔoh niiyoo noʔuseet hiisohoʔ wootii Hi'in nenee'. Hiine'etiit bebiisiihi'. Ho3o'uusoo hinee. Neneenit nihnotnoohobeihit ci'. Neneeʔ niiʔehiihoʔ Nonoohowooneiʔi niiʔeihiiho heetihʔeeneikokohʔoeneetowunee Heebeh'iineen. Nee'eeteihi3i' nii'ehiiho', hinee hii3e'. Hii3eʔ cooʔouu3iʔi Hiit hiinoohowoonee cooʔouu3iʔi niiʔehiihoʔ Hiʔin neneeʔ Niiniitouutouʔu Ceniibiikoo ceniibiikoo hiniʔ niixoo niicihʔoowuʔohu3iʔ Heʔneʔniiʔiitenouʔu nuhuʔ nec Niiciinoxoonoʔ koo'oeniihi'. Nee'eesinihiinoo. wohei nohuusoho', nee'eeneesinihiinoo. Nee'eeneeP niiyou nuhu' hoo3itoo. Nii'ehiiho'. Heetihneyeihoonoo3itooneti'[nee]. Hitenowunee. Ceh'e3tiinee. Heetihceh'e3tiinee. Heetihnenee'. Heetihnee'eeneetowunee. Hi'in nenee'.

Edit utterance

Text view • Interlinear Glossed Text • Utterance view • Help