Waveform view

T24

Recording date	2008
Speaker age	70
Speaker sex	m
Text genre	traditional narrative
Extended corpus	no

Visualization: Text view Waveform view Interlinear Glossed Text Utterance view

Loading wave form: 0%

Speed: ⊖ 100% ⊕

Zoom: ⊖ 200 pps ⊕

mmetokowyore veno Pancha eno no tparaakono te pjoka kavildo ʔkonewoko najinarichʔo no tkomerina ʔmuiimuri trinranono ʔeno tparaakono wichʔo koregieroru najicha wichʔo koregieroru najicha wichʔo koregieroru najicha kasikerichʔo ʔema tparaako máxima autoridad ante no no decían corregidor todavía juiti eto ʔkonewoko ʔmuiimuirichʔo trinranono te pjoka ʔwósare Trinra ema ma tparaakooʔi naejarechrichʔo kasike ema ʔchope to matuparaʔo ema techo to ʔwósare ene kope te to tepenomporipo eno ʔchosgieñono tparaakono naetswochpo nanokpo koregieroru najichpo ema ʔchopetuparaʔo ema techo to ʔwósare najinarichʔo ʔaakarena najinarichʔo prefektina emarichʔo emarichʔo techo ʔema tkijare koregieroopo manokpo koregieroopo emapo techo to ʔwósare muecho eto to tparaapikre emjaaʔi ema manopoko ʔema koregieroru ma kapitán grande primer kasike segundo kasike tercer kasike ene tyompo ema primer alcade ema primer alcade bueno manjeʔe vechoyorechoʔo asike eno moponano eno ʔchopetuparaʔo moponano ʔema kapitan grande ~~kon~~ <<on>ka> koregieroru tyompo ma kasike eno moponano eno techo to ꞌwósare pero ma techoponrijcha naeyaraʔo eno tparaakono ema koregieroru muéjare ʔem porke ema techo ema to tajpuka to techokore tyaneʔipo to piesta tyaneʔipo to piesta ema koregieroru makuumutkopo eno tparaakono makutgieñono makuumutko tkechosiyre tyaneʔipo to piesta Eno to tyáneʔipo to piesta tsetsekwonripo nanokyore to najakpiʔyore ʔeno ʔchañono no wsitano visitante ene vjicho Eno tepiarekono to ʔrésare ʔrésare naesrisʔo naescho to ʔrésare te tyuumutompo titekpopo to piesta Ene to to to ʔmuʔpo ʔeto to piesta tyononñore katolikowko eno ʔchañono trinranono tyonono te ʔlesia tsammorikono tyosiuchwono mue ʔma viya pues tajina nakuggiowo tajna takuggiowo to ʔwósare n nayosioko namutu ene nayosserikpo te to tsiopompo te ʔlesia nayosiokpo ʔema viya eterno padre o o viya Jesús mue Jesukristo mayosiokpo nayosiokpo te to manjeʔe wo makemtiskowokovi makuʔevirechovi ema viya muejrokawrichjicha to wnikgiene manjeʔe muemʔavi wo wkukjuma wakjumapuka mavinavi to vijuma jicho ʔema wkosiña ema ma viya ene wkosiñapo esu veno María Santísima mueno ema Jesu Jesukristo te ~~tʔyonom~~ aa te to ʔlesia eno tparaakono ti manjeʔe tjirompo nanokpo to to naetkogne tyujrokono nayosioko ʔema ma viya pues wo na tajna wkuggiowo tajna takuggiowo to ʔwósare eto muemtone eto naemtone eno tparaakono tyosiuchoviono pochpo to misa pochpo to misa tyuchkompo eno tparaakono tkopnuneʔomporipo ma violinista kajero wombero eno eno ʔene ʔenopo no chriperono noni tiimuikono eno ʔeno tnokono to piesta te to viowsa no chriperono tyompo no toritono ene tyompo no venono eno venono asike viuchkopo te to ʔlesia viutekpo te to vyeʔe kavildo vyeʔe ʔlesia viti vitekpopo waayujrokojnochʔo majicho ʔema rotrineru ʔenjo rotrinerono tʔyuj vyujrokpo pueschu eto toona to vitorisra ma viya majpanovi masamavi te to muewtuyechavi te tasimtuwo mpachijigñono Eno ʔapostoriono ʔenjowkooʔi imʔa manokriʔi ema ma viya ema te to tyonyorepo te to anumo manokjegneꞌwo eno apostoriono eno tparaakono ntose apostore eto naemtone ʔeno timitrikonñore to muechjiriiwo ʔema ma viya wo ʔetina nakemotonejire to mpachijigne ʔpomririchu ʔeno no tayeʔono te to no najúpara ʔema koregieroru eno techono to tasimtuwono tajpuka eto Ema ma apostore woʔi ema ~~tim~~ manjeʔe timyujrokovi vyujroko puejchu toona to vitorisra ma viya we muejrokawrichu to vnikgiene muejrokavi to muejrokavi to makitorigiavichoʔo Ema ma viya mawoyko máriwo etochus takomnu eto te to vechjigia ema ma viya ma viya tamutu mawʔo viowʔa te to ʔviʔku ʔema ma viya tsamovi te to vechjigia ma viya ema ma viya mawoyko máriwo temnakovi ymutu ʔchañono viti tposraarujono majichriʔi ʔema ma viya eto to vechjiriiwo ʔponapooʔi ʔponapooʔi pero ymutu machichanovewokovi ma viya schichanovewokovi esu veno María santísima asike ʔeto eto wkemtone Te to pochpo to misa teneʔorikpo ema koregieroru mueneʔopo ʔeno ʔchañono te to manjeʔe nasopa ʔema koregieroru naso pa ʔema nasopa ema ene puejchu eto tyuuna to vitorisrayre jicho teneꞌowokowriꞌi ema ma koregieroru Ene te to pochpo to manjeꞌe teneꞌoriko namutu teneꞌoriko ꞌpuesapooꞌi ꞌpuesapooꞌi to naetkogñono eto ~~muem~~ eto muemtone ema koregieroru tjañokovi kutiriʔi tajicho juiti juiti wkoyʔepo ʔema ma ʔkonewoko majinarichʔo ma prefecto majinarichʔo Alcalde m majinarichʔo ema Presidente ema tyómowo presidente ʔema koregieroru nayeʔe no trinranono eno ema techo to ʔwósare tajpuka to tajichwo Te to taegnepo to piesta etjooʔi to ʔponayore piesta bueno tatanoviono ʔchochu vianeʔiyrepo pjoka ʔpona piesta ʔtumewokʔena ʔtumewokovina vijakpawre ʔema ma viya muetekpirayore pjoka taetekpirayore ʔeto muejaremʔi ma viya manjeʔe vijakpawre vepiakatchawore to ʔrésare vijakpiʔa no wkutgieñono viatnoviono viyanoviono makepo ʔema koregieroru takeeʔi ema ma ʔchane nasopo ma koregieroru jicho muéneʔo no ʔchañono namutu muéneʔo asike te tyuri tatanoviono tyuri rusrupaya tata makepo ʔem makeeʔi ema juiti vittorojchichapo viosʔo te to ʔlesia juiti etjooʔina to tnikkore jeeʔe eno komisariono ma aakare tepiareko to tepiarekono to charu ~~cha~~ charuji manjeʔe to tenrikono naenko no ʔchañono jicho vyereriʔi te to ʔlesia ypuemmawo ʔtuprigi sache ypuemmawo te ʔchope piesta ypuemmawo to ʔtuprigi sache viutekp vekʔoripo vetarakripo nakeeʔi eno to ma koregieroru makowoniipo tkepia to ʔrésare te pochpo to yjórare to misa bueno mawonikpo ʔeno komisariono ma aakare bueno esrigia tatanoviono namtu wo akanuko namtu ʔescha enetse ~~vero~~ veropotsero vnikpo ene viimuikpo eno tkopnuñompo ʔema tkopnunepo eno no muskono nowo tkopnuñono viuusamreyrepo jicho viosʔopo te to ʔlesia ene manjeʔe vi vi tiimuikompo no venono enopo tparaakono en natiwo tiimuikono en te titomuupo ʔeno no ʔchosiono tiimuikono tnaekchowompo ʔeno chriperono enopo nojwopo tiimuikompo tiimuikono mopona moponapuka piesa to n to n naeemuikriʔi ʔeno tichikompo nojwopo ʔeno wakamirono vjicho nojwopo eno tiimuikonwore nomuire tyuusamre jicho ma viya vechjikripo ene ema ma viya tjapanuwokovi timʔowokovi muemʔo to wsamre ema ma viya jicho tajna wakyemo tyuuna to yponreru to vyosiosra ma viya jicho vyosiookooʔi te to ʔlesia vyosiookooʔi to viuriwina tajna wkuggiowo ta wo wkukjuma makitorigiavichʔo ʔema ma viya puejchu ʔponenawore ʔañu wkopayakawore to muejaremʔi ema ma viya ʔtumewokovinarichʔo vityjooʔinarichʔo pero te to ʔorapo ma viya tajnapo vjicheni ema te to tichorigiaapo ema ma viya mawroʔpo tyomavi te to mapeno te to ʔanumo ene vyonñore wo wapikoyre to vepenira vyonñore jicho vichoriksipo mue ʔma viya tkepiarovi asike eto eto muemtone ʔema ma ma koregieroru ema eto muemtone ema jicho teneʔowokowriʔi vechjikyore to tasimtuwo torigieñono viuusamrepo te to titomuupo eto wnikpo ymutu viimuikpo tiimuikompo namutu viuusamrepo ene to ʔchope piesta piʔa mopona sache mopona sache to piesta ene to mo <<wip>> ponawore te manjeʔe tkokajánepo to manokpo to taemotyora to naamutu no ʔchane tkokajánepo jicho vyonñorewore te to misa Emarichu ema koregieroru eno asike eto eto taemtonerepi muemtonerepi ʔema koregieroru ʔeto m muemtone majáñoko eto mayeʔe kavildo pueschu eto titotijwo manjeʔe wo oypuka to takyemo woʔwore wasemmuikyore jicho ʔemja ma koregieroru ma koregieroru enjooʔi to tkowoorosiompo terompo to awariente tkowoorosiompo nawooʔopo tsemmuigiano enjooʔi no komisariono mawoniko akówaka akejaka tejakompo eno ko nakowʔogñono teron to awariente Ene nasopo ema koregieroru eto emjaaꞌi ma Eto takoyʔe veno Panchita ema ema koregieroru nae ʔno trinranono najinarichʔo kopeni ʔeto ene juiti u vkoyʔepo ma prefecto vkoyʔepo ma alcalde pero eto kavildo ʔchosgiene te naechmoopo pjoka ʔpogʔe ʔmuiimuri trinranono ʔeno tnaekchono nanokchichapo to ʔlesia naepiakriʔi to to ʔlesia nayeʔe no powriono trinranono jicho katolikowko majichriʔi ma viya Ene tájina wo naetka tyajrigiano pero te to nachuti narchogiereko ma viya et nanokyore to nayeʔeyo ʔlesia eto ꞌlesia nanaekchotchapo te pjoka te to tanaékupo nanaekchopo eto to ʔlesiayore tepiarekompo to ʔrove wo rawriyina ʔrove nasekpueko to móteji nanokpo to ʔune en nanokpo to muiji noktayajikpo ene naepiakpo eto etjo to tayeʔe molde eto to ʔrove ʔchope eto to ʔrove apipewoʔu eto tayeʔeyo to ʔlesia Ene te to ʔnugʔepo eto unos dos metros trejmetropo to tángiewo eto to pjoka ʔlesia eno pnoni ʔoʔiono te pjoka kogiure tsemompo wo norigia takepripo eto tektikwo jicho eto tjimyarichʔo to naepiaru to to yuchmo tjoovekpo tgiipo taesorijkopo eto to to to yuchmo to ʔlesiayore En te taegnepo eno viyanoviono tkuumutkokonwore naveʔworepo eto to nayeʔono ʔrove nanokworepo naepsakworepo ʔune naepiakchichawore to rawriyu wo takinajiiwono wo tasemono mopoʔe ʔeto naesorijkooʔi eto to to ʔlesia ene ʔmuíriji nagpueko ʔeno ʔoʔiono oʔe pnoni tyowʔono te ʔune te te to kogiure ʔchañono nomuire to mopoʔegiene to naesorijkooʔi tsemopo ʔema koregieroru tyurina juiti vyonñore vechjirikwoyre nae pnokro wkutgiene ʔchañono ʔoʔiono atanka to saware ajatpaka to saware saware pjoka maso najat ~~najat~~ najatpakpo namutu ʔeno ʔchañono tyonono te pjuena kogiure tpuikono nokpoyre ʔeno ʔoʔiono tayeʔe jeʔchuraʔi to tyonompo ʔeno tyomono to saware ene tyompo to to nayeʔeriʔi papeliño ʔeno eno vjañonono kopeni tajinarichʔo ma papeliño etorichʔo to ʔmuʔji te sponi nanokpo eto naepiako to saware nasapkoyre titekpompo eto tyaneʔipo te to kogiure tyuchkompo eno ʔchañono te tayeʔe to kogiure tyuchkompo ene ~~nokpoow~~ tyokpookuʔkokompo naechjikpo bueno ejamikpo tatanoviono ejamikpo memeno bueno ʔmuiimuri ʔjiron ejamikpo tatanoviono najichkokpo eno sien eno trinranono ene eno sienwore eno no oꞌiono ene vechjirikwoyre timiutekowriʔi vechjirikwoyre ayeʔe <<on>aa> tyuri vejapuegia tejapuekompo te to ʔpogʔe tejapuekono ene ʔáyroka to saware majichpo ʔema ma koregieroru eno komisariono tyayrorikompo to saware ayustaka imsapiigia pno viyanoviono namutu techjirikwompo ʔeno eno trinranono ene na nayeʔe no oʔiono techjirikwompo timiutekowriʔi tatanoviono emjaaʔi ma naeyaraʔoriʔi ʔeno ʔoʔiono eno trinranono ʔemja ma naeyaraʔoriʔi ema tkíjare koregieroru techjirikwompo techjirikwompo ywooʔo to akatajigiavi isopavi vepiakyore to ʔlesia te pjoka viowsa Trinidad mawsa ma santísima Trinidad majichpo najichpo eno ene ʔeno jaʔá tyuri pero a asapiikommatsero towinan tsapiikompo namutu ene no trinranono naetko to tsapiikono namutu tsapiikono asta no oʔiono tsapiikompo eno ʔoʔiono komo wo naetkognena to tsapiigiano eno to tyerepo to nasapiisira tkowʔompo tesorijkowompo timokompo eno ʔoʔiono timokompo namutu ʔeno ʔoʔiono timokompo ene ʔeno no trinranono jicho eno naetnagneeʔi to tsapiikono eno wo timkanriʔi eno tsapiikonrichjicha no eno oʔiono timokonripo etonapka ʔora enosamini to timokonriʔi tkowʔono tajicho to saware ene te to tejamikompo ʔeno ʔoʔiono tpikokwompo tpikokwompo nakepo <<on>aa> pnoñono titpaajiʔono pnoñono piʔa tekowʔochovionriʔi tyuri vyanarine vioma te pjuena vyeʔe ʔwósare vioma venchekcha pjoka pjoka tsipugiéresi vjicho bueno juiti venchekchoʔeyorepo pjoka aketsponoʔiiyore eti kristianono yomyore jmani apina tsipugiéresi vijarecho vit ~~naenchech~~ nakosiopo te to kogiure tajina wo unena kutchujchaeji ʔyoru nakosiopo techjirikwompo naemʔo no ʔchañono ʔwósare pjoka kogiure bueno pochpo naenchekchopo tyuri bueno epiaka tapuemmaapo naesoppo naepiakpo to ʔlesia tyuripo tajna wipo naesorijgia manjeʔe tyuripo naepiakpo to ꞌlesia ʔroverichʔo to ʔresia kopeni te to ʔkonewoko pjoka ʔlesia ʔrove bueno rusrupaya tamutpo naenchekchopo nompo te to najiʔu eto tsipugiéresi tjitakore ʔchoperiʔi pjoro towrare to aguabendita ene tyuripo to nakemtonewooꞌi ema eno ʔchaño najinarichʔo no tkomerina ʔmuiimuri trinranono te naepiakchichapo pjoka eto nowsa ʔeno ʔetopripo ʔeto tkijare kavildo takeeʔi ʔeno ʔchañono to kavildo naecho to takoyemgiene takeeʔi natsiiʔo natsiiʔo wo naemponnojgia juiti eno ʔchañono viúripo vechemchokkopo tsiopompo no tkomeriono namutpo tyuripo pero ʔeno tkoyʔono ʔeno trinranono pjoka ʔwósare takeeʔi veno Pancha juiti rusrupaya juiti manjeʔe to piutekriʔi pimorikriʔi en takoʔe nomuire nwooꞌo nñonñore te to piowsa nwachrijnoyre to elikoptero ~~neʔ~~ manjeʔeyo nomʔowyore rusrupaya tata aa tyuri meme

Edit utterance

Text view • Interlinear Glossed Text • Utterance view • Help