Text view

T09

Recording date2006
Speaker age60
Speaker sexm
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
tyuri meme , meme ... meme njañono tkowsa te pjoka ꞌpogꞌe . nuti nkíjare Pransisku Guaji Noe sapijane su meme nuti nkowsa te to tkíjare Sarorenso te pjuena ꞌwósare Sarorenso ꞌchiꞌchu ene mawriko ma tata , ene ( mawriko m- ...) sowriko su meme , ene mawriko ma nochko , su notse , namutu , no njañonono . ene nuti , eto nuchkooꞌi to añu , te año 1936 te kwatru te octubre eto nutsira , eto nijaremꞌi eto to añu , eto nutsira . ene ene nutsiꞌo te pjuena Sarorenso , eto nowsa . takeptsero nkarawoꞌpo , nutekpo te pjoka ꞌwósare Trinra , viowsa viti trinranono ; nutekpo te pjoka pjoñgi añumuꞌini te ꞌchopepo une te pjoka Trinra , pjoñgi añu tkijareeꞌi trenteisey , mil noveciento treinteisey , mrákapo , ꞌchopepo une ene ma tata timyonnupo te to ..., nchoopo te to nowsa , nowsa tkijare Sarorenso . nitekpopo tayeꞌe , ema ma nñeꞌe padrinoriꞌi tkijareeꞌi viya Sesilio Noe , ema tkootoknupo te pjuena Sarorenso . ene tnoknupo ( ma ) naeꞌ no paꞌiono , mue ma viya paꞌi , tkíjare Padre Francisco Valea de la Cruz , eto muejareeꞌi ema viya paꞌi . ema tetpirikriꞌi pjuena viowsa Sarorenso . takeptsero te ꞌchopenupo , njuukopripo , nkoyꞌepo diesiocho año , nñompo te to nñeꞌe servicio militar to nñeꞌe destino en te San Joaquim , te río Yacuma to año sinkuenta y sinko nuchkuꞌpo , nchoopo te pjoka Trinra nnospo . te pjoka Trinra nnospo nitkoopo esu su ... ( sonrió ) esu su ... [ la gravacion fue cortada aq uí ] nuchkuꞌpo eto to añu , te el año mil novesiento sinkuentaisinko , nuchkuꞌpo , nnospo te pjoka Trinra , nnospo te pjoka Trinra . nñompo nkemtonnekpo te to mpuiirisꞌooꞌi ene te to mpuiirisꞌooꞌi nnosimuijgieneripo to nkarawoꞌu to nkopnune to yórino ene nitkooꞌi to nepiako ene nimpuiiriko to nepiaresra ene ... eto jmani juitjicha ... pjoka añu , te to nechpeepo juitjicha tatanoviono nitotijworichu ene tamutu nkarawoꞌu jmani tkarawoꞌkoriono , nitko to muskonu , nitko to ( rotrine ) rotrineenu , nitkowre ( too ), to , ( too , aa- ) vꞌanimárapi , nkarawoꞌu te to manejo , to tamanejachrawo , eto to sagrada historia Santa Biblia , tomuire nitko nkarawoꞌu ene etoporichu pjokni timkatakonriꞌi juiti te to nuuna , nuuri to nitorisra . takeptsero nsioppo te pjoka kavildo indigenal tnoknompo maestrompo de capilla ma tijarechnuuꞌi ema tkijareni viya Doroteo Ramos Chuvé . ema koregierooriꞌi pjoñgi añumuꞌini , tajpukatsero añu to wo nechajicha etotsero ema tveꞌnupo ene ttuparaknupo , tjuramentachnupo te to mmuskowyooriꞌi te pjoka kavildo indigenal de Trinidad juitjicha nnosjiyriꞌi nkemtoneriꞌi ene to nkemtonewo te pjoka kavildo , ene pnoni viyanoviono ( vyeꞌono ) kparaakono te jmañono instituciones digamos caa ... casa de cu ... Casa de la cultura tyommo ... tyommokoopo , timpuiirikovi te ..., tatiwriꞌi vyonriꞌi te ciudad de La Paz , takepo vyompo te Cochabamba , takepo vyompo vpajkopo te Santa Cruz , ene vchoopo , ene jmañono añono kwatru , sinkoꞌepuka nñono tatanoviono te to mpuiirikriꞌi te to nitorisra . juitjicha pjoka añu , nkoyꞌepo setenta añu , setenta añu juitijcha nokpako ene ... tajinapo , manjeꞌe ( nakíj ) nakijꞌe , jicho jeꞌchu ꞌchoykonyorepo ene tamutu nkeeꞌi to njichgiene jmani vyeꞌono cultura , mponriꞌi nitkooꞌi to vajoneenuuꞌi , nitkowre to chripeenuuꞌi ene etoporine titkonriꞌi ene juiti tatanoviono , ultimamente psuka , psuka veno nñeno , tkijare Doña Mercedes Pedraza Tamo . esu somuire tawoyokpo to narawoꞌu , somuire sitkopo ene juitjicha esu nomporiiko te to v- ... v- ... vkijꞌenu ... vkijꞌenve te to vyeꞌono invitación . asike en takoꞌe tata joka narawoꞌu tayeꞌe nitorisra te pjoka ꞌpogꞌe , Santísima Trinidad eto viowsa . ene juitjicha tatanoviono , mopoꞌepo njakporiko eto to tkíjareeꞌi vencheko mue ma gobierno tkijareeꞌi Bono Sol ene etoporine juitijcha manjeꞌe nokchupuesꞌooꞌi ꞌpuesariꞌi nwachririkpo ene netpirikpo pjoka mpeno . nkoyꞌepo jmani tasimtuwono , manjeꞌono timkataraꞌono te to vemtoniono : pjoka motoro , pjoka motosierra , pjokapo motosikleta , tamutu eto nkoyꞌe tatanoviono eto ( nim ) nimkatasiꞌwooꞌi noni nchichanoviono tayeꞌe , ꞌchaneranu woꞌneni to nakinajiiwooꞌini ene nkarawoꞌpo juiti tatanoviono joka tkijarekreeꞌi método de solfa , instrumento de violín eto nitko tatanoviono , eto nkarawoꞌu juitijcha , ene nitkoripo najriko to ... to najcho to notano , ene najcho to músika , ene njirowore to ... to músika en sol ... en solfeo . asike eto jmakni narawoꞌriꞌi nitkotchaaꞌi te pjoka ene eto mmetokooꞌi psuka v- ... ꞌpona viati , ꞌpona vchicha , ꞌpona vjañono tyosꞌo te to ewiregiene ꞌpogꞌe , tachoyoropaꞌi pjoka ꞌpogꞌe , pjokni sos- ... sosꞌooꞌi . asike eto nechjisꞌoriꞌi tatanoviono eti , amutchujcha eti , itka pjoka vechjiriiwo ene eto asama pjoka ꞌchojriikowo , nechjiriiwooꞌi tayeꞌe wo nakinajiiwo , tamutu eto nimsamꞌeyre tayeꞌe te to nitorisra te pjoka ꞌpogꞌe jeꞌe nkeeꞌi tatanoviono ene nkeeꞌi psuka pona vporape viati esu swooꞌo to sechoyore te to nitorisra swooꞌo sechoyore to narawoꞌono te pjoka ꞌpogꞌe . rusrupaya tatanoviono .
• Interlinear Glossed Text • Utterance view