Waveform view

Sha_01

Recording date	2003
Speaker age	18
Speaker sex	f
Text genre	traditional narrative
Extended corpus	no

Visualization: Text view Waveform view Interlinear Glossed Text Utterance view

Loading wave form: 0%

Speed: ⊖ 100% ⊕

Zoom: ⊖ 200 pps ⊕

Teo peho sii vuri na teitei roho a peha sii maa tom tamana. Maa tom tamana bona a buaku a beiko otei teitei vamataa nao, peho taem me sinariori paa mate. Sinariori mate vai, meori paa teitei nao me tamariori paa mate pete. Mea bua sii beiko otei paa teitei nao, ere Gaivaa eori bo Vaasiri. Merau, me Gaivaa paa vahio roho bona peha moon. Meori paa kiikikira bata ni bene Vaasiri. Teitei nao maamihu taem, e Vaasiri toro nao nana ore paa paku nana bona maamihu kiu. Be Gaivaa nao tea vaahiipi guu beori kao kahi bona moon teve be tei nana inu be Gaivaa rova maana a moon teve toro vaakiu tamuana nana bene Vaasiri. A moon teve repaa an nana bona maa taba an amaa mataa, ore paa gono bona maa kapa kaukau kapa pauna bata, ore paa hee nana bene e e Gaivaa sahata repaa an. Ei he be ~~vas-~~ evehee be Gaivaa voosu maa, ore paa piku paku vamataa rakaha bata ki nana bene Vaasiri. Piku moroko vamataa rakaha bata ki nana bona. Ahiki he be Vaasiri sue vataaree ki bene keara teve venei a moon teve na pakupaku mi nana bona enei. Peho sii vuri e Vaasiri tamaka rakaha vai. Mepaa nao rasuu. Nao rasuu, me paa nao hio teo peho sii naono. Hio nana eve he tea oga. "Ii ere tetee koma mate kahi roho anaa. E iaa koma mate kahi roho anaa. Be iaa tei nana, enaa sa antee haa nom tea an amaa kapa kaukau." Merau hio nana eve he oga vareko nana. Mea peha sumeke paa tavus ki bona. Sumeke bona a kakato evehee a magamagara. a vaanaabu, tara vaanaabu. Me paa hivi bona, "Vaasiri!" Me Vaasiri paa tagaa hiava. A tabae to oga nom an Ean na tei mi nom to wari tean?" Me Vaasiri paa sue, "Sumeke, ean na antee nom tea haihai anaa? Maamihu taem e keara tenaa be sa tei haana A moon teve repaa koara tamuana nom anaa vaahake nom anaa, enaa re aha bata sosopene maamihu kiu vai naa to paku nom. Ore paa an bona maa tabaan amaa mataa benaa an nom amaa kapa kaukau, amaa tabaan to an kahi riori." Me sumeke paa sue, "Ean na rake nom naa re haihai vaavaha ni ki vuan sau?" Merau me Vaasiri paa sue, "Enaa na rake nom bean vaataverete potee anaa a iana naa re nao namana rakaha a moon te Gaivaa re goe tea tara anaa - ore goe tea tara naa re goe tea tei vahuus eve." Merau me sumeke bona paa sue, "Bara kao - kao inu, ean repaa rigaha o siot ean repaa pita komana tahii, bean aheahe bata nom a ta peha ta aheahe." Merau a ta aheahe bona he na sue "Ei vai roho komana mutene Gaivaa, maamihu taem ean toro paku mi kanom anaa enei be keara tenaa sa tei haana. Nomana enaa nao vai nao nao vai teo hum vai to saka antee vahaa nom anaa an tea tara Enaa pasi varavihi vakavara nom tahii." Mepaa voosu koa e Vaasiri sue mataa koa ki bene sumeke me paa nao. Nao vai rigaha vai bono taraosis teve me bono sioti teve, mepaa pita komana tahii. Pita batana eve he tea aheahe bata. "Mutene Gaivaa. Ei vai roho komana" aheahe vahaa nao bona ta aheahe to sue ki roho e sumeke toro aheahe toro sue eve. Mepaa nao a tahii antee vaevuru bata ki bona tea moonae me oha bona moonae nao batana domonae. E Gaivaa he na tei vavura maana rasuu. Tei nana rasuu rau, o vakokona he s- gono bona "Enaa toro nao, naa toro nao vaan." Nomaa batana o karee koto batari bari. Koto rori bari. Me paa nomaa, vakakao koa maa. Ma suguna inu. Rake baitono nana eve he baitono bona o hum vagegeana o hum koara to sue bata nae keara teve. "Keara tenaa nomaa ean pasi nao vuriha koa vanaa tahii. Bean rake tea rake anaa, ean paa vuriha anaa tobina namana." Me keara teve paa nao vadadao vaha naona. "Keara tenaa, nomaa vahaa, nomaa vahaa." Evehee ahiki e keara teve paa varavihi vaevuru a kahoonae tobina Me Gaivaa paa nao koa, gono koa bona toraaraa, mosi govara bene mutanae. Mosi govara bene mutanae, mutanae pahin mate koa. Mepaa nao rasuu. Mepaa no hio teo naono vai to hio momohu maa roho e keara teve, eve he tea oga. Oga nana rau, e sumeke he tavus bana ki bona. Mepaa sue, "Gaivaa!" E Gaivaa tabin vai, tara ahe vai bene sumeke. "Tabae to oga noman? Ean na tei mi nom ta peha taba to rake nom an ne paku ki vuan ee?" Me Gaivaa paa sue, "Sumeke e tetee tenaa na mate vaivai roho eori bo iaa tenaa. A moon tenaa hiki be paku vamataa ki bene keara tenaa me nomana e keara tenaa paa tavus potee bona iana." Merau me sumeke paa sue, "Ean na rake nom naa re paku ki vuan a tabae?" Mepaa sue ki bona, "Naa na rake nom tea tavus potee a naovana, enaa re nao namana, enaa re no rake e keara tenaa." Merau me sumeke paa nao koa, mepaa sue bono peho hum koara me Gaivaa paa tavus potee bona naovana to dao raara bona raakee, a keeraa. Mepaa naovo tahii tobina namana me paa nao rakerake batana bene keara teve Evehee saka antee koa haana tea vurahe bene keara teve. Me- e Vaasiri na taverete potee roho bona aasun, e Gaivaa he taverete potee bona keeraa. Me nomana bean tara tahii, ean paa tara tamuana bata nom a keeraa be naovo binbin batana. A naovo vai to pakupaku nae na rakerake batana bona aasun e keara teve Eve koa, mataa.

Edit utterance

Text view • Interlinear Glossed Text • Utterance view • Help