Text view

128

Recording date1998-10-13
Speaker age70
Speaker sexm
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
128-001 Ore ipi natrauswen ni nafkal mlaap ni nmalko me tukfo inrok pak namrem . **** § 128-002 Teetwei perkati ipiatlak nafkal toklos nanre nig ntan § 128-003 go natrauswen knen iteplan . Ipiatlak natam̃ol kerkerai nig nafkal inru nag rusosor ki m̃aau . § 128-004 Ranrupi m̃aau nig Efil naur teetwei . § 128-005 Nagier kin ipi Tkaim̃aal go Kalros . Ratok wat pun nam̃er nig Erakor kat ntan negar . **** § 128-006 Or naot nig Emelp̃au ileka me rakfo wat silu nam̃er nig Erakor § 128-007 go kipreg nsaiseiwen p̃ur Emelp̃au go kisos naot nakon § 128-008 wan rusaisei me rutil nrogo teplan rukfo tae kraksok m̃aau nran nig Efil § 128-009 nlaken ruleka nag rakfo krakpun silu nam̃er nig Erakor . **** § 128-010 Go nanriksoksokien negar nig nsaiseien negar rutli iteplan nag rakfo preg nafsan pak naot p̃ur Maarik Nmak Kalsaur § 128-011 nag nega kin kefo pregnrogo nag kewat m̃aau nranru nig Efil . **** § 128-012 Go nafsan kitkal Maarik Naot p̃ur Nmak Kalsaur , elag ntaf nag if wel kefla watpun m̃aau nran wan go kefo § 128-013 wasirlu namter me taon plak [ kapu ] nega me kefo pami . **** § 128-014 Me nlesmp̃aum go kefo psi keto nakamal nega me kefo to leka me § 128-015 mroperkat nawesien sa negar teplan rato watpun nam̃er nig Erakor kat ntan negar . § 128-016 Or maarik naot p̃ur Maarik Nmak Kalsaur nega me ipi atlak m̃aau kerkrai inru . § 128-017 Nagi kaaru kin ipi Msaiwi kin Maarik Naot Charley Kalmet islat nagien . Go tekaaru kin nagien ipi Jakop § 128-018 nag teesa nanwei kaaru nig Pomalfus Maarik Nmak Kalmtapil islati . Kalsog , Kalsog Jakop . **** § 128-019 Or Maarik Nmak Kalsaur kiplak nam̃er nega rumai paikor m̃aau nran nig Efil § 128-020 leg ki eswan rusoso ki Ewenesu me pak elag natik ntaf . § 128-021 Rupaikor tu esan tu . Pulp̃og rik naliati itok makotkot § 128-022 go m̃aau nran nig Efil ramai tkal leg ki eswan Maarik Nmak Kalsaur plak m̃aau nega go nam̃er nega rukuskus tkos tu . § 128-023 Maarik Nmak kipregi m̃aau nra nega rapan pestaf m̃aau nran nig Efil nag rato preg nafte . § 128-024 Go m̃aau nig Efil ranag ratok lel aas me rasursur m̃aau nran nig Maarik Nmak Kalsaur . § 128-025 Go ipi eswan nafkal kipaakor wes . Tenig Efil laap rumatmat go rusefsef § 128-026 Me m̃aau nran rupaat tu tmer wokir . M̃aau Jacop iwok ki ga m̃aau nig Efil Kalros panpan § 128-027 watpni isog to leg ki Tasrik pak elau san kin mees rupo soso ki nskau Kalros . **** § 128-028 M̃aau kerkrai [ pitrek ] ratmer sfer panpan m̃aau kerkerai nig Maarik Nmak Kalsaur Msaiwi § 128-029 ki sifpun mp̃au m̃aau kerkerai nig Efil Tkaimal . Isifkot nanuen leg ki esan kin mees rupo tok soso ki Nmas Tkaimal . § 128-030 Leg ki Ewenesu pak elag naper ntaf . Go m̃aau Msaiwi ki mroperkat nafsan nig naot nig Emelp̃au . § 128-031 Imaet top go kikatsok mal m̃aau Tkaimal me kiwaf nrookot ntas pan sak Emtenmap . § 128-032 Me ifiit pan tu maarik naot nig Emelpau ki mp̃au m̃aau nig Efil wan go ipo wasirlu namten . § 128-033 Me itao plak kapu nega me ipo pami me lesmp̃au go ipo psi itok efare nega me itok lemsi taosi kin kefi til silua . **** § 128-034 Go maarik naot nig Emelp̃au ki sos nafet naot nakon me rupreg nasaiseiwen til soksoki § 128-035 me ruto rupau Maarik Naot Nmak Kalsaur ipi naot mermer nag kefo mermer ki silu ntan § 128-036 go ruituaki ntan p̃ur iskei nag ipi temakot nega taos sup̃ nag ikrakp̃og nafkal nig nmalko § 128-037 kat nra nam̃er nig Erakor nag m̃aau nig Efil nran rawatur . § 128-038 Ipi esuan kin sup̃ nig sautog ipo paakor wes . **** § 128-039 Malnran ser ntau nafnag rumatu go tepei ipi tenig naot mermer § 128-040 ipi sautog , rent , nag rutok pregi ser ntau paakot gar pak nafinaotan , § 128-041 nlaken ntan kipe maui pi tenig nafinaotan Maarik Nmak Kalsaur . § 128-042 Go sautog nen rutok pregi ser ntau pan [ tp̃a ] kin Maarik Nmak Kalmtapil ( Pomalfus ) imat . **** § 128-043 Go ipi esuan missionary ipregi rusrakor natilm̃orian leg nig nafinaotan ipi nlaken natkon Erakor ipiatlak nanrogpirien itop wes § 128-044 go natam̃ool me rutafrafer top . Rutap pregnrogo nag rukmerler sik naot leg negar § 128-045 kemerler pak nam̃len mau me tete naat rutok pregnrogo § 128-046 nag ruklao ki political empire iskei nag kesrakor naleenaan nig nafinaotan plak nagien leg . § 128-047 Me rutuaki nagi nig etog iskei ito wel nagien leg perkati nag ipi Maarik Nmak Kalsaur .
• Interlinear Glossed Text • Utterance view