Text view

065_cut

Recording date1998-09-29
Speaker age80
Speaker sexf
Text genretraditional narrative
Extended corpusno
Javascript seems to be turned off, or there was a communication error. Turn on Javascript for more display options.
065-001 Or ga itaos malpei nmatu komam umtaki taos nkal ni Komam ukano kal ki nkal ni nanwei Ikerkerai nen kin nmatu ikal ki nkal ni nanwei Go me es mees nmatu me nanwei rukal pitkaskei Me komam malpei ukano kal ki nkal ni nanwei Ko kukal ki nkal ni mam nmatu Me esan ni nigmam ikano paakor Nap̃utuok Nap̃utuok ikano paakor nkal neu kemas pram pak esa Nkal neu kefo pram Me iwel ag kuto esago Ag kutotan sago me kineu amuurin na kataf o ikerkerai top Kafo mtak Kafo puetsok nakte nkal wel atuleg me ana kataf Kafo siwer Mailum siwer nrookot wok Nlaken ag kuto Kafo pak etan kik Nmatu itefla Ko natam̃ool laap rutu me nmatu imuurin na kesiwer tol nlaken nanwei laap rutu Kefo nrook puetsok nkal ga ipak etan nen kin kemailum tol nanwei Ko wel nanwei rufla pi tap̃u tu esa me nmatu imai kefo pan lfek ur em̃ae Nlaken ipaketan ki nanwei Sup̃ ni malpei itefla Nmatu rutefla Ko apak esum̃ tap natam̃ool kin ruipe pur tu Kafo siwer kafo mailum nrook pan totan Tefla Go taos nmatu komam utap kal taos mees mau Nmatu ukal ki nkal nen naarum ipram esa Nawesien Nawesien ni nafnag ipi nawesien ni namtu Nmatu kin ipreg nafnag Tete nr ak nanwei nanwei inrom nmatu ileka nmatu imaos go nanwei ipo welua Me nafregnafnagwen sernrak ipi nmatu kin ipreg nafnag Nmatu kin ikuk nmatu kin ipuri ipreg kapu Me nanwei ga kefo pak etalm̃at islat nafnag ip̃aunamru kemai psi esum̃ me nmatu kin kefo preg nafnag Me mees nmatu kemuur kefuri kefreg kapu ga kefan tmen slat nafnag Kefan tmen lel nrau ketmen lel nm̃arteu nkap mai pak esum̃ kemer preg nafnag Mees itefla Sup̃ ni natam̃ool ni mees itefla Me malpei itik Nanwei kefo pan leel nafnag slat sernale mai pak esum̃ me nmatu kin kefo preg kapu esum̃ iwel rapan preg talm̃aat Ranru pan preg talm̃aat Me rekin kin kefan sat nafnag etalm̃aat mai pak esum̃ Nanwei kefo pan sat nafnag me nmat kefo preg nafnag Kefo kuk ki ko ipreg kapu Tefla Nmatu ito esum̃ ilekor teesa go taos malpei nmatu rutap pak hospitel hospitel mau Komam upiatlak tiawi tiawi nen kin gar me ruto raki nen kin rulekor nmatu nen kin ruslat teesa Esum̃ m̃as Ipiatlak Liaas Limat Ana Sera Pali Gar nen ruto lekor nmatu esum̃ Nmatu imuur na keslat teesa Rupan sosor rumai Skotir me rupo sel teesa rulekor wer esum̃ Pan pan rukerkerai § 065-042 ( NT ) Me teesa ipaakor ni nasum̃ nen ? Itiik ... ( NT ) Malpei ? ... Malpei malpei nasum̃ tefla nen m̃as Nasum̃ kapa itiik Rupaakor na nasum̃ nen kin rowat sum̃ rowat <<pr>> <<pr>> Naliati ilim faef dei nmatu imas pnut to Go nmatu ikano taos mees Nmatu ipan sel teesa hospitel Sel teesa mees kotfan itae tuleg pan was ko ikuk Me malpei itiik nmatu malen tiawi itoreki nmatu iskei islat teesa Kefo mas pnut to ikano farfar Go nmatu nen kin taos Sera ifla toreki nmatu iskei Nmatu nen imailum pnut to Ga kefo ga preg teesa kelos Kega klin ki teesa Go iklin ki raiten Raiten ikano tuleg pan los kemas pnut to pan pan naliati ilim inom Go rait teesa kefo tae tuleg preg tete namrun sees Me ikano pan pai nasok ikano pan kuk pan kefei piatlak wik inru itol Ko tete nrak nmatu ileekor pta ki nmatu nen islat teesa itae skoti to atlag mau iskei Pan nmatu ipiatlak nakerkeraian go teesa itae nen kin nmatu mama ga kefo tae tmen lekor wes Go ipo pa Ale nanwei kefo mer pei preg nafnag pan pan pan welkia imer preg kastom tu dokta tenen ilekor nmatu ga Kega preg nafnag Preg nafsawian tua Kuneu lekor ptaki nmatu n neu isel teesa Malfanen rato wi Nta kafo tuok gaag m̃iit Itua m̃iit ko itua tete nafnag ko itua tete nkal ko mane Ale kefo ga slati me kefo pan psi esum̃ ga itefla Malpei komam teesa teesa laap tee sa laap rupaakor Mal ni mal ni tiawi tiawi Tiawi ni teetwei atap tae mau me tiawi nen kin taos rupi tem mom go rupi rait mom rupatais Ipiatl ak pasta pasta Sope pasta Saurei Gar nen kin me malpei malpei kotkot misnari ipreg nfaptaiswen Mista McKenzie kin rumai Rupaptais rutosok natam̃ool <<pr>>
• Waveform view • Interlinear Glossed Text • Utterance view