Text view

064

Recording date1998-09-29
Speaker age80
Speaker sexf
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
064-001 Komam nen kin upi tiawi ulek nam̃olien pei mai paakor nam̃olien ni mees . § 064-002 Me nam̃olien ni mees imsal top . Itap taos nam̃olien ni malpei mau . **** § 064-003 Nam̃olien ni mees teesa rumetmatu wi , § 064-004 ruskul wi me rukano paketan ki tiawi . § 064-005 Rukano nrog nafsan . § 064-006 Nlaken rumro na gar rumetmatu tol tiawi . § 064-007 Me tenen tiawi rutae ipi tesees . § 064-008 Tiawi rutap metmatu wi mau . § 064-009 Me rumroperkat , runrog perkat nale tiawi nigmam tenen rupi tem mom go rait mom . **** § 064-010 Komam ukano pregsa kir , § 064-011 unrog naler , rutil tenamrun , komam upregi taosi kin gar rutli . § 064-012 Me mees , nam̃olien ni mees kineu kafo to pes . § 064-013 Til tenen iwi , tenen ileg , me gar rukano rukano nrogo . § 064-014 Nlaken rumrokin na gar rumetmatu tol nametmatuan nigmam tiawi . § 064-015 Me komam ukano pregsa kir nlaken ipi nafsan iskei nen kin tiawi kefo tafnau teesa . § 064-016 Teesa ipreg tenamrun nen ikerkerai itakel me tenen kin ipi rait ko tiawi ukano preg kerkerai kir . § 064-017 Go ukano pes sa kir nlaken gar rukfo develop ki mal wi nen kefo mai . § 064-018 Kafo traus tete natrauswen taos na naur malnen uto naur sees Erakor . § 064-019 Komam uta weswes skot loto mau . § 064-020 Komam utap weswes skot enjin mau . **** § 064-021 Uweswes ki naarmom uweswes ki masmes p̃ur , uweswes ki kram , § 064-022 go uslasol ki np̃au mom . **** § 064-023 Uslasol ki ntak mom , § 064-024 uslasol ki mpam mom . § 064-025 Uto em̃ae uslasol mai pak elau . Loto itik . § 064-026 Komam uweswes ki naar mam , ufarfar ki nam̃ol mam , raki nawesien p̃afp̃of laap . § 064-027 Tiawi rukfo tai raru , ruweswes ki kram m̃as , rutap wesweski enjin mau . § 064-028 Mees , nam̃olien ni mees , kafo preg nawesien kafo sat nafnag ipatu napu . § 064-029 Me kafo preg loto kefan msagi mai . Me malpei itik . § 064-030 Nam̃olien nen kin tupato mees ne itik malpei . § 064-031 Komam uweswes umaos umurin na koto wi , kofo pei maos . § 064-032 Nkal ni mam rumap̃rap̃or , uslat nanrogtesan itop . § 064-033 Me kofo pei inrok to wi . Kofo sur kopra em̃ae , em̃ae . § 064-034 Me kofo slati mai loto itik . § 064-035 Kofo mai kofo pregi na , komer ler nkap , komai suekro . § 064-036 Pan kin gar , komer laosoki . § 064-037 Me malnen rukoipe laosok silua rutur pek . Natam̃ol kin kefo slati . **** § 064-038 Pan psi raru elau , kefo msagi pak sto , § 064-039 natam̃ol imaos top malpei , nlaken kin nam̃olien ni malpei ikerkerai , toklos teni nawesien . **** § 064-040 Me raki nanrogperkatwen komam ukano tao nafsan ni tiawi , tarp̃ek , § 064-041 tiawi rupreg nafsan go rufla tili na kofan gar preg talm̃at , kofo pa . § 064-042 Ukano sertep̃al nafsan ni tiawi . § 064-043 Na teni sup̃ ni nam̃olien ni malpei . Go mees kin ato trausi . § 064-044 Ni malpei . § 064-045 Nam̃olien tuei . § 064-046 Paakor mees ne . § 064-047 Nam̃olien kaaru ni mees ikerkerai top . **** § 064-048 Go itaos malpei wel kin ufla salem ki kopra , § 064-049 upiatlak taos malpei uius ki na Australia , mane ni Australia . § 064-050 Wan paon , ten slen , tefla . § 064-051 Me ipi mane p̃ur , mane p̃ur . § 064-052 Kofo slati pak sto , ufla sat ten slen pak sto . § 064-053 Kofo paakot tete namuurien nigmam kenom me kotfak mane kofo sati ler mai . Nlaken prais isees m̃as . § 064-054 Ko ufla sat wan paon pak sto , mane p̃ur , mane p̃ur . § 064-055 Kofo sat tep̃ur ler , me kofo paakot ki tesees . § 064-056 Me malfanen sernale ipak elag , pak elag , pak elag . § 064-057 Go taos nanre nigmam tiawi ukano piatlak mane nlaken nam̃olien ni mees ikerkerai . § 064-058 Komam kofo kerkerai preg nawesien sees go kofo tae pam̃or mane . § 064-059 Me if wel kin uta kerkerai weswes mau ukano pam̃or mane . § 064-060 Go malpei komam kofo tae welu tiawi . § 064-061 Tiawi ifla pan sur kopra ipatu komam natam̃ol kerkerai kofo tae pan gar slati mai . § 064-062 Me mees itik . **** § 064-063 Iwel kafla tp̃eki tete teesa kefa neu preg talm̃at , § 064-064 me kafo mas- kafo gar kuk , ko tete nrak atp̃olu tete natam̃ol p̃tae . § 064-065 Kafo paktofir iwel kafitlak mane kafo paktofir . § 064-066 Me wel atik ki mane kafo pan leel nafnag talm̃aat kafo gar preg . § 064-067 Nam̃olien ni mees itefla .
• Interlinear Glossed Text • Utterance view