Waveform view

NE091006-01_A

Recording date	2009-10-06
Speaker age	65
Speaker sex	f
Text genre	stimulus retelling
Extended corpus	no

Visualization: Text view Waveform view Interlinear Glossed Text Utterance view

Loading wave form: 0%

Speed: ⊖ 100% ⊕

Zoom: ⊖ 200 pps ⊕

nou ǀʼhuunsi ǂoo ke xa ǁainya ǂʼhii, ha au ǁhuu peerke, ha ǀʼee ng mandjiesi, ha ǁhaa ǀʼee ng voorskootsi, ǀʼee ng voorskootsi ǁxaan, ǀʼee ng voorskootsi ǁxaan, hau gǀoe ǁhoe, ǂhaun ǀʼee kike ng mandjiesi, gǀoe ǁain, ǁʼaa au ǁhuu, au ǁhuu, au ǁhuu, ha ǂʼunn mandjiesi a ko, ha saa ǂhaun ǀʼee ng mandjiesi, ki ǂʼunn, ha gǀoe ǁain, ha gǀoe ǁain, ha au ǁhuu, (ǂoo) ǂoo saa dyaqnn ǃare nǀa piri, maar ha dyaqnn ǃare, ǁʼoansi dyaqnn, a ǂoo ʘuun ǂxai ʘuun nǃari hoo ng ki a nǀa nǀa baisikelsi nǃari, ha nǃari, ha nǃari, saa nǃari ǃare, ha nǀaa mandjiesi, au mandjiesie ke ǂʼunn nǃaaʼa ng [ng] ng ha ǂaqe, a ha nǀii nee, ǁhoen ǂoo ke kua ǁu nǀii ng, ku ǀii mandjiesi, ku nǃao ng baisikelsi, gǀoe ǁain, ku nǃari nǀa baisikelsi, a ǁhoen ǂoo a gǀoe ǁhoe ng ǂʼhii, ee ha nou saa ǀʼee gǀoe ǂhaun ǀʼee ng mandjiesi, ha nǀii, ha ǁhaa nǀaaa, maar ha nog, ja ha ǂhaun ǀʼee ng mandjiesi, ha ǁain, ǂxaike ʘuni ni nǃona, nee ku nǃari, ku nǃari, ku nǃari, ku nǁae nǃaria, ǃʼoakera ʘuun gǀoe hoo hoo ng ǁqhaanke, saa nǃari ǃare, ku nǁae ǂaqe ǃʼoakera ʘuun, ku nǁae ǂʼaba ǁhoe, ku tyiin, peerke ǂʼaba ǁhoe, hng dyaba, kua soo, ku tyhiin kxʼuu ʘʼuiʼi, soo, ku ǃuri ku tyhiin, ǂxai ʘuun [ni] ni nǃona hoo ng ǁqhaanke, hng nǀaa, hng ǂaqe ku, hng nǀii, "o" ng ǁaun", hui ku, hui, knn ǀii uu, ǀii uu, ǀii uu, ǀii uu peerke, ǀii uu peerke, knn ǀʼee ng mandjiesi, ǀʼee ng mandjiesi, knn gǀoe hui ku, knn gǃai ǁhoo ki ng baisikelsi, ku khuuǁʼang, ku ǁain, ku nǃari, nǃari, knn dyaqnn, dyaqnn knn, knn nǀaa ku ǂqhii, ǀqubike ku, ku ǂaqe khaʼu, ǂxai a ko ǃae saa, saa aa kua ǂqhii, a ha ǀii [ku] peereke ni ǀii ng tyoxoe, ha gǀoe dyaqnn ǁʼaa nyaqnn ǀoeke ng koke, aa ǃuu aa peer ha ǀii ki aa ǃuu aa peer ha ǀaa ha peer a ko knn ǃuun ain, ain, ain, ain, knn nǁae nǂae ng ǁhoen ǂoo, ǁhoen ǂoo a khuuǁʼanga, ha ǁhoea ha ǂaqe, mandjiesi a ke ǁu ki, tyuin xae [~~mandjie~~] mandjiesi a, knn gǂunn nǃaaʼa ki a knn gǂunn ǃʼuu knn gǂunn ǂʼunna, ku ǂaqe ǀoeke ngke, ku ǂʼiin, ǀoeke ngke ke seker he, maar ku ǂaqe, ku nǀii, knn nǀii, knn ǂxain dyaqnn, knn ǁu ki gao, knn ǃuun kaǃqxʼora, ku nǀii, nee, ǀoeke ngke ke ǁae, ǀoeke sing dyaqnn ǃare, ǃare ng ku, ku ǂaqe kike, ku nǀii, knn ke ǁae, a ku suin, ku maar ǂaqe, ǀoeke ǁʼoansi dyaqnna, tya ǀoba he xa nǃaria nǀa baisikelsi gǀoe ǁʼoansi nǃaria, a ǀoeke ngke ǁʼoansi dyaqnn ǁʼaa ǀxaa a,

Edit utterance

Text view • Interlinear Glossed Text • Utterance view • Help