Waveform view

NB041016-04_A

Recording date	2004-10-16
Speaker age	70
Speaker sex	f
Text genre	traditional narrative
Extended corpus	no

Visualization: Text view Waveform view Interlinear Glossed Text Utterance view

Loading wave form: 0%

Speed: ⊖ 100% ⊕

Zoom: ⊖ 200 pps ⊕

ha moo ǀʼarusi, ha ku ng nǁaa, "hey, ng nǃuusi, tyoe, gǀa ǁu ǂao, a ǃʼao ng", "nǃoʼe, ng ǁu ki ng ǃʼao a, ng ha ku ng nǁaa dyisi ǁu ǃʼao ng ng ǁala khuuǁʼang ha ku ng nǃoʼe ǁu ǀai ng gǀa ng kaǀqxʼaa ǀara, ng kanǀuunke ǀara, ha ku nǁaa, "tyoe, ǁxae dyisi, ng ǁʼaa ng ǀai ng ǃqoeki, ǃqoeki see ng ǀai ng gǀa", "o, gǀa ǁʼang tsaaʼa ǃqoeki", a ha ǃuun, a ǁʼae ng ǀai ng ǃqoeki, a ha ku ng ǃqoeki, "nǀaaa [nǀaaa] ǂoo a, gǀa ǁu nǀai, oom ǀʼarusi ǂao ha ǀʼaa", ǃqoeki ku, "nǃoʼe, ng ǁu ki ǀai ng nǁaa, maar ng si darem tsaa a toet by my nǁng, ha saa, ha ǀʼee ha ng ha ku, "ha tsaa ha nǁng, ha sii ng ǀʼee, ha ku nǁaa, "tyiina ki a, gǀa ǁxae dyisi, ǀʼarusi, ng ǂao ng aan a, ha ku, "a ǁu si aan ng" ǀʼarusi nǁae ǂkhuu uu, ha ǃae, ha ǃae, ha ǃae, ha ǃae, ha ku, ng ǃqoeki "ǂaokea, ǂaoa ǀʼarusi ng ki ki, ǀai ǃooa ku, [ng] ng tsaa, ha nǁae ǀai saa, [ha ǀai] ha ǀai ǃoo, nǀa ha tsaa, ha ku nǁaa, "sii aan ǁabe", a sau xa aan ǁabe, ng ǀai ng ǁaike, ng ǁʼae ng tsaa nǀa hng ǁaon aan ǁaing ng, ha ku nǁaa, "a si maar ǀai", [ha] ha tsaa, ha klaar ǀhaa, hng a ha saa, ha ku ng nǁaa ǀaeki, "hey, ʘoe ke tsaa, si xa maa tcunnsi, ng ǂao, ng tsaa a, a si kxʼarao ʘoe ng nǀa ǀoeke, a ha see ng tsuinya, ha sii, ha khaqlo ǁaing nǀa ha ǀoeke, ha nǁae ǀʼee, ha ku nǁaa, "gǀa ǁxae dyisi", ng ǂao, ng ǁʼae nya ǃʼai tyoe, ha ǁhuubu ng kostina, ng ǂao ng ǀxoo, ha ku, "nǃoʼe ǁhaa ǁhooa ki, ng ǁʼae, nya ǀai tyoe, nǀa ha sii ng ǀʼarusii, [gǀa ǁxae] ha sii ng ha sii ng kaqleke a ha see ng kaqleke, ha ǃʼaa naa, ha kaqleke, ha nǃaa naa ha kaqleke ha ku nǁaa, "nǃoʼe a ǂxain soo, si ǀʼii soo koqna, koqnasi a, [ha saa ha nǀau soo si], [nǀaa] hng ǀai nǁaa, hng ǀai hnya klaar ǀai ǁuni, ha nǁae nǀaa, hng nǁae nǀaa, tyoe tyoe see ng ǀqoqon, hng ku nǁaa, "nǃoʼe, a ǁu ki a ǀqoqon, dyisi xae a ǀqoqon, a nǀai, kiʼa ǃuu a xa ǀʼaa, tyoe a ku, "nǃoʼe, ng ǀqoqon, want si kxʼuu nǀa si ǀqoqon, a xa mos tsaaʼa sa ʘoe, nǀa si see, si ǀqoqon", ha ku nǁaa, "nǃoʼe, xuua ǀqoqon, a si ǃxae ǀqoqon, nǀa si aan ǀʼarusi aan", gǀa gǀa xa kxʼuin ng kxʼa kxʼuin want ng xa mos aan tcunnsi, ng xa kxʼuin, maar ng xa soo ǂxanisi ha ku nǁaa nǃoʼe lisa ǂxanisi si ǀxoo hm, si [si] gǀa ǁu nǀai si ǀqoqon, ǃuu a si xa ʼaan si ǃqain si xa ʼaan cunn sia nou ǀqoqon dyisi a ǀaqra si ǀqoqon, ha ku nǁaa, "si ǃxae ǀqoqon, si ǃqain si kuri soo gǀa ǁu ǂao a <<on>khirikhiri> ǀqoqonsi nǃoʼe, a si ǂxain soo, sa ǀqoqon, o, a ǀqoqon so, dyisi ǂxoa a tyuu, a kxʼuin soo, a si ǂxain soo, sa ǁxabu nǀa ǂxoa a, si ǀai nǁaa, ha nǁae ǀai ʼa hng ǀqoqon, hng ǀqoqon, hng ǀqoqon, a hng klaar hng ǀqoqon ha ku nǁaa, "nǃoʼe, ng xa aan ǃqain, ng darem kxʼuin soo, ng gǀa tcunn ng ǀʼarusi tcunn si xa aan, a xa ǂxai ki, a xa kisinn kxʼuua, a ǁʼae ng tsaaʼa sa ʘoe, nǀa si aan, nǀa si ǃqain, sa xa ǃqain, hey, ǀoenn ʘuunke ǃai tyiina, ǃai tyiina, nǀa u ǀkhuun, dyisi xae u ǁu ǀkhuun, u ǀkhuun, u xa aan tcunn, gǀu ǁu nǀai, si xa ǃxae soo, sa ain tcunn, a soo mos aan tcunn, tyuin xae u ǂao, u ǂxaqake, gǀu ǂxaqake tyuin, gǀu ǁu nǀai, si xa aan, tyoe xa tsaaʼa sa ʘoe, nǀa si aan, nǀa si aan, nǀa si kxʼuin, ng ǂxain suin nya kxʼuin soo [ng] ng tyoe tcunn, a tyoe xa aaa sa i, a si xa ǀqoqon, si xa ʘqui, ʘquisi ke ha ǂhaun ǁhoe si,

Edit utterance

Text view • Interlinear Glossed Text • Utterance view • Help