Text view

PKZ_196X_AngryLady_flk

Recording date1964
Speaker age70
Speaker sexf
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
Ibi kurojok ne. Di üge kurolaʔpi, tibizeŋ münörlaʔpi. Tarəsta šoləj, dĭ bar kirgarlaʔbə, münörləj dĭm. Ugaːndə kurojok, il pimnieʔi dĭgəʔ. Dĭgəttə šobi onʼiʔ soldat. "Măn dĭm tüšüʔlim". Nüdʼin körerbi inezeŋdə. Šobi. Dĭ dĭm iluʔpi, (ine=) ineʔinə embi. Deʔpi sapožniktə. Sapožnikən nebə deʔpi, döbər gijen dĭ bari̮nʼa amnobi. Dĭgəttə dĭ ertən (uʔ- uʔ-) uʔluʔpi. "Gijen măn kunollaʔbəm?" (Dĭ=) Dĭʔnə bü deʔpiʔi. Deʔpiʔi, kadəldə kĭškəsʼtə, (rušnʼikziʔ) dĭ kĭškəluʔpi. Amzittə mĭbiʔi. Kujdərgan nuldəbiʔi, segi bü. Dĭ amorlaʔbə. Šobi tarəsta dĭʔnə. "Ĭmbi azittə?" "(Ambi-) Ĭmbi taldʼen abial, teinen (i) i dĭm (alaʔ-) aʔ". Dĭ kambi, măndliaʔi. "Jakšə molaːmbi bari̮nʼa miʔ. Ej kudonzlia. Dĭgəttə ej münöria šindimdə". Dĭgəttə nünəbi dĭ (sə-) soldat. Šide mesʼats kambi. A dĭ kuznʼetsgən bari̮nʼa amnobi. "Ĭmbi ej uʔblial? Ĭmbi pʼeš ej (nendlie)? Büjleʔ kanaʔ!" Dĭ măndə: "Deʔ măna băzejdəsʼtə!" Dĭ ibi remendə, münörbi, münörbi. Dĭ kabarbi aspaʔ, kambi büjleʔ. Ĭmbidə ej molia (oj-) azittə. Amnobi, amnobi. Dĭgəttə bazoʔ kunolluʔpiʔi. Dĭ soldat šobi. Dĭ bari̮nʼam deʔpi maːndə. A kuznʼetsən nedə tože maːndə deʔpi. Dĭgəttə ertən uʔbdəbi. "Kăda măn döbər šobiam bostə (maː-) maːndə?" Dĭgəttə surarlaʔbə bostə. "Da tăn gijendə i nagobial, dön amnobial". Dĭgəttə kuznʼetsən (ne=) ne (ha-) jakšə amnolaʔbə". A dĭ ej (kuroluʔ-) kurojok molaːmbi. Jakšə molaːmbi, dĭ bari̮nʼa. Dĭgəttə … Kabarləj!
• Interlinear Glossed Text • Utterance view