Text view

20151202e

Recording date2015-12-02
Speaker age61
Speaker sexm
Text genretraditional narrative
Extended corpusno
Javascript seems to be turned off, or there was a communication error. Turn on Javascript for more display options.
aree ya aáng pakani bará Gorwaawoo Gorwaa kina ohín masoombár Gorwaa kan hubin bará pakani kan ʕeetimiis pakanír eer kan fundimisó ay idór askarír wa Gorwaa na siʔií masoomba na síʔ masoombár ar dirí Yerotoní sleemeroo in burumburit dirqáʔ ar idór dirí kitaangwí in burumburit gawá ar bartaqáʔ aqo in burumburit dirʔín gawá tlomà toqáʔ dirʔín neer lawuluʔín alafu ta watlikáng aqo faʕooʔín kin ʕaay tan waatl faʕooʔín kin ʕaay aqo idosí iwiwitoʔín aqo tlatlaʔangwoo idór kin ohíngw ây wawitumo daqay a ma boyay idór daqay ngu hee i silahár kón muukú silahár kón hee ngu gár tawa slahhaá qeeru kuna warqeés hee ta bay Dodoód a wawitumó Gorwaa wawitumó gadaee a milá wawitumó Gorwaa wawitumó Gorwaa ta kahi aáng a wawitumò Gorwaa taqo kahi a ee Dodó aáng ta kahi a a boyimowoká boyimo a heé amaohin gaʕawusmo a hee ta kitaangwí ay adór hindí bilí tawa kahi a alafu tawa siíʔ heesí kuna leleéhh ta bay Barandí Kulee nee Leelí o dó Tumla muukusí kina leleéhh kina sláy amamaʔo kana óh kay huw maʔaay kana alatleéhh maʔaay kawa tleéhh muukusí masoombár gawá tloma sleeme nina wátl lawulu kina qaás kiloʔín tina arxayéʔ amodí kiwa slaʔiʔ amodáʔ kilò kiwa slaʔiʔ kiwa pimimín a Babatì kina pimamín pimamín wa Babatì kilo kuúng bura siíʔ tun bay amorqáʔ kodáʔ kilo a yaʕán kun bay tsaʕaám gawà gawá gaarì tana idosí lawawín lawawín lawawín lawawín koko ta slukún ta kahi kilo a siíʔ slukumaqáʔ ar kuungáʔ ar bilihee koko aqo slukún naʕay a ma daqáy neer gitláy aree ge wawitumo awu ngu hariís naʕayʔéʔ ma daqay tan ooʔi isaʔ kilo ngwa siíʔ ge hee kuungáʔ a kina idosír lalee lalee lalee lalee lalee lalee lalee lalee lalee lalee muu kiloʔín ina daqáy asma kwa tsuúnq kwa tsanguús gár ta tleehh a tsangusa muu kuna tsanguús iwa yaʕàn gasí kana lalee lalee lalee tawa buʔuút ya iimi tawa buʔuút tawa hheʔeés hardodáʔ ta slay tawa haáts hesabudáʔ hesabudáʔ tawa haáts tawa tlatláy alkwí gaaridú kiwa asloó qaasi gaaridú kiwa asloó qaasi tana firín tana oóʔ Dodoód atén kuúng gitláy mita alu ʕaaymar ge tana firín wa gawá gaaridù gidabá atén aga qaro bará hoomiʔi kawaán agaqo qwadé awaán barasí timtindin tsuuʕ tam milá tam luqo mareerén naʕaarén tam inqo araán tam an kiʕaan amór naʕaarén xuʔaanaká kuú sleeme mit alu ʕaaymar Dodó kuna firín iimi ina ʕét pakani kana tlahhiít tlahhiít tlahhiít tlahhiít tlahhiít tlahhiít kina fundumamiís fundumamiís fundumamiís fundum amiís ay slehheerí lehhó slehheerí lehhó ki ʕaay baradee slehheerí lehhó birna na faakíʔ iimi nina wátl ka qaro fundiís ga aqo askari gár ta askari káhh ar ta xuʔiká kàhh umó garoo Keengereesa iimi kan xuuʔ lakini heé ta gaas kaahh tam o wák asma maʔaaydáʔ ta tleéhh aáng ka tsuúnq a tsiriʕidáʔ ta tsuúnq wa dirí amamaʔo a tleér ay baraqáʔ niwa kíʕ tana oóʔ muu nin waatl nee gár tlaakw káhh tam ar ninaaw xay tindiwa tana tindiwa waátl tare daáʔ Gorwaa Dodó kuna daángw wa óh Gorwaa niwa watliyíʔ íʔ <<sg>> ta dóʔ aluwo Dodoód ina tláy ina dír muuku dáʔ tl uway káy dóʔ Nga wdáʔ ngu na káy xay ina do anaá ng giyeé ngina leéhh dír a káy tam an dóʔ Ngawdáʔ tam an dáʔ Alawa doʔoko ngwa káy doʔdáʔ hindí aní uga slawikáng dosí ngwa káy giyee na tleér xay giyeé na tleér kureerí tám ar Gorwaa qwari giyee na tleér asma Dodó kuwa firín i kahi ihii ahheè kuungáʔ aní burtunduna ʕetiís aní misa firindéʔ aní kuungáʔ tundun hhamís slaaʔ aní tundun gwaarár slaaʔ idodáʔ kwa firín giyee ngina leéhh tseeʕamá nina paáʕ kureerí aree iimi na qwari tluway kaàhh tluway bira tluúw aluwo in tsatiit balaangwʔín tawa kaàhh hamarikáng bare tawa babáy tawa babáy tawa babáy tawa slahhahhaá tare axweés barisee ire iwít yaamù bariseér mila ina iwít yaamù tare axwemamiís axwemamiís gasí kare sláy tare yiikwá huw yiikwa kare huw dóʔ Dodoód ta nanahángw ay gidabá gitláy kar naʔas gitláy tluway i gitláy naʔas gár afkudáʔ ya a afkudáʔ ya kawa loori huw afkudáʔ amór hhoo afkudáʔ amór hhoo yiikwa kina hariís yiikwa kiwa hariís tluwáy iimi ire tluúw iimi ire ʕaayínd shiida ire ire i dirí alkwí axweesani a fák iimi ire ʕaayínd tare kiʕi bará axama bará qwalaʕa a moroʔó ta tlehhiít aáng boló geerawoo muu niwa iitláy moroʔó ta ʕimiís a kwí muu niwa ansín a muu amór kungwa ansín a bolodáʔ tu nanahankáng gaka bar idorka kwaqo tan kahi gurá nee yaamù gurá nee yaamù aqo an qat gweʔedo gawà gweʔedoqáʔ kin diif nee hee hee ʕuurú kon kun leleehh o kwaʕár kón wa ló bura idorqáʔ bura idór kwa taáhh aqo nee tseere piripiri ka xoósl piripiri ka xoósl kan kitambaa kan naʕaas slami a kaptula un dux kaptula i kaahh gweʔedo kahár kin diif kuú o ʕaankwets barta taahh aqo qaway nee nee gadáʔ tin konaʔ nee hhara kan idorqáʔ wa uruux tu tahhiká wa idorí kan idorí hhara nee qaway hhara mibanee aree kwaqo tseere in tsaqand tawa tleera disiyee xaʔanó kun slay dír xaʔanó qom kwa idorqáʔ qaát gaka idorqáʔ wa qat kuúng an gawaka qat gweʔedós asma ili iwa gawtá tiʔitiyáʔ wa iwa gawtá ʕakutiyáʔ asma kikiitá hhoo xay idór muu aáng ta ʕimiis a idorí maʔishár tawa hoót aáng muu a tí muu amór dahi amodáʔ a amorí kasír ta tleéhh aáng a tí kara aluwo iimi a axwés barisee a iwít yaamù yiikwa ka húw dóʔ Dodoód koka Dodó sleerós ngire húw doʔdáʔ i giyeér firimár ay ar gidabá tluway ma iimi qwari ngu sleér asma aní a firinéʔ kar tluwáy iimi ire tlúw iimi ire ʕaayínd tare kiʕíʔ bará qwalaʕuʔín gimáy idorí yaamú aáng amór darahiyaʔ a amorí xay yaamú aáng amór ta dahiyaʔ a idorí gitláy amodáʔ ar idodáʔ tindira hoót yaamú Gorwaa amór kingir darahiʔ amodáʔ kingiwa hubabín a amorí nire tana babáy ay moroʔó hatláʔ kure slasláy ire dalaʕiyéʔ ay bilí muukudáʔ aqo kwí Gorwaadáʔ aqo yaamuka aqo kodáʔ idór hatláʔ a warqees i káhh muu hindí bilí in warqaqay moroʔoko o taw kun ohin moroʔoʔín kodáʔ aáng harín o mila kun qwaremiis as moroʔó taw moroʔó taw kun taw tatahhaan moroʔo kaahh diriʔinee kuna amór slaqoʔín in dahamiis moroʔó mila ku lo wa uúr aáng a gimáy a idorí axwantee a idorí faák tí
• Waveform view • Interlinear Glossed Text • Utterance view