Text view

20151125j

Recording date2015-11-25
Speaker age95/61
Speaker sexm/m
Text genreconversation
Extended corpusyes
Javascript seems to be turned off, or there was a communication error. Turn on Javascript for more display options.
ee gwéh didáʔ kay geexeer didáʔ todáʔ a didáʔ didáʔ tadáʔ Ganay iwa waátl ayarén neer gadáʔ ar Ganay kuwa báy bara hardát aya qamaa bara ʕét ta uʔúʔ ta uʔuʔ hheʔee Ganay a uʔuuʔî a uʔuuʔî a uʔuuʔiká ina ʕeét ayá Gorwaa karr Ganay ina lawawín ay Galapoo ee i hardah aya nee i hardah aya neer gadáʔ lawalaadáʔ i kon nee a lawalaadáʔ kón ka tseʔeesî geera digirmó Goraa bura eér nee oo Taraa ta uʔuʔ a uʔuuʔiká hheʔee nina tlaʕaʕiít ay Galapoo Duwanqeé ina alusir kiíʕ hheʔee Duwanqeé kalaʕadáʔ Taraa nga hheʔeés kalaʕa ngina ohikee ay Gorowa Taraa amorqáʔ ngina fiíts Taraa amoorqáʔee ngina faakikeê a dát bará bohonteerí filá hháʔ hheʔee an tisíng muu kwa tsuʕaʕín nee Duwanqeéd alkwí ari muu kuna tsuʕaʕín tsuʕaʕín tsuʕaʕín neer Duwanqeéd tloomaár dóʔ Mango tam qutúr hindí baradáʔ gawadáʔ ngi kónd kon ge tam sagii-hami i deiyáʔ tloomaár dóʔ Mango kahhiyáʔ ar didáʔeê aní ina artaʔ áw lege bilí hayya baabá aní ilaʔéʔ ina daqáw tloomiʔidáʔ ina artaʔáw geera aga andikeê qutúr tina tsaʕtsaʕán hayya baabá aso muukú imir Jerman iwa kahhatitiyíʔ hayya disí iwa buʔuút heé muu ngwa harʔoh Duwanqeedee hee ta báy Gootí Hiláy baabó aamarqáʔ ar dóʔ Gadiyeedó Qandiyo Toʔá mm muu ngun harʔoh muu gár ngur harʔohi ina oóʔ muu kwa faák karra dama kay sláy kay huúw ay dóʔ Qutadu i kodáʔ aáng ta asltí lawalaari leehh nee isowí neer Qutadu nee isowí nee Baqayo nee Ganay nee Ganay kodáʔ ta asltá ileéhh asltá i asltadáʔ ta leéhh nee leéhh nee Ganay kana gasár áy nee Gootí ar do ta do Qutadu i leéhh mm kana gasár áy nee Gootí karra dama kay kay huúw nee Gootí Goraa ka faák Goraa karra ka faák karra Gootí Hiláy baabá dama ngay huúw alkwí Duwanqeéd ire kiíʕ ay kitaangw i asma xuuxú gárma kuúng tu niinaw lawalaár aáng ar dóʔ ar ayá Haymú nga leéhh lawalaár Haymú a tleéhh ar kwanza wák ari a wák muu nguna ʕáy aluwo lawalaadáʔ ka tseʔeesikáng kana dalaáʕ ay baraka kanar hiʔimamiít aluwo Ganay ngina afa-qaás oo Masiroy an gár muu kus asma naʕayós ka faák faák asma daaqayós tsár kwa tsuúʕ aga axasî aga axaás hayya aluwo har-ohee muu bar adór gidabá hooyoot heé ngwa tleehh a Gootí Hiláy ina ina doʔ dóʔ oo Qutadu Qutadu káy kay dama ngina huúw ina oóʔ karra muu kwa faák in har-ohay karr aluwo peeraydáʔ dirí i kón Masong na hardáh serkaari na dát alkwí ari muu ina huru tlehhiít mmhmm alafu alkwí yaamú Gorwaa idór ngire ansiím moroʔó doosla oo ʕayma idór kure sláy didáʔ an dirí bere muukí muukí ta bay Gorwaa muukí ta bay Gorwaa axasî muukí ta bay Gorwaa muukí ta bay Gorwaa axamiisáng muukí ta bay Gorwaa ihhaftá yaamu boolooqáʔ i ihhaáf didáʔ ka saaw aga axasî ihhaftí didáʔ ka saaw idór yaamu ka ihhaáf neer Gorwaa muukí aluwo alkwí ari idór ina tlehhiit doosla kare ansin axweeni ge duxuutee doosla kare ansin asma makarqáʔ maso ngi ohiínd Gorwaa gár niwar dooslá a xaʔanó muquslaa i káhh xaʔanó taaqwani umowós kan idoriwa yaamu xaʔanó afa idorí kunur doosl un yaamú muutatiínd duqusee kwa tleéhh foola kuʕunti bara túʕ an gás neer taaqwani tare balaangw kure dahaas balaangwdáʔ qaaymoo ka uur a idór dirí nee choo ari karr bira hamaár balaangwdáʔ in hamaar karr ʕaymisiroo muu ngu buuʔabuuʔ karr tana idorir koomamiit tana idorir koomamiit tana idorir koomamiit aluwo Irangi hhasaangw nguna humiínd Irangi hhasaangw nguna humiínd kurmó hhaysoo ngwa tléhh oo hhasaangw hhasaangw kun humin kure idoriwa mutsuqaqin aluwo hhaysoo kay tleehh wa hardorí kipay kway tleehh kipáy xaʔanó kway tsaat kway didi dahaas basi tay doosl aga axasî ihhaftá yaamuka karr alkwí ari a idór taaqwani ka máy alkwí ari a kurmó idór Irangi tana koomamiít tana koomamiít tana koomamiít aluwo nina tiʔiít kurmó serkaari oo Masong oo muqsli oo hhaysoo kipay kipay un tlehh basi un dahas didáʔ aqo idór kudáʔ oo Irangi idór kudáʔ oo Irangi unar dooslaaaslít kurmodáʔ unar dooslaslaán dooslaslaán atén nire aní sleeme nire aní kwí un xuúʔ aní sleeme nire dóʔ tleéhh kurmo aqo kudáʔ aga axasî aluwo na tiʔiít kwisí tawa kah siranga oo alhheʔesáy a kwí kuungáʔ ta dabaʔ bere kwisí aní aní una slaaquúm sleeme kwí oo siranga dorenee kwí oo sirangawooká oo hhaysoo sleeme dorenee in deer ay bilí oo hhaysoo tam dorenee aní hindí i deer tam hindí i deer unar dooslaaaslaán ay hindí siranga nire tiʔiit wa alu sirangasí ana malé alé ar siranga iwa tiʔiít aluwo ido a tláhh kwadáʔ kina máy alkwí kodáʔ kina máy alkwí ari a koka oo dahamiis idór shoka siranga aáng heé nga tleehh a mâ hee Masong Masong aqo Masong tam kudáʔ oo hhaysoo aqo amór Masong heé kwansa kuna tleéhh nee Irangi a hhasaangw oo kwansa kurmó kwansa oo hhasaangw kuna kuna humín tleéhh ta neer kahi Irangi a wák ari aluwo na tiʔiít oo muqsli oo alkwí ari a muqsli a hhasaangwoká a Masong nguna duúx Masong an koqáʔ ta koomaan tam hindí koqáʔ hindí ta koomaan aluwo tay kiiʕaán nee siranga aqo Masong aqo Masong gár kur slaxundaʔ gár kur slaxundaʔ ga dír ki eeraʔ lapiya eeraʔ lapiya lapiya bar deebee an húp wa dirí an gagarari deebeér wák ay Kiru gawá tlaankumodáʔ un delaʔ bara kotsqót neer deebeerók aqo basi gár tindi hariisi a sumuni booloó gitseeʕawók a shiliingimó shiliingimó wák xáy gár ta axwes harge xáy mmm gár ta axwes amorqaʔee koodiroo tu gaamiis Masong niwa hamar sleeme a deebee an gagát a shiliimó matloo an malé kiʕáʔ hheʔee dír do tam faʕaa ʕaayang idór kar ʕay bara boyáy barakee i deer wawitá i deer ta kahi kodáʔ a koodír hanamamiisaká kwí tun xuʔún kuúng bara guʔuterók xweera bará marʔi idór baahaa milâ hindí idór tar qat tun ohár ay amsi piindoo kan tlaʕaángw tsaat hheʔee bar xweerawoo kwa aga mak faʕaarók ʕaaymarók a dát a morohhót ay bará doʔ ta kát hodi doʔ duuxaak tsaʔasi kan daʕán ta kahi kwí tun naaʕ tun tseegár ay slehheerí lehhó hhara gawa tun tandikín diif ala ale dír tu itseegár ay booloosiyee Mbuluwooekê a dilâ di laqa Kondowa Mbulu Imburuwoô amorqaee Mbulu Imburu a ala Kondowa ar Jerman a Kondowa ar Wangeresa a Mbulu lamatoô a lo a disiyee alafu ii Endá Qwaráy kuna tsegiít lege sleeme Endá kunguna tuúʕ nee muukú somo hindí an axweesa hara Endá baabó hareér Mungee ayoór Mungee kuna tseegár áy asma qahaangw buraa ni tleéhh areek xweerawoo booloodáʔ ga mutfali i deeroô a xaaʔi in idoriwa sihhiit dír doʔ aluwo di an fooxis dirqáʔ alú doʔ amorqáʔ bara fooxís fooxár hardorí bara tléhh xweerawoo bara dát wa idorí bara hardát dír xaaʔidáʔ ta idoriwa síhh un oʔ aʔ aní aga qwariít haree xaaʔidáʔ ngin heengés heengés an dát faʕaa an ʕay kuúng an didáʔ ʕaayiínd boyáy na hardáh ta kahi we i bará doʔ kwa amór afkó doʔ kana ilawaáts amór alú doʔ aqo giír kwa tiʔít tun kwuuhh we tun tlixiit asma a góp wewe shiidadáʔ muukudáʔ a ʕaay kuú aga ʕaayiînd kuungáʔ hindí a bará tahharookeê an idór Goraa nire itlayiyíʔ nire hootiyíʔ maʔishár Goraa idór kare hoot an maʔisha idór kare kare ay an idorí xáy kuúng lakiit alkwí maʔisha idór kare ay ar Goraa an tí Goraa aáng idór nire maʔisharʔín kare ay idór nire hootiyíʔ nire itlayiyíʔ nire lawawiniyíʔ an moroʔowí tinda alkiʕiit koodiroo hee nahhamiít gawá tloomaa yaʔaʔ-wasli un gawadáʔ eer xweerawoo kuú a darát xweerawoo amór doʔowók guraʔ a qwariitikeê guraʔ a qwariít a ma kát kuúng bara hardát hareerók bará doʔ an idoriwa bét haree birna qwátl didáʔ didáʔ kwuʕuúngw ngun idoriwa heengés kuúng a mak dát ya faʕaa tindina hariis a mak idoriwa ʕáy gár ta axas hodi muukusí aqo hatláʔ muukusí hoodír kaqo a boyáy boyáy harge serkaari wawitá boyáy a idór muukí tawa kahi bar idór garoo bilí a idór mwenyekitiqáʔ oo kitongoji a idór mwenyekitiqáʔ oo kitongoji a idór muukuqáʔ bará kikawo i kuundír konáʔ an idór mwenyekitiqáʔ oo kitongoji tina haragasiyáʔ i kundír konáʔ a muukú dihháhh oo hhadoo ge ta daqaqayekeê qoomaár kwa mfano qoomaár aní bara daqawikáng bará doʔoo amoolahee barta kah aga faʕaár awiká koodi bara buuʔiká taqo daqay saaʔa ka xuuʔ kuúng tuqo tu saajín tu saajín ta ta a idorí pelesi tlehhiit heé ta qaás i deer ta kahi heeqáʔ mus slaaslawaanaká a milâ dír i nahhamaamiit heé taw kwaqo qaás hee kwaqo oo qaás gidabá oo kuúng kuúng oo ilaʔ oo kuqo ohi slaw uga ár i gidabá dirqáʔ aso geera ilaʔ ilaʔ a idór kuúng hindí bara nahhamít heeqo ga aga tlakwés alafu hee ila kuwa qas gidabá aso aso pelelesi pelelesi ayareʔ tleehhaak idodáʔ pelelesi kwaqo qas oo idosí alafu muu sleeme kun kuuwa hhooʔeê kuqo kuuwa wewe tlaákw kuúng bara koko dahamú tlakusumo eer saʔaár ta dat ka xuuʔ axaasee saʔaár kuúng tawa ʕaaymár eer ka xuuʔikeê saʔaár ʕaayma ee karra ta kahi aga qwarít saʔaár ʕaaymár xweera kuúng a xuʔikeê ka xuuʔ tam kuúng a xuʔikeê doʔhungeê bara a siiwaár faʕaár xweera saʔaa xayge siiwaadáʔ ar axwees tano a muu wa qaát kuúng an dat doʔ ugwa gogoxomís faʕaadáʔ an ʕay ʕay ta hara góp ay bará gara bará marʔi an i qató eer kwa baahaaroô karra aqo idór baahaa baahaa baʕatookeê muu idór kwa ʕiis aáng an idosí mm aluwo aluwo aluwo idór nar baʕanee a idolá karr aluwo alkwí ya yaamuka oo muukú boóʕ hee hee nga ʕiis barasiyee alkwí heé yaamu diriyee nga ʕiis heé nga ʕiisi a Wangereesiroo idorí kwaqo ʕaay Jermanwoo kaqo ʕaay muukí alkwí koodi kana qwareés nee Nyerere Goraa a tsuunqikeê qoomaasiyee aʔa koodi kana qwareés nee Nyerere koodír koodír Wangeresi aní na duúx kureeri kumi na hii miaka kumi na tano kú aqo koodír buʔaʔín an buʔa ah idór kar meêr aní kureerí miaka kumi na tano Bariyeéd dóʔ Tahhahhaní kwí oo Riroód kurkihee aqo an buʔ kurkú hiiʔiita aqo an malé buʔ aqo umó kuru Januari hadi Januari unalipa kuru bira Januari birna hardát ametoa Januari ya makani anatoa aʔa Kiswahili maweek Kiswahili garí aga dakuusaán axwantá Gorwaa tir itʔs oʔindee look talaali talaali gadáʔ kar atén Januari talaali kah talaali talaali aqo an dux talaali ar kurkó tsár aqo an dux talaalír kurkoqáʔ aqo an dux kama imekosa idorí bar tlehhakáng ee bará qaaymoorók aga dosliká idór tar dosl dirka tí geemáy iʔa-qase Béhero daánd aní teʔeéʔ toka niinaw an ooʔ alkwí dirka tí bira laqwál koodi bira lakít ge laqwal Béhero ibir laqwál koodi a shiliingi koodi a hamsini gár kar buʔún koodi a hamsini hamsini bara doʔorenee kaahhang todáʔ ta kwaʕaángw kond ee mibeerí koʔaneekeê ee karra a mibeerí koʔán orojo garʔéʔ tí bar wáh ka tlakweê gár tlakwa káhh garók waheek mbayaroô barka tlakw ooʔareʔ shiliingi hamsini an koodir buʔ bura abar buʔiká burta óh tseegumó slehheeri aree lehhó miesi sita hhara gawadáʔ adabu xáy lakít aa Béhero jamani lakít aní a alaxweés kuúng iʔa-qamimee hhara gawadáʔ bira laqwál a laqwál alkwí atén Gorwaa a kahaán garqáʔ a laqwál lakini bar dóʔ gadaʔee idorqaʔee ta kahi a gadáʔ ʕis a pernát tlehhit gár ta dogî a shiliingi ishirini kan doog mibeerí tsareê shiliingi ishirini shiliingi ishirini shiliingi ishirini a todáʔ buunír kond ee hayya kin gadáʔ doog a gawadáʔ mibeerí a tsareekeê magâ axwantá a Gorwaa mibeerí ee faanqw alkwí a mibeerí faanqw a laqwál idosiyee umowós a laqwal bar búʔ alkwí bira laqwál sleerók barka weeriis bar slee ka weeriis an búʔ bira kana weeriís kabla yiikwa boyáy nin daha yiikwa a awu idór koqáʔ kun tataahh bará slumtoo boyáy tina hardah awu kuna wa gweer koqáʔ kuna wa gweer naada a hiʔít boolooqáʔ Endasak kin burumbur yiikwá dír slumtá wák booloó naadaroo aqo kin taahh bará naada umó hee koodi nga duuxiká aqo awee paka bará naada kin weeriis kin weeriis dír qarwo in huuw gawá koodisí siiwaár bira pesa bira káhh pesa a amilâ ga a amilâ ga a koodiri fák bahati yako bar na mét amoorók ni bahati yako xáy kwa hiyo awu burkwa huuw kwa mfano kwa nahhamitekeê idosiyee idosiyee awu burkwa oh kwa nahhamitaká kwaqo an naadarók eer idosiyee burkwa huuw kwa aludáʔ harge aree idosiyee aáng koodi a mibeerá koʔaneekeê ee aní bara buuʔika birta ohár ay awu burkwa oh gasí a mibeerá faanqweekeê kuúng bara buʔikeê ee awu bur aʔa kun pernat tleehh awu booloodáʔ gár a ay awu burkun slaaxw tsiru tsiru wák ina huubiimaán naadár Endasak awu kuqo slaaxw miya tsiru sleeme ngwa ayiká dume kan nunua na kan slaaxw neer tsiru awu tsiru sleeme ngwa ayiká tsiru siiwaarkaroo ngwa ayiká mibeerí dakaát hindí kuúng a haslit hara idór awuqáʔ oo dóʔ Hamisi koqáʔ boóʕ kodáʔ gasí aqo yangariír ari ta slaaxwi neer ehe tsiru idór koqáʔ oo dóʔ Hamisi oo Karama kun slaaxw neer tsiru tsiru aree wák koodi a buʔuutî aní sleeme aní slee an huuw ee lege aníng ana huúw dama naadarí ar Gidás gitláy mibeeri aree tsiyéhh mibeerí tsiyéhh amoór tsiru ngun sleerâng hindí naʕaʔka naʕiʔiká hindí in ʕaatsiyáʔ karra aáng ya heeko awu nguna huúw ta kahi awu kuna slaáxw shiliingi tsiru awú karama a hamad aáng ari kummee a gadáʔ tsiree a gadáʔ shiliingi idorí dakaateê shiliingi dakaát iimi tana axweés ta kahi awu shiliingi dakaát a tsiruwooká tsiru kuwa slay heé tsiru ngwa sláy ta kahi kuna qaytsú ay heesí a a heé heé a idomâ idomâ heeqáʔ awuwós ta slaaxw neer tsiru bará gorwaawoo xáy maʔishár Gorwaa umó deelooroo a tí Gorwaa nina babayiyáʔ Goraa hindí gadáʔ ya kis niinaw Goraa hindí tlahháy Goraa ku ninawekeê gár nisa ninaw mâ barakeê hindí a mâ gadáʔ nisa ninawuyee gár kis ninaaw a tiyeekeê a tsuʕutasí a lawalaasí a lawawin hheʔee amoorqáʔ Irqutu awuwós kodáʔ boóʕ ngwa gaás Iraqw a uureekeê hheʔee atén amoorihee Gormo tunda mayikeê bara lawalaa gár inós a siiʔikeê Gormo ina siíʔ gidabá kuúng Gormo hhawatiima ngin tlehhiitikeê ngin tlehhiitikeê amoór Tarmo xáy i kahi axwantá an daʔayutang wa Tarmo ori ana daʔayumiitakáng ana tseʔeesakáng Irqutu ire Gormo alkwí ari gár mungu mungu tsuʕaká i deeroô Duwanqeé na tláy xáy Gormo burku slay nee Irangimó boóʕ aqo gasa burkwa slay nee Maandimó Daʕáw a lakiít Gormo alkwí ari afee Béhero ngwa i tleehh aree ya tsifiraangwdáʔ bara slaqwtá konakeê ta tleehh hheʔee lawalaadáʔ duuraʔidáʔ bará duuraʔidáʔ bará slaqwatá koondakeê lawalaa heé nga tseʔees kuúng burta hhitin ta gár tlaakw i tleehh aáng bar kuúng qwaslarumowók una naʕáy hayót una bét muu slawang lawalaa kana leéhh amoorqáʔ muu kuna leéhh neer lawalaa Goraa kina laleé laleé laleé laleé ay paka hindí Goraa gár tis ninaw i gár deiyáʔ kis kahhiyáʔ Goraa kis uureká tlahhayʔín a inoʔín a fuduʔuma gadáʔ sleeme a axama a qwariyeéd ar taw taw ee a bolóq qwariyeéd qwariyeéd a gidabá slaqwa nga dalaáʕ ina oóʔ slaqwtí bar uluwa kin ʕaay muukú makay ngi tsuuʕ tsirʕoo ka faák makay ka faák ta makay kaahhiyáʔ tsirʕi doosliká i ayako káhh aluwo gár ta tlehhiitiyiʔ a gaʕalee gár ta tlehhiitiyiʔ a tlehhiitiyiʔ a gaʕalee nee lawalaa ee karra kuúng tumatirók wahee Béhero an axwees ala alé aní tók masa iʔa qamiim xayge iʔa qaas tók oʔimang aní aga xaasliít tawa fuduuʔ a tí tawa heewí lelehhit muukú ʕaatso kun lelehhiit ta kahi muukú nee atén ʕaatsaán ʕaatsór lawulu muukú ti tsuuʕ a ʕaatsoroo gár Goraa hindí kis ninaw tlahhiʔiʔín is kaahhiyíʔ kus ureeká a tí gár hatláʔ káhh tlahháy kabilár hatláʔ ku ur asma muukusí fiʔitár ta leéhh i káhh fiʔita nga leehhiká Irqutu amoorqáʔ ngiwa ay nga tseʔeés harge Gormo nga tseʔeesî nga tseʔeesi karra umó heewoo tam koqáʔ a baskó xáy ngaqo tseʔees tós geera ku digír deelitikeê muukí heewí umowós ku bay Irqutu kwí umowós ku báy Gormo kwí umowós ku báy Alawa kwí umowós ku báy Burunge muukuqáʔ a tsiyéhh watu inne baabá wàk hee baba ni nga moja laqwaal tiwa diyaaʕiyíʔ umó heewoo koqáʔ koqáʔ oo hatláʔ koqáʔ oo boloquseerooká aqo garʔín kana umó heewoo ngaqo tseʔees asma geera ka eehár asma gadáʔ aluwók kon gár tlaakw kuúng bara léhh idór watl hheʔe koqáʔ tós ana tseʔés dirqáʔ dirqáʔ kawa ay Irqutu geʕeerakeê i kah a tseʔeesaan ge kwí kah kuúng an daʔayumitâng asma Tarmo ge aní a daʔayumiitakáng ana tseʔeesakáng aga andikeê gár Gorwaa kis ninaw a tí Gorwaa nire ninawuwiyeê gár tlahháy Gorwaa kus ninaw an tí Goraa kire baál Goraa aluwo ayaʔín hindí gár ngwa dalaʕ barta iwiít barisee bir qwasleemút tan firirín ar ee masoomo ayarén ngu sang kiiʕ desi ayarén ngu sang kíʕ masoomo birna desi ta kahi ayarén ngu tsaʕatay i gas masoomo ta kahi ayarén ngu quturó wa tuuʕi asma bira ngu saxumó wa tuuʕi ngu saxeemi wa tuuʕi asma bira duuxún hheʔee saxeemi ka tuuʕikeê haree ka saxeemi i qaasikeê hheʔee ehee ta laqwaal diʕáy diʕáy ngwa ngwa slay ta slayikeê laqwaalikeê hheʔee ta an ayá laqwaalikeê Goraa gár ngwa dalaaʕ an firariínd moroʔó hhooʔ kun firarin an gár ayá Gorwaa hindí gár umó kabilaroo tawaqo kahi umó hoomitoʔoroo nee ayarén ngu sang kiʕ a muukú slaaʔ ayá Goraawoo asma a muu kaáhh ee a gadáʔ tlahháy Gorwaa kus ninaaw geemay Gorwaa gadáʔ tlahhayʔín kus lowa ninaw an tleehheema tlakweerós xáy as ujeuri shinár Gorwaa gár kas hayya ninaaw qwaláng Gormo a in dalaaʕaán daraʕan ayá asodá ayá Qutadu
• Interlinear Glossed Text • Utterance view