Text view

f99Dliit

Recording date1999-02-10
Speaker age51
Speaker sexm
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
Ndoe aram na nd'e / k'a / jap lwa ns'et / ndoe liit. [noise] Liit / a toe long jap lwa yi dip nd'ûûn s'et. Liit d'e d'i ndoe mat ji / ndoe jap ji. Sai ndoe la liit / gok / muut. [noise] D'emde lwa moenan / wul goeme goeme t'ong doe tal liit / t'ong buk yok. [noise] Jap lwa moed'yen ns'et nnoe zak. Mûep t'wot rang nyerang. Mûep yi: "Poe du mûen du tal / long dwen." Ko da yake mûep man / goefe liit d'e t'ong haar mûep yi. Amma mûep mang boezung / de-goe mûen goe-- / goe tal ni / goe bi goet'a goe ni / goe muut la muk. Mûep p-- / p'ûat / doe t'el k'ek sek / mûep t'wot. Mûep rang bi goepe mûep t'ong mûen goe k'wal ndoe liit. Gya goefe mûep t'ong mang goe wakaam / de-goe nyok rwo nlu liit. [noise] Mûep [??] / yin: "T'ong du mûen du goe k'wal a k'wal / ndoe bi mou." "T'ong du k'wal a k'a goepe / a mmoe sa toe muut nyang yi goe mang ndoe dwen / ba yi yool goe mang a la liit / goepe ni toe long dwen yi." Mûep t'wot sh-- / shin / nye / d'ûe nnoe. Nye goed'emen. D'ong nt'it. Mûep sh-- / yûûl p'ûat de-goe nmûen. Sai fûan / d'in t'ong d'i goet'oor k'oeleng bi goek'wal mûep. Yin: "Hyamma!" Yin: "Nwa t'ong mûen a de-goe nk'wal a k'wal nnoe ndoe liit a?" Yin: "To a nwa t'ong tang a k'wal de-goe nloe nk'ek nwa." "A bi mmoe weel nwa toe poenoe nwa k'wal k'wal ndoe ni yi?" "Na liit nnoe a bi goehaar dwen o?" "Liit t'ong tu ko-la goenang b'ak haar." "De nwa goe mûen goe k'wal iri k'wal nd'ennoe yi ndoe ni wa?" Yin: "Nwa t'ong mûen goe k'wal a poenoe." "Nwa goe k'wal yin:" "Avu la liit muut nd'ong / avu la kung muut nd'ong / bi goehaal gulum muut nd'ong." "Avu la liit muut nd'ong / avu la kung muut nd'ong / bi goehaal gulum muut nd'ong." "To nwa t'ong mang a poenoe?" "Nwa la mûen / de ni goe man yi goepe ni d'e t'ong haar dwen yi nd'ûûn s'et." Mûep zak mûep kum kûût. Mûep k'oeleng d'ûe fûan. Mûep yûûl p'ûat mûen. Goe gya mpûe mûep shyang mûep kûût. Mp'ung yool dung d'yem goede k'ek mûep. Mûep mang gya yok wul nlu liit. "Avu la liit muut nd'ong / avu la kung muut nd'ong / bi goehaal gulum muut nd'ong." Mûep k'wal kûût t'ong b'ep nk'wal kûût. Liit yool doe d'yem. Mat liit p'et / doe d'yem / zem de-goe nyool b'yaal. Mis muk / liit yin: / "Pa goe d'yem nkyem." "B'ep du k'oeleng bi goed'e mûep t'ong k'wal yi." Mûep b'ep nyap / foot. Mûep k'oeleng / bi goek'wal mûep / toed'ong nt'it / lat. Mûep yûûl / goe b'yaal. Mûep doe tarap / k'ek jap lwa ns'et nnoe. Mûep two kûût t'ong tar kwan. Two kûût t'ong tar kwan d'emde swo. Swo [??] nkwa mûep mûarap t'oerep ns'et. Sai fûan swar kûût muut bi ji. [?? S'wan] Fûan swar. Yir kûût ba kûût d'oot goe-goe mang / yim / uh / f'im kûûr. S'ek nk'a ji. Nak hangoed'e d'ûe d'i k'a. D'e t'ong sam yi nyit muk goebi yitmûahoe. Wa kûût wa wul t'ong mpûe lu liit. "A bi mmoe shin muut nnoe toe?" "A nd'ang de muut nyang goe mang gwen d'ongya?" "A nd'ang de muut nyang goe mang gwen paap?" "A nd'ang de muut nyang goe mang gwen fûan?" "Muut yi yool goe t'a a nk'a la liit / goepe ni toe nda dwen toe / goepe ni toe long dwen toe ns'et." "T'ong ji b'oot mou / t'ong ji b'oot mou." "T'ong ji b'oot mou / t'ong ji b'oot mou." Gwen liit yûûl / hai. "Gwa goe d'ok. Gwa goe d'ok. Kede gwa boemang wal de-goe nma goe k'oom ba. Gwa goe d'ok kûût. Gwa goe shin. Gwa goe moor. Gwa goe d'ok." Yin / ni yin: / "Goeshir muk d'e nnang?" Yin: "Ji zem de-goe mûaan goe p'en ni nnoe dip." Mûep yin: "Kwai / gwa goe moor / goe t'a goe t'ong." Mûep lap fûan d'u. Mûep nak hangoed'e. Mûep doe poe fûan. Ase me / a hangoed'e kalfûel / goerok. Fûan lap hangoed'e nk'ong. Mûaan goe nak hangoed'e d'ûe nsûûn. Kat hangoed'e hok rok mpûe muk. Mang s'wa dip. Ba doe kat mûep yin: / "Ai / hangoed'e =hok kwan nyil." Mûep nak nde poe ni zak-yit. Lap s'wa zak-yit. Mang d'emgoed'e kyoklok / p'iring nsek muk. Yir p'et / ba doe t'a t'ong. Mûep shin s'oe poe ni s'oe. "T'ong ji t'o." "B'it la d'a lin / de ji wa yi." Pe ngong / mûep poe pin nfûan wa goe t'a t'o. Goepe fûan na mûep saam lat / fûan yool p'et nk'ong pin / pe goed'e goeshir hok. T'a goeshir goenhok. Hok goeshir / t'ong =hok goeshir. Sai liit hok p'et doe kat ni. "A nd'ang gwa t'ong hok k'a goeshir ngonghoe e?" Yin: "Gwa goe nyet ji." Yin: "T'yak ji rang nye toe ma goe k'oom yi." "Ji zem bi ji a de-goe np'en ni de ji / de ji ru t'uun yi goede k'a muk / de ji t'oerep goeshak ndoe ni." "Muut hok la nsûûn p'uur." Liit yin: "To gwa goe shin hak'uri." "Gwa goe moor goe ba goe t'o." Fûan yir ba. Sai ndoe goepe fûan / mong mûep saam / mûarap sosai / nt'it / nkyem fûan yool yi doe =hok / la liit nnoe. Goepe =hok / la liit nnoe kûût / har goe kat pe goed'e k'um =hok / p'en / k'um =hok / ngong =hok / yool su wa bi muk. Liit p'et d'em mb'itlung de-goe doe na fûan hok kat fûan ba. Mûep mûen goe goeshir mûep kat / =hok goeshir de p'en la / wa kam. Mûep p'ûat yi leng / tang pe goed'e fûan. Mûep yok doe / doe kat ni / d'a wa doe nlu. Mûep zak yok wul. Mûep t'an ni de-goe ndoe ya. Fûan p'aar goe-goe t'a nd'ûûn me. Liit zem de-goe nrûûp me hok. Me hok b'al. Fûan mang bi goed'e nd'ûûn / me nnoe. La lyak / goet'eng poenoe / mpûe me / liit lap lyak nk'ong ji. La mang goesoe lang mpûe me / liit lap lyak nk'ong ji. Mang gwen / d'a goet'wot d'i / liit lap lyak nk'ong ji. Fûan man an. Sai ru kûût t'o nd'ûûn la bang. Goepe t'o nd'ûûn bang lat / b'iring kûût haan mpûe me. Goepe liit lap / bang =hok / lyak nk'ong ji mûaan goe-goe p'yan goe fûan nd'ûûn. Fûan p'et / yool su zak-yit. Mûep yin mûep yi: "Ai fûan nlang nang-pûanang / fûan wa kam." T'an fûan. Fûan ru mûaan doe kat k'um. Lwa goepe t'o wam shin nyit poezek poezek sek. Fûan mang / k'aramshim fûan =hok / uh / bi wam =hok / k'oon nk'a ji. Goepe goek'oon nk'a ji / t'ong d'em / goe wakaam goepe liit d'e nt'an ni yi. Liit wa wul doe kat / bi nnoe goet'ong. Bi hok ra nsek liit. Liit ter d'yem goet'oor. Sai mûep / sai bi =hok / tal kûût. Yin: "Gwa t'ong mûaan a nnanghoe a?" Sai liit yin: "Ji d'e t'ong ji tang a fûan." "Dam k'yak ji sosai." Yin: "Ji zem de-goe ntu ni." Sai bi =hok k'wal kûût ndoe liit yin: / "Oh." "D'in la goe zem d'ûe noe / d'in t'ong goe bi fûan ba." "Nyegoepe goe na fûan / dok shin bi goedam k'yak noe poenoe. Moe t'an ni de-goe ntu." "Sai mang s'a muk nin nyit noe." "Goepe nin s'a muk nyit noe lat / hen wam yi t'onghoe." "D'in ma boeyool ma hen." "Ko hen la mang s'a noe zak nin nyit goe / sa ba goe / t'ong goe wam zak / kat hen la nin s'a noe nyit goe." Liit k'oeleng poenoennoe / na liit yool / yir yit ji / yool su p'et wa nlu. T'ong ji k'ara ji tang pe goed'e fûan zak-yit mou. Fûan p'et d'em bi ji. Goepe k'oeleng pe na liit su lat / fûan p'et. Goedoe mang yit nni / liit goe na / fûan nni. Liit yo / sh'yan d'yem / goe su. Fûan t'an ni goe mman. Ba bi ji goe t'a t'ong swar yi. A boelat / aram muk toe.
• Interlinear Glossed Text • Utterance view