Text view

Naan

Recording date2000-12-01
Speaker age23
Speaker sexm
Text genretraditional narrative
Extended corpusno
Javascript seems to be turned off, or there was a communication error. Turn on Javascript for more display options.
Hen hen hen t'ong k'wal la ndoe aram le. B'it dok lin toe nnoe. T'ong k'wal la ndoe aram le. T'ong kut la ndoe aram tyoklok. T'ong kut aram nnoe a k'a loede ndoe k'ur ndoe ke. Loede zem de n-- bi k'er dip goed'e nd'ûûn goed'e nd'ûûn lu pe goed'e mutane ngam dip ndoe lwa ns'et goepe mûep swo daga ns'et mûep doe rwo dakd'ûe lu. Ni zem de mûep goe k'wal yin goepe ni toe goe k'oom de mûep goe zem yit muk yi. Dip bi goepe mûep la d'e nwen yi de muk de mûep t'ong goe kat Naan k'wal yin to hen hen t'ong poe gwen ndoe shit de hen na gurum goepe t'ong b'oot goe shin shit hok toed'ong Loede yin a ji. K'ur yin a ji. Ke yin a ji. Mûep nin mûep goe ndoe ngoegan. Ngoegan mûep na ngoegan nnoe myalap. Mang yit mûep dip. Mang yit mûep kûût p'uur. Mûep k'wal mûep yi to t'ong du shin. Naan eep ngoegan nnoe goet'eng lyak nyil. Mûep yûûl goek'wak mûep de nde mang ngoegan hok. Ngoegan hok paap d'i dakd'ûe mûep. Nd'ûûn mûep ba ndoe gurum goepe kat. nn Nd'ûûn mûep ndoe gurum kat ba. Loede ni kut yin ko goe yi kong t'ong ji wen ngoegan hok. K'ur yin ko goe yi kong t'ong ji wen ngoegan hok. Ke yin ko goe yi kong t'ong ji wen ngoegan hok. Sh'oor wai ko goe yi kong t'ong ji wen ngoegan hok. Aas wai ko goe yi kong t'ong ji wen ngoegan hok. ûû wai ko goe yi kong t'ong ji wen ngoegan hok. Loede ruun pûe muk d'e nt'uun yil yi d'e nt'uun yil yi. B'ûet an muk goepe t'ong kat ngoegan hok. Ni kat ba. K'ur ni d'e bi muk zak nyil d'e mmûaan yi d'e mmûaan yi. Ko ni t'ong kat ngoegan hokhoe. K'ur kat ba. Aas d'e nhok a t'uun goe sh'oon muk. Ko ni t'ong kat ngoegan hokhoe. Aas kat ngoegan hok ba. Ke d'e nbeer pe goe sh'e muk d'e nbeer yi d'e nbeer pe goe sh'e muk de na mmuk goebi t'ong kat ngoegan hok. Ni kat ba. Neng d'e nd'yem mmuk a goet'eng. D'e nwal yi d'e nwal yi. Ko t'ong kat ngoegan hok. Ni kat ba. A bi goesa toe la yi na loede d'e n-- d'e n-- ruun pûe muk yi nyil d'e nt'uun yil yi to dok a ngoegan Naan lyak yi mmûep de mûep goe mang yi. Ngoegan hok t'a nyil. Mûep b'at goe mang ngoegan hok ba. Har shini nnoe loede lang nwen ngoegan hok yi. A ni toe de yi na loede d'e nruun pûe muk yi nyil. Ke la yool k'ak jap muk la t'ong tang s'oe tab'a zak s'oe s'oe poenoe de goe yool yi ba. Ni yool zak de goe s'oe s'oe yi poenoe ba. T'ong beer a pe de na mmuk goebi ngoegan hok d'e d'i nd'ûûn s'oe goet'ong s'oe muk hok de goe kat yi goe mang. T'ong beer t'ong beer t'ong kat ba. Aas la s'oe shat la s'oe shat la kat ndoe pe goed'e yil. T'ong hok goe sh'oon muk hok goe sh'oon muk hok goe sh'oon muk. Ko t'ong kathoe. T'ong tab'a kat ba. A bi goesa toe yi na gwen bi k'er ndoe sh'oor sh'oor la shin d'e nruun pûe muk yi ma goebi mmuk loede nyil ni kat ngoegan hok Mûep leng nyir yi. Tun poedok har shini har goed'aar d'emde mûep mûep mûarap mûep leng nwen yi. Mûep kat ba. D'emde men d'emde mûep mûep leng nwen yi. Mûep kat ba. Har mûep goe-goe mûarap nd'ûûn wala tang goe tang bi hok. D'em-- de mûep mûep yûûl mûep na mûep yûûl t'ong shin mûep zak mûep rwo goenshin nni. A ni toe yi na loede ûû sh'oor ko-bi mmoe a ni toe mûep d'e nhok t'uun yi. Ko kuma mûep t'ong kat ngoegan hok nyil. Yi na d'emde men goe yil Naan nnoe mûep bi a bi d'ûam mûep bi a bi t'il mûep bi a bi goet'ong mang yit gurum mûep bi a bi goepe t'ong moe shin wala ba. Moe zem mmen a de-goe nlap goelong goe s'a mutane. Moe zem mmen de moe shin yi goe wun men de moe kat yi ba. Moe zem mmen a bi goepe de gurum goe poe men de moe lap yi de moe sh'ai yi nni. Bi goesa goepe hen k'wal bi nnoe hen kut a k'a nye bi k'er. Bi k'er to mûep shin bi nnoe toe. Men gurum k'ek goetep men ba toe nya ni yi Moe d'e moe nshin iri goennoe yi. Bi tyoklok la moe na la mang yit mûep la t'ong poe gurum goeme t'ong moe zem de moe nyet yi ngurum hok ba. T'ong moe zem de goe yir a mmen. Ko kuma hen t'ong zem de goe yir a mman. Ko yi zem de goe yir a mnik. Naan d'e nk'a men yi. Wakaam k'emk'em de-goe man ko-gurum goepe ni wul goe yil Naan nnoe a nde bi goe yil men uh. D'emde zak mûep wul goe yil nnoe a de-goe toe b'ool Naan. Moed'emde zak mûep wul a nde bi goe yil mûep zem wala ba. Mûep zem mmûep a? Sai gurum la gama wala muk de mûep goe doe goe mûûr yi. De mûep goe doe goe dal gurum hok goe b'aam. Ko mûep goe tu gurum hok k'a wakaam goepe d'ong ba. Yi na men men mutane men gurum men a k'emk'em. Yi na bi k'er mûep zak mûep a k'emk'em. A bi goesa toe
• Interlinear Glossed Text • Utterance view