Text view

7a

Recording date2005
Speaker age70
Speaker sexm
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
**** wohei nohuusoho': nenee', neneeninee hineniteeno' heetceh'e3tiinee. heetee hineniteeno', hinee heetnei'oohobeihi3i'. hee3ebce'noosoo3P hosei3iihi', hinee, heeneisiine'etii3i', nih'eeneisiine'etii3i', hihkusooP beexo'hooxuwuheihiinoo' heeyouhuu. hooxuwuutee' hiine'etiit. kookon hih'oowuuni heeneiteneihiinoo. kookon hih'oowuni'iini neeneniisi'owuhee. heene'ini wohei kokou'P hi'iihi', kokouh'uuheihiinoo'. heetbebiisiiteneihiinoo' heeyouhuu. toonheescebii'ou'u, heetbebii3eneihiinoo'. nono'eino' hih'iiP tih'ookonooneeneetou'u heeyouhuu. beh'eihehi' heeneestoonoo3i, hookonooniihi', toh'ookonooyoo' huune'etiit. Hookonooyoo'. Kookon tih'ooyoo hinenitee kookon hih'oowuune'etiino'; beneexo'uuni heentou'u heetniisiixonitoot. wohei nenitee kookon hih'oowoenetino'. beexo'uuhu' heetnii'P he'ii3ooni'i heetni'iixoneihit. heetniixoninihiit. hiisoho', niitobe'einiihi', nenitee heebeh'eentoo, heebeh'ini hi'iinoxu3ecoo he'ii3ooni'i. heebeh'ini... hoo3oo'o' nenitee heetniinoxo'oniine'etii3i'. neestouhu3i'. Hiinentoohu3i'. hi'in neneenee'. Noh hookoh biswootii bebii3eeneetou'u, nih'iiyihoo3i' beh'eihoho'. beh'eihoho' nih'iiyihoo3i', niiinone'. Nih'ii3ii'oku3i' beh'eihoho'. nihwonei'towuuneihi3i'. woow heetP ketni'iini? heetcihwonoo3iteet. Hotou3eeneeteebe? wohei heettousinihiiteebe? heettousinihiiteebe? heetne'P toonheesou'u, toonheesou'u hoo3itoo, wo'ei3 toonheesou'u heethitenixoheihiinoo', hi'iihi' hiine'etiit, toh'oonookonooni3ecoot 3owo3nenitee, nono'eino'. ceencei'soo' hiiwoonhehe'. hooweeteenebeihiinoono heeyouhuu, tohnih'oo3ouniine'etiitooni'. nih'oo3oo kookon, siihoowkohtobP kohtobeeneet, tohbehheentou'u hiiwoonhehe' niinihi'kuuhu'u: 3iwoo cei3iwoooniini, nuhu' heesoo' hesoohoo3ooninoo. wohei neneenee'. beexo'uuhu', beexo'uuhu' nuhu' 3owo3nenitee nih'eeneistoot. howoo nono'eino' nenee3i' hoonookonoontoo3i'. nih'i3oobeeneetou'u. Nih'ookonooneeneetou'u heeneestoonoo3i, heeneesinihiinoo3i, heeneesinihiinoo3i heeyouhuu. toonnih[n]eentou', toonnoono'uxoheit, toonnih'eentou', toonhi'in neniiboohuutoneihiinoo'. hiit ceniini'oxuu3einoo, wo'ei3 hi'in toonneneixohei'o. hinenitee, 'oh heetnee'inou'u. heetbebii3eeneeto'. heetniiP heetnee'eeneesP, heetnooxuwutii3i'. heetnooxuwuheihiinoo' hiisoho'uusiihi'. Noh ne'cihnee'eesiine'etii3i' nono'ei. Hookonooneeneeto' heeyouhuu. kookon tihciiteneihiinoo' heeyouhuu. beexo'uuhu' nono'ei tihwoxu'ooto' heeyouhuu. beexo'uuhu'. wo'ei3 woxu'uu nih'iixo'owut, ne'nih'ehcesiseenetit: hetnii3oobeit. nih'iixo'owut woxu'uu, noh ne'nii'P, ne'nii'cesiseenetit; hetnii3oobeit, hetciinentooyeit, Nih'oo3ou'u hiihoowunee'eestoono'. Hiihoowuuni; kookon niicesisinihii3i', 3ebkoohut. 3owo3nenitee niixo'owut woxu'uu, hetnii3oobeit, hinee heesinihii3i' xouuw[uuhu']. hi'in nenee'. 3owo3nenitee niihee3neeniihi' hee3neeniihi' 3owo3nenitee niine'etii3i'. hetneenetiehk nono'ei, neecee wo'ei3 heebehniixo'owu woxu'uu ne'nih'ii'ceecesisinihiit. woxu'oo3eihiinoo', XXX hetneenetiit, hetnii3oobee', **** toh'u3oobee' hinee heesP heeneestootiini', heeneesinihiitooni'. hi'in nenee'. huuwoon[hehe'] kookon siiceentou'. hooweentou'. hiiwoonhehe' huuwo' heesiini, hiit xonou nee'eesoo' hiiwoonhehe'. toonheesou'u. 'oh heetee hih'oowunee'eesoo. heesoo'ohk, nihkoneet, nih'iiyihxotoneihi3i' beh'eihoho', heeneesiini. he'ne'ko'usiini. hi'in nenee3i' ne'nih'ii'kokoh'outi3i'. nih'iikokoh'outi3i'. 3iwoo heetniisiini. heettoustoon? heettoustiin? wohei. wohei niiyou, wohei niiyou nuhu' heeneeP heeneistoo3i'. heetneeyei3oonootee' nono'eino'. beebei'on huu3e'. beebei'on neeyou hinono'eino' nih'iitiine'etii3i' teecxo'. 'oh hi'in nenee'. wootii honoh'oe, hecoxonoh'oe he'ih'ini nii3neniibee nuhu' hibesiiwoho. he'ih'ini no'xoo, nuhu' nokohuutooni'. he'ihwoxkonee he'ii3ooni'i ceniini'ooni'. hoowuni'oxonee, hoowuni'oxuuhee, hiini3ecoono, hoowuuni. Hih'oowuukokoh'u3ecoo. kookon siiheneewo'oneit. heneewo'oneit nuhu', nuhu' nihwoxkoneet. wohei nonoonoko' huusoho' uus--iihi' howoo heetnee'ino' hinee heetniistoot, tohuuheeneiseineebeit hibesiiwoho, neeneistootiini' kookon tohuuP xonou tihciiteneihiinoo' heeyouhuu, Honoot noteiiteheihi3i' beesneniteeno'. wohei he'ne'ei'towuunoot nuhu' hibesiiwoho nee'eeskoneet, nee'eeswoxkoneet. he'ihciini'oxonee. he'ihciini'oxonee nuhu' tohwoxkoneet, 'oh nehe' he'ne'hoo3itoonoot nuhu' hibesiiwoho, hi'in heesciini'oxoneiit. he'ii3ooni'i he'iine'etiit, wo'ei3 hitiine'etiitoon[inoo] he'ii3ooni'i hiisoho'. toonhihnoohoo3oo; hi'in he'ihkonootonee. wohei he'ne'ei'towuunoot: nebesiiwoo, nebesiiwoo nihwoxkoneenoo, he'ih'ii. neettoustoo, neettoustoo? XXX CiiP ciini'i3ecoonoo. Siiciiniini'iini nuhu'. Woow cihP ciine'inoneihinoo. neeP nehe' neetouP, neettoustoo? Heetihcihniiteheibin, cih'ei'towuuni. Hih'oo. wohei, heneeyeih'ei'towuunin. nii'itoon. nee'eesinihiin, nuhu' heetcih'ei'towuunin heeyouhuu. Heetcih'oo3itoonin niiyou hini' nih'iiskoneen. cih'oo3itooni toonheesoo', toonheesoo'. wohei noh nuhu' hibesiiwoho ne'ei'towuunoot. ne'oo3itoonoot nuhu' heeswoxkoneet, heesciini'ooni', heesciini'oxoneit, he'iisou'u houuneenooni'. wo'ei3 wootii hixowuuni: heentou'uni' heetiine'etiit. Hixowuhneenei'oxoo'. neyeiniiwoohuutoneit. wohei, hee3eihok nuhu' hibesiiwoho, wohei nonoonoko' nii'itoon, niiyou tohcihP tohcih'oo3itoonin nuhu' heeswoxkoneen. hiit hooweentou' hiit heetiine'etiino' heeyouhuu, nih'iit. Heihoowunii3inowoon. wo'ei3 heeyou, heihoownii3inow hiisoho'uusiihi'. hiisoho'uusiihi' heetnehP heetyihoono' neene'eeno' nuhu' beh'eihoho', neeyou hinee neeceeniiinon heetyihoono'. heetwoni'oo3itoonoono'. 3ii'oku3i' noo'oeniihi'. heetihcooh'owuuneinoni. wohei ne'iyihoo3i' noo'oeP hee3ebP 3ebiihi' niiyou niiinone'. ciitei3i' [he'ih]ceenokuno'. wohei heeyou, heeyou heihno'useetiininoo, hee3eihok, nuhu' beh'eihoho, neeceeno, hee3neeniihi' neeceeno', nuhu' nisP kookon hiihooweixowuu nuhu' niscihinouhu3i', beexo'P tihceceeco'ohuni'. Wohei hiiyoo3iihi', toh'uuyooteeneetou'u hiine'etiit nuhu'. wohei nehe' honoh'oe he'ne'iini wohei nottoneit nuhu' beh'eihoho, hee, heeyou heihno'xohetiit? wohei nuhu' hibesiiwoho ne'ei'tobeeni3: niine'eehek nuhu' neisie. Nihwoxkoneet. niicihwoniini hei'towuuneinee. toonheetniisiini, toonheetniistoot, heebeh'e'ineebe, heebeh'e'ineebe hini', heebehP... nono'eino' heebehnii3inowuu heeyouhuu hiitniisP heetniistootiini' heenei'isiihi'. niiyou nuhu' nono'eiteen, honootee', wonoo3ee' nuhu' hiiteen. wohei. wohei neeco'oo, cih'oo3itoonei'ee. hoo3itootoo neeyou heeneeskoneen, toonheesciini'oo', toonheesciini'oxoneiit. 'oh nehe' honoh'oe ne'oo3iteet, hinee heeskoneet. He'ihwoxkonee. hinee heesou'u ciini'ooni'. nee'eesiini, nih'iisciini'oneihit, nuhu' hihciini'oxuuheiit, hini' hihkonootonee, kookon heesiini, wo'ei3 hiine'etiit nuhu', Nihwotoxoobee'. huut niiciinoohobein, nuhu' cenih'ii3oo'. he'ihbeexo'nee'eeneesiini. wotoxoobee' hini' hihkonoot. hinenitee howoo cii-ni'-kokoh'oeneet-o' hi-ini3ecoo-no kookon cii-ni'-P tee~cii-ni'-kokoh'oeneet P hi-ini3ecoot he'ih'iiP wootii hinenitee tih'iisiine'eixoo'oo3i'. Hi'in nenee' heeneisoo'. 'oh nehe' hecoxonoh'oe ne'oo3iteet nuhu' hihkonoot, heeneisoo'. hiine'etiit bisiihi', hitiine'etiit, heeyoo' hiihei'ino' noo'oeniihi', hih'oowP bisei'inou'u hineniteeniit, niiyou nono'eiteen. toon=he'=iisou-'u wotoxoobee P nih-wotoxoobeihiinoo-' nuhu' hih-konoot kookon nenee' nih-'oon~oo3itoot-o' woow bis-oo3itoot-o' he'ih-cii-ni'oo 'oh niine'eeno' beh'eihoho' noh ceh'e3tiitou'u, ceh'e3tiitou'u. ceh'e3tiitou'u hinee heeneisoo'. 3ebiihi' hoo3itooto', toh'uni hoonoo3iteet, beh'eihoho' ceh'e3tii3i'. heesceh'e3tii3i' kokoh'eeneetou'u. bebiiskokoh'eeneetou'u heetniisinihii3i', heetniisooxohoenihiitou'u. heetniisooxohoeP te3eiciihi' beh'eihehih'o' heetniiheeneesnii3ino', 'oh ne'nih'iisoo', hiisoho'uusoho', hiisoho'uusiihi'. ceese' hiisoho'uusiihi' 'oh te3eiciihi' ne'nih'eeneisnii3nowoo3i' hinee hinono'eino'. hoowuuni bisnii3inowuu. cei'sooni' nih'iisnii3ino' niiseiht. wohei ceese' cei'sooni'. howoo nih'eeneisP nuhu' cenP; tece'iiniihi' wohei hiisiiniihi'. wo'ei3 heeneicxooyeiniihi', nee'eeneisniinii3nowoo3i'. hi'in nenee': heesoo' hoonoo3itooto', niiyou nih'iiswoxkoneet. ceh'e3iheit niine'eeno nuhu' beh'eihoho, kokoohowooneeceeno'. hoowuuhu' beseyeineeceeno', kokoohowooneeceeno'. Nehe' hee3neeniihi', kookon niscihininouhuuneeceeno'. Kookon.... nehe' hihceh'e3iheiitono, honooP, honoo3iteet kookon heeneeP heeneiskonoot; wohei hi'in nenee'. ceh'e3iheit, beebiisceh'e3iheit, tohnee3i' heetkokoh'outii3i' niiyou hihkonoot, toonheetniisooxohoenihiitou'u, toonheetniisooxohoenihiit, heetniisooxohoehooxuwutii3i', heetnii3ooxuwutii3i' niiyou nuhu' hihkonoot. kookon heetne'cooxuwutii3i' honoot heetbebii3enP bebiisiini kokoh'oeneetou'u, ci'nih'eeneihii3oo', beh'eihehihi', toonteeP toontihP nih'ii3oo' niiyou nuhu' hihkonoot, nuhu' hinen, nehe' honoh'oe hinee heesinihiitooni', hinee hee3eekoneet nuhu', toon=hii3e' P hit-iine'etiit hini' hi'iihi' nih'iis-konee-t wohei bis--iihi' hiine'etiit toonhiisciiniini'iini, hi'in nenee' nihkokoh'eeneeto'. hi'in nenee'. 'oh hi'in heetni'ooxohoenihii3i'. heetbebiisinihiitou'u. kookon tihciinihiitooni'. hookonooniihi' beh'eihehi'. beh'eihoho' ne'nih'iisP nee'ee3i'oku3i'. kokoohowoo neeceeno' Nenee': bebiisiini nih'ei'inou'u. nih'ii3i'oku3i', nih'iiceeh'ei'i3i', noh ne'nii'P nohuusoho'. nee'eeneesiine'etiit nono'ei. kookon hih'oowuuni... hih'ooweeneiten xonou heeyouhuu; nih'iikokoh'oeneetou'u. wohei nih'iinihiitou'u, nih'iiskokoh'oeneeto'. Noh nee'eesinihiit niiP niine'eehek nehe' honoh'oe. hinen, honohP hecexonoh'oe nih'oo3iteet, hihkonoot, toonnih'iisoo3i, toonhinee heesciini'ooni', toonhini' heesciini'oxoneiit. he'iine'etiit. niiheyoo hee'ino' honoo3itooto'. bisiihi' hiiteen. howoo niiheyoo niiheyoo nee'eesinihiit heenei'tobeet hiisoho', heetnee'eesoo'. hi'in nenee'. hi'in nenee': neihciini'oxoneiit. heetnee'eesoo', hini' heeskoneenoo. hetcii3o'uni, hetcii3o'uni, hetcii3o'nee'. hi'in nenee'. Wohei nenee' heesinihiit nehe' honoh'oe, heeneeskoneet. beh'eihoho' ceh'P ceh'e3tii3i'. ceh'e3tii3i' hi'in, niiyou heeneesinihiini3 nehe' honoh'oe, hecoxonoh'oe. woow... beisniinihiitooni' heeyouhuu hinee hee3ei'eenee', hini' hihciini'oxoneiit. beisniinihiito', behiihi' heeyouhuu. **** woo3eeni', hi'in nih'iisinihii3i'. woo3eeni' nih'eeneiskookoneet. 3ebiihi' ciiciisixoheit. wootii hee3ebeenihP, nihnoonoohoo3iheit, nihP nih'iiskoneet, nih'iitkoneet. wootii noonoohoo3iheit hiisoho'uusiihi' neeyou; neeyou, wohei neeyou ceese', hiisoho'uusiihi'. hiine'etiit heetniisoo'. hi'in neneenee': hiis toonnih'iisciini'ooni', toonnih'iisciini'oxoneit. hoowuni'eeneet, tohbixoo3oot hiniito'eino, wo'ei3 niiheyoo, hiniito'eino, wo'ei3 niiheyoo hiteneyooo; bixoo3oot hibesiiwoho. bixooto' hinenteeniit, hiine'etiit. Hih'oowP, bisiihi' nenee'. hi'in neneenee', heeneisoo'. wohei ne'nih'iistoot. 'oh niine'eeno' nuhu' beh'eihoho' nihceh'e3tii3i'. kookoh'eeneet[ou'u] konowuuhu'. beebii3eeneetou'u. hiisoho', hiit ci', nihnee'eesinihiito'. wo'ei3 ceese' ci'nee'eesinihiito'. wootii heeneeneitenou'u hiisoho'. heetteeteeciseenoo'. teeteekoonei3i'. woow hini'iit, nenee' neteeko'oneiit. wohei hini'iit, niiyou neteeko'oneiit. heetni'inihiinee. hiisoho', hoonii, wootii heeneixowootP, heetP heetnehwoohoneihiin[oo']. hooxohoenihiitou'u. tohP, henee3neeP heetnooxohoenihii3i'. heetbebiisooxohoenihii3i'. hiisoo', nee'eesniiheneiht nuhu'. nehe' ceese', nee'eesniiheneiht, hiisoho' heesoo', hiisoho'. ne'nih'ii3ee3i'oku3i' niine'eeno' neeceeno', beh'eihoho', nenee3i' hii3ei'ebei3iehkoni'. heetnooxohoenihiitou'u. heetbebiisinihiitou'u. Wo'ei3 toh'ooxuwutii3i', hinenitee toonheetniistoot, toonhee3e'inou'u nono'ei, niibiibebii3eeneetou'u heeyouhuu, toh'eentou' hooxuwuutee' nono'einiine'etiit. kookon tih'iiciiceeneiteneihiinoo' heeyouhuu. ne'nih'iisiine'etiit nono'ei. nono'eino' ne'nih'iisiini. hi3oowuuhu', teecxo', 'oh heeneisiihi' nuhu'. 'oh ne'nih'iisiini. hoo3iteet nehe' honoh'oe, nih'iiswoxkoneet. niine'eeno' beh'eihoho' ceeh'e3tii3i'. Nih'ii3i'oku3i' beh'eihoho'. ceeh'e3ihoo3i' nuhu' honoh'oe. wootii nih'eeneixoohowoo3i' hiisoho'. heetehnee'eesooxohoenihiinoo. hii3e' ceese' heetnee'eesooxohoenihiinoo. Hiit nehe' ceese', wo'ei3 ci' hiisoho'. Woow heetniiP heetniihenbeebee3inihii3i', wootii ne'hoo'einiini, hoo'einiini wooh[on]enou'u, woohonenou'u nuhu' heetniisooxuwutii3i'. wohei niine'eehek nehe' honoh'oe, hee hoonoo3itooto'. ceniixootee' nuhu' nih'eeneisei3i'i. ciini'oxoneihit. huut heetniicooneenetit. Bixonoteebetit bixonoteebetit nuhu' XXX ne'nii3ei'neeniini houuneenoo' nuhu' konoot, nih'iiswoxkoneet he'ih'ii3ou'uhouuneenoo'. biiheit. wohei nuhu' hibesiiwoho howouunoneit. wohei niine'eeno' nuhu' beh'eihoho' 3ii'oku3i'. 'oh nuhu' heetniiteheibeit, nih'iit. hooxohoenihiitowuni3i, nuhu' konoot, heetniisniiteheibeit, heetniisniiteheibeit. woo3ee' neneenee'. woo3ee' nih'eeneesinihii3i', hiisoho'uusiihi', hiit, hii3e', nih'eeneixoohooto' nuhu' woxkonoot, toh'uune'etiit niixoo, hiiheesciiniino'ouutiinino hini' heesciiniini'oo' huutiino hiisoho'uusiihi'. wootii hee3ebiihi' 3ebiicisee[t], he'ii3ooni'i toh'uni wotoxoobee', hiine'etiit. neniteen[o] noonoohowoot Biibixone'etiini3i. huut ne'nii'coo'uheit, tih'ini woxkoneet. nuhu' toh'oo3iteet nehe' nuhu' toh'oo3iteet, nehe' honoh'oe, biiheit, biiwoohut. hi'in nenee'. nih'eeneisoo' niine'eehek nehe' honoh'oe. niine'eeno' nuhu' beh'eihoho' nihceh'e3tii3i'. kookoh'oeniini. niixo'owu3i' woxu'uu, nenee3i' niikokoh'oeniini. hi'in nenee'. hi'in nenee': toonouneihiinoo'. woxu'uu nenee'. heeneesinihii3i, 'oh XXX heetnii3oobeit hetii3o'P hetciinentooyeit. wohei heeneesinihii3i nenitee, hee3ebiini heetP heetnii3oobeit. nenee' nono'einiihi', toh'oenei3oobeit nuhu'. 'oh nee'ee3eeceh'e3tii3i' niine'eeno' beh'eihoho'. 'oh nee'eetei'inou'u, nuhu' nee'eesP nee'eeskoneet nehe' honoh'oe. hibesiiwoho noo'xoheit. honoo3iteet. wohei Wohei, woow neeneeheyeih'ini, heetbeebee3inihiitooni' heeyouhuu. ceniixootee', ceniixootee' nuhu'. heihii wootii heecxooP heecisiini hoo3iteet, heihii koo'oecoh'o'oot. nuhu' beh'eihoho' tohceeh'ei'i3i' ceeh'ei'i3i', nenee', nenee'. cee'ni'ouubeiht, nenee'. wonoo3ee' nee'eesnei'oohobeihiinoo' niiyou nuhu' hoo3itoo. woow, woow, hee3ebiini, **** neneenee', hinono'ei nih'eeneisiine'etiit, nono'ei nih'eeneisiine'etiit teecxo'. hookoh nono'ei beh'eihehi' nih-'eeneis-P hei'in-ou'u hei'inou'u beh'eihehi' heesP heescebiseenoo' nuhu' hiine'etiit. nih'ei'inou'u hetnii3ooxuwuheihiinoo', hetbebii3eneihiinoo', hetbebii3eneihit, hetbebiisinihii3eihiinoo' heeyouhuu. hinenitee toon=heesi--ini heetn-ooxuwuh-eihiinoo' heet-bi'-P heet-cih--'-oni P cih-'oon~okoo3itoo-t heetcihbebii3e'ino'. hetce'bebiisiini, ce'eini. hi'in nenee'. he'ne'beebeetoo3iteet. ceniixootee' 3ebiihi'. wonoo3eeni' hiP hitoo3itoo, nih'eenei'tobeet, heenei3oohooto'. neniteeno noonoohowoot nehe'. kookon siiwotoxoobee'. hi'in nenee': ciini'oxuuheit hihwoxkonoot. heentou' niiyou nono'eiteen, nih'eeneisoo', heetniitP niitbebii3eneihiinoo'. nono'eiteen, beh'eihoho' nihceh'e3tii3i'. hi'in nihnii3inou'u woxu'uuwo. beh'ei[hehi'] heeneiscei'sou'u woxu'uuwo. ceceeco'oheihiinou'u heeyouhuu. kookon tih'iiciinee'eestoot 3owo3P nono'ei 3owo3nenitee. hookonooniihi', neeyou hini'. wohei nehe' honoh'oe wootii hei'iisP heeneixoo3iteet. heeneixoo3iteet hiisoho'. beh'eihoho' ne'iini. wohei ne'P cihkohei'ihee ne'cooh'owuuneit. sitee, ne'konee' biii, ne'nee'eetoxuuni. wohei bebiisceenoku. heetnei'towuuneen. heetnei'towuuneen heetniistoon. heetnei'towuuneen heetniistoon. Wohei ne'P hei'iisceeh'ei'it, ne'ceeh'ei'it nuhu', ceenokut. wohei niiyou hotoo3itoo, hini' hee3ooP heeneesP heenee3oo3iteen, hinee heenei3P heenee3obeet niine'eehek nuhu' heesciini'oxuuheiit. neneenin, neneenin heetniini, heettounooxobein. hootn-onoo P toon=hii3eihi-t woxhoox nonookeihi-t heetniiwoubeen, heetni'iini hiisoho' heetnee'eeneestoon. neeyou, neeyou 3ebiihi', hinee cenihP, huut neeyou cenih'iitP cenih'ii3ibee3iiino' neneenin heettounoox[obein], heetce'iseen. heetniiwoubeen. heetneeP hinee hee'inowoo, Nih'iitcihbee3iiino', heetnee'eetce'iseen. heetnee'eetou'. hiikoo' 3oowuukoo' hiit heet-ne'-P heet-niistii P heet-niistii-n he-yeihi' heetniinii3oeinow. Nuhu' yookoxuu nii'eetei', hi'in nihii niiyoo'oeno wo'ei3 hiisoho'. Wohei heetniihoonokousetiin, hiisoho', heetniini. Hiisoho' heetnee'eeneciitow. wo'ei3 hiisoho' wootii, heetce'exo'oowuuni hiisoho'. heetce'exoowuuni. he'ne'ce'P heetniitnokohun. he'iitnei'i nooxcitiin heetniitwottonouhun, heetniitbii3woohun. heetnee'eeneestoon. heetniiniistiin heyeihi', niinii3o'oenow. heetihco'oenowoon, hinee nih'iiscihbee3iiini', heetnee'eetini, 3oowuukoo'. wohei he'nee'eestoot. Ne'P he'ihnookuusebei; nonookeihini3. Toh'uute'einowoot hitoniho'. 3ebce'eini, hinee neeyou nihcihwonbee3iii3i'. he'iicis, bebeneh ceeseini' koh'uusi' wo'ei3 niiseti' hiisi'. ne'ce'eini no'oxuuhetit. 'oh hini'iit, nehe' nih'eenei3P nih'eenei3ei'towuuneit heetnee'eeneestoot. co'oeinowoot. wohei hiisoho', bexooot. ne'bii3woohut nih'iise'ini ciitoowuu'. woow biih'inou'oo'. niisbii3wootooni', nihbii3beet. wohei 3ii'okut, 3ii'okut. 'oh kookoxuutenin, nuhu' hitoniho' woxhoox, woxsineni3. heihii hiinco'ooceihini3. Bii'ontei'ooceihini3 hini'iit seenook. nii3ootousiini' nuhu'. hoowu'un kookon seenook. heenoo nuhu' 3owo3neniteeniini seenookuu. Nih'iinei'ooceihin. he'ihce'ooceinoo'oo, noo'oeniihi'. hinentoohut. hinentoohut. beenhehe' noh'oesei'oo', nih'iitwottonouht. XXX he'ino', cihciitP ceneene'einiini ceenokuni3. hinen toh'uni, nih'iisbii3woohut, 'oh nihkooko'uxo' wou'u. hoowuuhuuteihin hiitiino. hiit he'ii3ou'u neniteen. cese'eihiiniini, hini'. wohei. niicihwonniiteheibe3en, hee3eihok. nihcihwonniiteheibe3en. Wohei heniiyeihinoo. 'oh nihcihwonniiteheibe3en. neihoowuuhuuteihi, hiit noo'oeniihi' 'oh niicihwonniiteheibe3en. hee'inone3en. hiitoh'uni... nihbi'P nihnoohobe3en. hee'inone3en, tohP huut niisneniin. hotonihi' woow cee'teiitooneiht. woow nihniiniisiho' he'ih'ii, hotonihi', wohei hoowoohkohtobeihi woow. wohei heetP... heetneene'xohe3en. heetkoxuuxohe3en. noosoucihP noosouniini coo3i' hii3e' hinenitee. he'ii3e'inoneinoni, 'oh niicihwonneh'einoni, heetneh'einoni. 'oh, 'oh neneenin, heetniiteheibe3en. heetniiteheibe3en. heetniiP noono'oono3ein. heet-bih'inou'oo-' niiyou heet-ne'-siisen siis P hiise'enou'u niiyou nuhu' wohei ne'P, hiise'enou'ut, kohei'it, ne'nii'P heetne'iini, koxuuxohe3en. 'oh huut cenoo3i', hiitiino 3o3ouute'einiihi' hiisoho'. huut, hiit, heetniiP heetnee'eexohe3en. Hetce3ei'oobe huut. nonoo'eici3oot nuhu' hiteexokuuton. Noh nuhu' hoowoohkohtobeih nehe' woxhoox. ciinesiiniinit. he'ih'iiP 3ebiihi' he'iicis hiit beexo'ciisiini. 'oh ne'P wohei too'usee, hee3eihok nuhu' nihii hihniiteheibeiiton, nuhu' cese'eihio. noo'usee' neene'eeno' ceebisee3i' hehneh'i3i'. woow biih'iyoo'. Nihciinoohowoot. niiyou henii3ootoe'eeno, nehe' henii3ootoo'oe, hitenoo. woow hoonohookuneti, nih'iit. hi'iihoonohookuneti. heetni'noohoo3ein. he'ne'nee'eestoot. nihi'hohookunetit hinii3ootee'eeno. ne'noohowoot wootii hiisiiniihi' ho3es. noohowoot, he3ebcebiseeni3i, noo'eici3eini3i. nenee3i' heetP noosouniini heetwonneh'einoni, be. wohei, wohei sooxe. Ne'cih'oo[no]xono'oo3i'. 3ebiihi', ceniibiikoo. Teesisee3i'. ceniibiikoo. 3ebiihi' hinee nihcih'iitisee3i', nih'iice'P ce'cihneehei3i'. 'oh he'nee'eesisee3i' he3ebiihi'. hohkonee nihsehno'oxuuheti3i'. wohei niiyou cee'no'oeckoohun woow. hii3eti' nenee'. hootnoo3itoonoti nuhu' beh'eihoho' heesiini. woow benee3iisini' woow benee3iisini'. hinee heetP, 3iwoo, hii3eti', heetniini hi3ootP. heetbiibiine3en howoo nuhu' nii3oo'ooteeno heetni'iinoohoo3ein biikoo heetniini ni'iinoohoo3ein biikoo, hentooninehk. wohei he'ne'nih'iisiini. wohei ce'no'eockoohut. wohei nii'i3ecooni3i tohce'no'oeckoohut niine'eeno neniteeno. Woow heebe3wottonootiini'. Woow heetneeyei3etei'i hi'in neeyei3oo'. wottonouhu3i'. Ne'betoootiini' beetoootiini' hi'iihi' behni'i3ecoo3i' tohce'no'eeckoohut. wonoo3ee' heso'P No'ote3ee' nuhu'. Nihnoh'oeseitee'. wohei niixoo hehwonP, neiwoo, heh'eenesooku'oon. Wonoo3ei'i, woow heetihwonesooku'ooni'. nebesiiwoo, woow heetwonP HeetwonP hinee heetoh'oonooP hehwoneeP, wonesooku'oot hiit 3ee3ii'okut hiisoho'. howoo beteeyoo', tei'yoonoh'o' hoo3oo'o'. howootooku'oo3i'. Howootooku'oot neneenit, tohnoohowoot beteenP beebeteeeni[3i], ni'i3ecooni3i. Hinee toh'esooku'oot, hinee niicibe' hiisoho', 3ebtokooxuunoohu3i'. hehniisini3i. hii3e' nihcoo'uhetini3i. heeneete'eikuu3etini3i hiisoho'. Heeneete'eikuu3etini3i. nihciinehtiihoot. hiiwo' he'iiteenoo3i, nih'iit. Hiixowuhciine'P niine'eeno' nuhu' neniteeno'. Wohei ne'iini hiteno' hini' hinii3ootee'eeno. 'oh hoonohookunetit nuh'uuno. ne'noohowoot hoowuuhuuteihino' he'iitnei'i. 3iikono'. he'iitiseenoo3i. he'ii3P he'iiteenoo3i. noohowoot, nehtiihoot, wohei, ne'iintiseet. 3ebiihi' hoowuP hoowucih'e'inP hoowucih'e'inone'. hikoowuninoo, ne'too'useet, ne'iitenoot. Tesihceheihoot, hoowu'uncesiikohe'. Woow nih'iisiitenoot, hiiyohounoo'oo3i' hini', 'oh hoowP hoowuni'nee'eestoono'. woow nih'iisiitenoot. Nuhu' biito'owu' hoowunP hoowuteenistoono'. Nih'iisiitenoot, noh'oenoot. wohei huut ceecihwoncoocoo'u3eibe, hee3oohok. tousooti'? tousooti' cihwoncoocou'utiinee niiyou nuhu' hinenteeniit, nuhu' hinenteeniit niiyou heentootiini'? tousooti' nih'iit, tohnee'eeneestoonee? heetwoteexohe3enee. heetnoohoo3i3einoo. neneeninee heetnoohobeihinee. He'ne'ii'biibiiwoohuni3i. biibiiwoohuni3i. Ce'iini... kookou'uneihii, nih'ii3i', heetihciinee'eesihei'een. HeetP heetniini, heetP heetce3koohu'. HeetP neetneihoowoohce'ino'useebe. Beebeet heetP toonhiitoh'uni, heetP heetcebxooni'. Heetce'iini woow... heetihciinihei'een. Neetneihoowooh'uni cou'utiibe hinenteeniit. heetniihowu3ecoobeen. heetihnee'eesciinenei'een. heetniini ceece3koohu'. wohei hi3oobeineehek, heetciinene3enee. Hi3oobeineehek, heetce'eeckP heetce3koohunee. Heetcebkoohuni', cenih'ii3xooni'. Hohou. 'oh ne'iini bebi'inii3toneit. Woow nuhu' cese'eihiiho, hiisiitenoot nuhu'. 'oh neniteeno', niiP niiciini'tounoo3i'. NiiP niiyohou'unoo'oo3i'. woow heentou', siihetneihoowuni'cesiikohoe'. **** Toonhiixouuhuni3i, ne'cihniitouuhuni3i. HoowoohP, 3ebcebiini. He'ne'nih'iisiini hiixonitiit. hiixonooP hiixoyooni', nih'iiP hihbiineihiit, nuhu' Nohkbeh'eihehii'oot nuhu'. Nohkbeh'eihehii'oot. Heihii, hi'iinotoniheit. hi'iinotoniheit, hinenitee heenesowobeihi3i. 'oh nuhu' nihii, hoo3oo'o' he'ihnosouniini heene3kuutonee nuhu' 3iikone'einiini. heene3kuutonee. wohei ne'nih'iisiixoneiht. nih'iinotoniheit. Heenetenowuunoot neniteen heeyouhuu. Kookon behiihi', toonP toonheesciini'oo'. Ne'nih'iiseeneentou' heeneisoo'. heeneisoo' huune'etiit, ne'nih'iiseenentou', hoo3oo'o' hinenno' tih'entoo3i' tihbeteencowo'oo3i'. Hi'in nenee'. Ne'P niine'eehek nehe' hinen, nehe' hinen, ne'nih'iisiini noonP toh'uni heenetenoot Hih'oowu'u[n]cebiini. kookon nih'iibeeto'oo' huni'. Hi'in nenee': Hoo3itoo nih'iiswoxP nih'iiswoxkoneet. Hi'in nenee'. Niine'eeno' beh'eihoho' nih'ii3ooxuwutii3i', nenee' niiyou nuhu' honoh'oe, ne'P ne'nih'iisiini hiixonooP niine'eeno' beh'eihoho' ne'nih'ii3ooxuwutii3i', hetnee'eesiine'etiit. Ceniixootee', nee'ee3oo'. Wohei hiit niiyou neneeninee hineniteeno', heetih'itenowunee, heetih'i3oobeeneetowunee, nono'ei ne'nih'iisiine'etiit, hi3oobeeneetowunee, nono'eiP hinono'einiine'etiit. NoxoweenenP beebeetiseenoo' hinono'einiine'etiit, nih'eeneisoo'. Hoowoo3eihino' woow. Woow beneebeeto'ou'u hiikoot nuhu', tohce'esiine'etii3i' hiiwoonhehe'. Nih'oo3ounec toh'uni kookoo'oeciiteinoo'. Henee3neenonisee3i' hetei'yooniibin. Hi'heenesiiniiheti3i'. siiheenesiiniitoo3i', XXX 'oh niine'ee[hek] hinono'ei hinenteen[iit], heetee nih'eeneisniinii3ino' woxu'uuwo. Hi'in nenee'. Hiiyoo3iihi' Hi3oobeit hiisiine'etiit. Heescesisinihii3i', 'oh nih'i3oobeit. nih'iixo'owu3i' woxu' hetciinentooyei3i'; nenee'. Bebiisinihiit. hi'in nenee': nuhu' tihbebiisinihiitou'u heeyouhuu. Nih'ouubebiis3i'okuutou'u hiisoho'. wohei neeceeno', behP beh'eihoho' nih'iiceh'e3ihoo[3i']. Hi'in nenee'. 'oh nih'ii3i'okuutou'u nuhu' heeneesinihiitooni'. niscihininouhu P niscihininouhu-3i' kokoohowoo-neeceeno' Ciiceceeco'ohuneihit, tih'iiniscihinouhuutooni'. Hi'in nenee'. Nih'iibei'i'ei3i' hiisiihi'. ne'nih'iisiini. Ne'nih'iisii3oowuune'etii3i' hinono'eino': hiiyoo3iihi'. beebei'on 3eboosei3iihi', ne'nih'iisii3oobei3i' nono'eino'. Ne'nih'iisii3oowuuni, ceesisinihii3i. Ne'nih'iisii3oobee' heentou' Hoowkookoh'oeneihiinoo hiisoho'uusiihi'. Toh'u3oobei'i3i', Toh'u3oobee' heesinihii3i'. hiisoho' 3iwoo ne'ceibeni'. Hiisoho' noh nestoohu3i', Nih'eeneisniiheneihi3i' hiwoxu'uuwunoo. Hiisoho' nuhu'. woow noxowwoowoti'esee3i'. noono'oonotii3i'. Nohkheeckoohu3i'. hiiyooteeneetou'u hiwoxu'uuwunoo niiyou. Hi'in nenee' hoo3itoo, woxkonoot, ne'nih'iiswoxkonee3i'. Wohei neneeninee heetihne'niiskokoh'eeneetowunee nuhu' hiine'etiit, wo'ei3 nenee' heeneisoo', nono'ei nih'eeneisiine'etiit, Toh'oonookonooneeneeto' heeyouhuu. nohuusoho'. Wohei nenee'. Kookou'unei niinee'eesinihii3e3enee. Heetihbebi[is]hiiyoo3iihi' ceh'e3tiitowunee. Hi'in nenee'. Nohuusoho'. Hohou heesinihii3e3enee. Wohei ne'nih'oo3ouyeitinoo. Heetne'P nee'eeneesinihiinoo, Nih'oo3ouyeitiit, heetbebiisP Heetnih'oo3ouyei[tinoo] heetih'ini ceh'e3tii3i' nihP nih'oo3ouniihi'. Wohei nohuusoho'.
• Interlinear Glossed Text • Utterance view