Text view

35c

Recording date2005
Speaker age75
Speaker sexm
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
niiyou nuh'uuno niiinon. Nuh'uuno hinono'einiini 3owotokoy. Heesinihiitee' nih'iisP, nih'iiscowoo3itootou'u hinee 3eboosei3iihi', hinee nih'eenei'towootou'u heeyouhuuho. Niiyou nuhu' niiinon. Nih'iiceh'e3teekuu'; ne'nih'iisinihii3i'. Neeyou hinee niitbisiseet nehe' cenohoe'einiihi', 'oh ne'nih'iiP ne'nih'ii3e'eitee', Hinee beh'eihoho', nehe' hiisiis niitbisiseet. Heesinihiitee', 'oh, niiyou nuhu' niiinono. Hisei wothe'3ii'ookuu. He'3i'ookuu, he'cehP he'ceh'e3tii. He'ini notnoohoot niiyou nuhu' hiisi' heetwooyoo'. Heetcihnoh'oxoh'o' nehe' beh'eihehi'. He'notnoohoot heetniiP heetniisooko'oyoo' niiyou nuhu' hiisi'; Heetniisiini niiteheiwoot hitei'yooniiwo bisiihi'. Ne'P, ne'nih'iisiini heeneincitiit niiyou nuhu' ciitoowuu' nuhu' niiinon. Nih'iisiini heeneiyooteno', wo'ei3 nih'iisiini beebii3bee3i'. Totoos hiP niiyou hineixo'ono, neneenit nih'eeneincitiit. Noh niine'eehek nehe' hisei huu3e' tohP tohP tohceh'e3teekuut niiyou nuhu', niiyou nuhu' niiinon, tohnee'eesinihiitee'. Niiyou nuh'uuno, niiP niine'eehek nuh'uuno hokooxuno', hokooxuno'. Hiiwoonhehe' ne'P, hiiwoonhehe', ne'P ne'nih'iisih'oo3i' hiiwoonhehe'. 'oh hinee 3eboosei3iihi' 'oh tokooxuno' he'ih'ii3eeno', tokooxuno'. Wootii heenoo heni'P tohuutokoo3etiitooni', tohuutokoo3etiitooni', heetP, heetP, heetnohkco'oonoo'. NiitwoP niitbenookuhu3i', niitbenookuhu3i' niitwoohonookuhu3i', hinee hihcebe', he'etneen, nehe', nehe' neh'eeno heniinoonibeihit. Hetei'yooniibin, he'tounee. He'tounee he'P he'ini heeteniihee. Nuhu' bixoo3etiit he'neen, he'neen; ne'nih'iiP beniinee3i', nee'ee3ei'towootou'u. Wohei neeyou hinee, hinee, heeneesih'eihiinoo' wonotonou, heenoo he'ih'ini honoyei'i niiP niine'eehek neh'eeno. Niine'eehek neh'eeno hisei, behiihi' notP notiiceh'e3towoot toonheetniixoyoo'. Noh heinokP noP notiini ceeceh'e3towoot he'ii3ou'u heebehneenestoonoo3oo. toon=noyoohoot P toon=noyoohow-oot bis--iihi' hi-tei'yooniiwo hini-isiihoho Beebeet hini'iitiino nih'iisiini koxo'uuni koxo'P koxo'eeneine'etii3i'. 'oh ne'P tih'eeneinootiit ciitoowuu'. Wohei neeyou hinee 3iixo'oeno. 3iixo'oeno nih'iiP ni'iiP ni'iitei'eekuu' niiyou nuhu' 3owotokoy, niiyou nuhu' niiinon. Nenee' wootii heni'P heni'tei'iine'etiitooni'. Noh he'yeinino 3iixo'oeno. Neeyou hinee neeneicxooyeibeebisiseet niine'eehek nehe' hiisiis. HeeP heenoo nih'iiP, heenoo, ne'P nee'eesiine'etiit nehe', nehe', nehe' hinono'ei. Niiyou nuh'uuno niiP nee3ei'no'useet nehe' hiisiis, huu3e' heentou'u. Huu3e' ne'nii'ce'eisiseet. wohei noosouP ne'P ne'P ne'nii'heetcihno'useet huu3e'. beebei'on noo'usee3i; neeP neene'eehek ce'iini[ni]. Ne'ce'e'einit. 3owo3P **** ce'isee-t huusoho' huusoho' uus--iihi' noobe'ein--iihi' ne'-P noh niit-P niit-bisisee-t nehe' hinee cenohoe'ein--iihi' wo'ei3 wo'ei3 niit-ne'isee-t hinee hihcowoonou'u he'=neeni he'=neeni nih'ii-3i'okuut-ou'u niine'eeno' nuhu' hoon~oyoohoo3ei beh'eihoho' He'etneen niiyou, niiyou nuh'uuno 3iixo'oeno, niiyou nihP nihi'ii3iixo'oenoo'. neneenit nih'iiheeneti3i' hinee beh'eihoho'. Niiyou heni'tei'eekuu', ni'iine'etiit hinee heniine'etiito' niiyou nuhu' niiinon. Niine'eehek, niine'eehek nehe' hisei heetP heetbisniiheneihit. Hinee seenook, hinee seenook, heni'P heni'toukuhut niine'eehek nehe' tokoox. Nenee' wootii heeyooceihit, tenei'ooceihit. Hiit hiine'etiit hini'iit tih'etkou3iine'etiitooni'. Hini'iitiino heetniini tei'iine'etiitooni' tohuutei'oociini nehe' seenook. HeetP heetnee'eeneesiini coocowoo3itooniini. Howoo, howoo neeyou hinee hooxu3ohoeno, hooxu3ohoeno. Nenee' wootii ne'P ne'niitwoohonouse' niiyou nuh'uuno, nuhu', nuhu' niiinon. He'etneen, he'etneen wootii hini'iitiino nih'iitiini woowoohonP woowoohonise', wootii ne'P, ne'nih'iiP niitce3i3ise' heeyouhuu, Ne'nih'ii'ce'P, ne'niitbee3ise'. Hoowuutoo'use niiyou nuhu' huune'etiit; nonouutowuune'P, nonouutowuuni Noohootoo, tohP, tohP, tohnee'eesiine'etiit niine'eehek nehe' hinono'ei. Niine'eehek heesP heesP heesko'einoo', wootii ne'P hinee heeneesP heeneesinihiitei'i hinee 3o3ouutei'i wootii nonouP Ne'P heesiini, nee'eeneesiini, nee'eeneesiini wootii heetne'bee3iine'etii3i' nehe' nenitee; ne'nii'co'ookP cesisiine'etii3i' hiniisiihoho wo'ei3 **** Heneibii'hiniisiihoho, ne'nii'P ne'nii'co'ookP ceece3ei'oono' niiyou nuhu' huune'etiit. Nohuusoho'. Ne'nohuusoho'. Nee'eeneesiini niiyou nuhu' niiinon. Ne'nih'iihini ahh, heeneisiini hoonoo3itootou'u hinee uhh, neP nebeh'iihohowo'. Nih'ini, nih'iikoo'oeniini, koo'P koo'oeP koo'oesees tohuu3oo3owotenou'u nihP nihP nihkoo'oeniini kooP hiihoowuceeciikookuutiino'. koo'oeniini nihP nihiiP nih'eeneinenou'u. Nenee', nenee' nee'eeneesinihiitee' niiyou nuh'uuno, niiyou nuh'uuno niiinon, tohuuceh'e3teekuu' wootii nehe' hisei neneenit wootii he'neen 3iiP 3ii'ookuut ceh'e3teekuut.
• Interlinear Glossed Text • Utterance view