Text view

PKZ_196X_FoxAndHare_flk

Recording date1964
Speaker age70
Speaker sexf
Text genretraditional narrative
Extended corpusyes
Javascript seems to be turned off, or there was a communication error. Turn on Javascript for more display options.
Amnobiʔi lisa i zajats. Lisan ibi turat sĭregəʔ. A zajatsən ibi (pa-) pagəʔ. Dĭgəttə šobi ejü. Lisan turat bar mʼaŋŋuʔpi. Dĭgəttə dĭ šobi zajatsənə. "Öʔləʔ măna kunolzittə". Dĭ bostə dĭm sürerlüʔpi turagəʔ. Dĭ šonəga i dʼorlaʔbə. (Măn=) Men măndə:" Ĭmbi tăn dʼorlaʔbəl?" "Da măn turagəʔ, măndə, sürerbi lisička". "Kanžəbəj, măn dĭm sürerlim!" Šobi men. Da üge kirgarlaʔbə. "Kanaʔ döʔə!" A dĭ măndə:" Tüjö tăn bar tărlə nĭŋgələm, i tăn nuʔməluʔləl". Dĭ nereʔluʔpi i nuʔməluʔpi. Bazoʔ kandəga zajats i dʼorlaʔbə. Dĭgəttə šonəga urgaːba. "Ĭmbi dʼorlaʔbəl?" "Da kak măna ej dʼorzittə. Măn turam ibi pagəʔ. A lisitsan turat bi̮l sĭregəʔ. Tüj dĭ šobi măna šaːsʼtə i măna sürerlüʔpi". "Kanžəbəj, măn dĭm sürerlim!" Šobi. "Kanaʔ döʔə! A to tüjö tănan A dĭ măndə:" Măn kak nuʔməluʔləm da. Bar tărdə tăn nĭŋgəluʔləl. I tăn nuʔməluʔləl". Dĭgəttə urgaːba (-aba) pimnuʔpi i nuʔməluʔpi. Bazoʔ kandəga zajčik i dʼorlaʔbə. Dĭgəttə buga šonəga. "Ĭmbi dʼorlaʔbəl?" "Da măn turam lisitsa ibi. A dĭn (i-) ibi sĭregəʔ. I kulaːmbi, a măn üge turam jakšə, pagəʔ". Dĭgəttə:" Kanžəbəj, măn dĭm sürerim". "Dʼok, ej sürerləl. Urgaːba ej mobi sürerzittə. Men ej mobi. Buga, a tăn vovsʼe". Dĭgəttə (šo-) šobiʔi. Šobiʔi, (bu-) buga măndə: "(Kaga- kan-) Kanaʔ turagəʔ!" A dĭ măndə:" Tüjö suʔmiluʔləm dak, bar tănan saj nožuʔləm". Dĭgəttə (buga=) buga nerelüʔpi i nuʔməluʔpi. Dĭgəttə bazoʔ kandəga zajats i dʼorlaʔbə. Dĭgəttə kurizən tibi šonəga, šapkoziʔ. Măndə:" Ĭmbi dʼorlaʔbəl?" "Da măn turam pagəʔ. Lisitsa šobi kunolzittə i măna sürerbi. A dĭn sĭregəʔ ibi i tüj naga". Dĭgəttə:" Kanžəbəj, măn sürerləm". "Men ej mobi sürerzittə. Dĭ urgaːba i buga ej mobi. A tăn ej (sürerləl)". "Kanžəbəj!" Dĭgəttə šobi. Bar kirgarlaʔbə: "Uʔbdəʔ pʼešgəʔ (s- š-) kanaʔ (döʔə)! A to tüjö šapkuziʔ tănan Bar dʼăgarləm tănan. "Tüjö, (ujum=) ujuʔi šeriem jamaʔi." Dĭgəttə bazoʔ kirgarlaʔbə: "Kanaʔ pʼešgəʔ, a to tüjö tănan (Tagaj=) Šapkuziʔ bar bătlim." "Tüjö bar oldʼam šeriom." Dĭgəttə dĭ bazoʔ kirgarlaʔbə:" Kanaʔ!" "Tüjö nuʔməleʔbəm!" Dĭgəttə dĭ šapkuziʔ dĭm bar dʼăgarluʔpi. I dĭ kulaːmbi. Dĭgəttə amnobiʔi kurizən tibi i zajats turagən. Kabarləj.
• Interlinear Glossed Text • Utterance view