Text view

15_speech_part_2

Recording date2005
Speaker age75
Speaker sexm
Text genrepersonal narrative
Extended corpusyes
Javascript seems to be turned off, or there was a communication error. Turn on Javascript for more display options.
nono'eitiit woow... heetkotneihiwooni'. Huut niih'oniitowootiini', hookoh beneetP beneetoh'uni hiixouu3eiheet tei'yoonehe'. Noh kokouh'utii'ohkoni' bebiisiihi', heetce'iisiitenou'u. Noh ce'no'oehi3i' ce'inonih'i3i', ne'ce'nih'oo3ouyeiti3i'. Heetihtecinihiinoo nih'oo3oo. Niineyei3eihini' nuhu' co'ouutou3oot, hii3iihi' wo3onohuut, toh'etneyeitii3i'. Ceesey hinen noonoohoo3eihitowoo; teebe ce3i3ouu3eihou'u; Neenei'towuunou'u heetne'niitoon. Heetniikookokoh'ouP kokoh'outii3i' heetniisiini neyeitii3i' hinono'einihiit, heenee3etouuse' nuhu' hinono'einihiit. Wohei ne'hee3ebiini, hee3ebiini, hooxobeti', ne'ce'no'useet. Cihciiteit hinee nih'oo3oo; hiseihihi' nii3oonoot. Hee, heneecee boh'ooo, neneeninoo (nih'oo3ounni'ii3etit) Reed Tetter, ni'ii3oo3i'. Nehe' notoone, neneenit. Nei'oohobeinoo; kooneihni'inihii3e'? Hee, ne'niini'iini. Noh siihoowuutou3e'in; noh niito' ce3i3ouu3ei'it, noh nee'eesoo'. Tohuukokoh'outii3i'. Hoonoo3oo'o' nih'oo3ouseino'... Wohei hini'iit nono'eino' 3ii3i'oku3i', ne'nih'onii3i'; Hoowbeetcebe'eihei'i nuhu' nih'oo3oo. 'oh nee'eeP nee'eesoo': kokoh'outii'ohkoni' niine'eeno' nuhu' tei'yoonoh'o', bebiiskokoh'outii'ohkoni'... 3ebno'oehinoo3i hee3ebiihi', heeneti3etihehkoni' nono'einiihi'... hee3ebno'eeckoohunoo3i, kokoh'outii'ohkoni', heetne'iiP heetcesisiisiitenou'u. 'oh niisiine'ino'P nih'iisinihiinoo, Heeneeyouhuuho, ne'ce'ceeceibiini; hiiwo' ce'iskuu3ooo, heenei'isiihi'. Hoonoo3oo'o' nih'ii3eenetinoo noono'uxoP noono'uxotiini' hini'iit. Wohei howoo kokoh'owoot, nee'eeneisiini. Niito' beebeteee3i' heenei'isiihi'; niito' hoonoo'eiheti3i' beneexo'oo3ouyeitit. Wo'uuceh ceneiteinoo3i, nooxeihi' beebeet ne'niitowootou'u nono'einihiitono he'ii3ei'neeniihi'. Noh hu'un nenee'. 3eboosei3iihi' beexo'uuhu' nono'eitiitooni'. He'ih'iinokotii3i' tei'yoonehe'; hiinono'eiti3i'. Heeneinokotii3i', heeneinono'eiti3eti3i'. Noh hiiwoonhehe' niiniitonou'u tei'yoonoh'o', beexo'oo3ouyeiti3i'. Hi'in nenee'; ceencei'soo' hiiwoonhehe'. Noh hu'un nenee'. Heenehbebiiskokoh'outiinee neneeninee; heetkokoh'outiinee bebiisiihi', neeneisce'e3etouuse' hinono'einihiit. Nonoohobe3en, nonoohowun, nonoohowo', nonoohobe3enee, nonoohowoti, nonoohobei'eenee, nonoohobei3i', heetniiseeneesee3etouuse'. Toonheeneti3o', wo'ei3 heebeheeneti3oo hiite'eihiiP 3i'oku3i', cebxo'oeP koohonoohowoono'. hee, nonoohowou'u, heenei'isiihi'. Neeneisce3i3etouuse'. He'ne'no'uuu'ootowunee. Nototii, hotii, nototii, hototii, hitotiiw, hitotiibinoo, bisiitotiibiitoonin, heenei'isiihi'. Hinee niiteice3i3etouuse'. Hohkonee he'ne'he'inowunee. Hiniito'eibetiit, neeneisinihiitooni' hiniito'eibetiit: neinoo, neisonoo, nei'eibehe', nebesiibehe', neehebehe', heenei'isiihi', nehei, Noh heh'eenentou'u'u nihiitono. Heetne'nii'P heetne'inowunee. Beebebiiskokoh'outii! Wonoo3ee' niiyou nuhu' heetoono', heetoh'uune'etiino'. Niito' heneenentou'u'u hi'iihi'... ni'iiP ni'ii3eihiinou'u. Hiiwooniihi' niiciihehe' cebinoo'oo' Wohei 3ebkox3iihi' hi'in beesniiciihehe' hee3ebiini ni'ii3eihiinoo'. Hii3e' hee3ebxookuuni coo'oowuse'. HeeneiP kox3i': hooxono'oo, cee'eyeino'oowu', xonouu'oo', koonootoohoene', boo'oowu', sosoni'. Heetne'P heetniinihiitowunee. Hiit howoo nono'ei, konouutosei', heenei'isiihi'. Niiniisih'iitowunee, heeneetoh3ebhoowuP. Heetniitou'utiibinee; cesisiini heetne'inowunee. Heetou'utiibinee. Heetnei'inowunee. Hohkonee hinee, ne'hii3e'inowunee. Hi'in nenee'; cii'iini heetneihoowuuni. Wootii kooxo'uuni neenoniheihiinoo' nono'eitiit. Niiyou nih'oo3ouyeitiit: Hee3ebniito'ee'inowu'. Hii3e' hosei3iihi' heneinootee' heteenetiitoonin. Hiiwo' ce'iineesee'! wo'tenowu'! ce'tonounowu'! Heni'tei'eihino' hinono'eit[iit], heeneetoh'oo'eiseenou'u. Neyeihinono'eiti'! heeyeihP woow tei'oo' hetiine'etiitoonin. Nenee' hinee beh'eihehi' heeneicooniini, Nenee' hinee hotii, 'oh hu'un ce'einox, beh'eihehi'. Wohei beh'eihehi' ho'yoox; Ne'yeinenii3i' beh'eihoho', yeiyoonee3i'okuutou'u. Niiyou nuhu' heetoh'uune'etiino', honoonoyoohobeihino'. Hei'inou'u hee3e'einiine'etiino'; honoonoyoohobeihino'. Hoo3e' nih'oo3ouhohoo'oo', neene'eehek beh'eihehi' konoutokut: Ci'nihnii3neniibeino' nuhu' cesisiihi' no'uuhu' hiiwoonhehe'. Nono'o3oo' nihcih'eeneisee'; niitowo'o boo3etiitooni'. Hiit nenee', heeneesnosounii3neniibeit, noosouneeteniiheino'. 3iwoo, ce'iitenowu' hinono'eitiit. Heeneti3e', heeneti3e', niiniiitowuune' hiine'etiit heetih'i3eti'. Heetniiteheibein: huut neneeninoo hee'inowoo. Hiniiteh'eiP... heetne'P hotii... he'ne'P nee'eesehcebiseenee 3ebiihi'. Wohei beebeet nih'iisinihiinoo, hii3eti' niiyou nuhu' nih'oo3ouniihi', Nenee' hiine'etiit hiiwoonhehe': wo3onohoe, wo3onise', beetouu3einiihi'. Heetniiniisi3ei'in. Neneenini' neniiitowootou'u: hee'ino', konoo'ne'iisiiteno' niisi3oot. Cii'iini 'oh honouuneenoo', neeneisiini niisi3oot. Nee'eetoh'uuxoyoo' nih'oo3ouniine'etiit: heniine'etiino'. Ci'nihi'neecei'soo': niihi'neeniihi' he'ne'ini cebxootiini' niiyou nuhu' he3ebiini. Niitowooneino' nehe' nih'oo3oo. 'oh 3iwoo, heebehP heebehnottonein he'iiteihi3i, toonhei'iihi', wohei biibi3ehi nono'ei! biibi3ehi! Kooheetnee'inebeen? Wohei heeneiP hoonoo3itoonei'ee! heeneinono'eiti! Kooheetne'in? Heetne'inow heetniisinihiin. Hoo3iteenee hinono'einiihi'. Wohei hi'in nenee'. Hi'in wootii heetne'cih'e3eisinenee heeneisno'otehei3itowunee niiyou nuhu' nih'oo3ouniine'etiit. Niitecinihiinoo hinee cenohuut, cenohe'einiihi'. He'iitnei'i hii3e' 3owo3nenitee, he'ih'oo'eiseeno'. Heetniini, heebehbii3beeno', heetbii3ihi3i'. Wohei nuhu' 3owo3neniteeno', wohei heetnowooyeitin. Noh siihoowoe'in; nee'eetoxu3i', hoowoe'inowuu; Hoowoe'inowuu hiteenetiitooninoo. Beisnih'oo3ouyeiti3i'. Wohei ne'cesisP cesisiini noonotiitii3i' heeneesP heesoo' hiteenetiitooninoo. Honoo'einou'u, hoonoo'einou'u, cesisneyeitii3i'. Heneeyeihnih'iistii3i', ce'iisiitenou'u hiteenetiitooninoo. Wootii hoowunoxohoeniini; kokoh'outii3i' he'iicis, he'iitoxcecnii. Huut ne'ce'iisiitenou'u hini' 3owo3nenitee, hinee cenohoe'einiihi'. He'ne'nih'iistoo3i'. 'oh huut, wootii yiihoono' hinee niitohnonih'ino' heteenetiitoonin. Ne'niinihiinoo. Cih'iisou'u bebene beteetox yoo3oniini' niisoo' cecnii. Henee' heetniinono'eit? Henee'eehek neyei3ei3ei'it? Hi'in nenee'. Hoowouuneenoo nuhu' nono'eitiit. He'inowunehk beebeet heetnouutowuunono'eitin. Cee'inowunehk, heetnoonousinenee nih'oo3ouyeitiit. Nuhu' hiiwoonhehe' hiinono'eitiitooni'i, koho'uuni nih'oo3ouyeitiitooni'. Wootii wonoohoniini; wo'benP eexnih'oo3ouyeitiitooni'. Nee'eeP ne'nii'hinono'eitiitooni'. Hohkonee heetbeexo'oo3ouyeitiitooni'. Hi'in nenee'. Neneeninee tei'yoonoh'o', neneeninee neyei3eibeihiiho', nih'oniitowoo'! **** Hei'inowu' heteenetiitoonin! **** Beeteenoo': ne'nih'iisinihii3i' hinee beh'eihoho'. Heeteeneetowu'! Hiicebe'einiini ce'iiyo'ootii' ceece'iiyo'ootii' niiyou heteenetiitoonin. Beexo'unihiitowu' heeyouhuu! Beexo'uuhu' hiniito'eibetiit, bixoo3etiit, heeteenebetiit, honooneenebetiit, nenee' heteenetiitoonin. Tounowu'! Heetbisiitenowunee. Tounowu'! Neyei3eihe' hetei'yooniibinoo, heisiihehinoo. Neneeninee nee'ee3ei'towuune3enee. Wohei hee3ei'neeniihi', heetniini hoonoo3iteenoo, beenhehe' kokouh'utiinoo huut.
• Interlinear Glossed Text • Utterance view